Генадзь Уладзіміравіч Грушавы

Генадзь Грушавы
Дэпутат Вярхоўнага Савета Беларусі 1990 — 1996
Прэзідэнт	Аляксандр Лукашэнка
Кіраўнік урада	Вячаслаў Кебіч, Міхаіл Чыгір
Нараджэнне	24 ліпеня 1950(1950-07-24) Мінск, Беларуская ССР, СССР
Смерць	28 студзеня 2014(2014-01-28) (63 гады)
Месца пахавання	Паўночныя могілкі
Бацька	Уладзімір Ерамеевіч Грушавы
Жонка	Ірына Львоўна Грушавая[d]
Дзеці	Сын: Максім; дочкі: Марына, Мар'яна
Грамадзянства	Беларусь
Партыя	Беларуская хрысціянска-дэмакратычная партыя (1996)
Адукацыя	Аддзяленне філасофіі гістарычнага факультэта БДУ
Навуковая ступень	доктар філасофскіх навук
Месца працы	Аддзяленне філасофіі гістарычнага факультэта БДУ філасофска-эканамічны факультэт БДУ Інстытут сучасных ведаў імя А. М. Шырокава
Узнагароды	Rafto Prize[d] (1999)

Генадзь Уладзіміравіч Грушавы (27 ліпеня 1950, Мінск — 28 студзеня 2014) — заснавальнік і старшыня дабрачыннага фонду «Дзецям Чарнобыля», доктар філасофскіх навук (1994), прафесар (1995), дэпутат Вярхоўнага Савета Беларусі 12-га склікання.

Біяграфічныя звесткі

Скончыў мінскую школу № 50, якая спецыялізавалася на фізіцы і матэматыцы. Аднак паступіў на філасофскае аддзяленне гістарычнага факультэта БДУ (з 1989 — філасофска-эканамічны факультэт БДУ, з 1999 — факультэт філасофіі і сацыяльных навук БДУ), дзе выкладаў з 1973 г. да сваёй смерці. З 1991 прарэктар Інстытута сучасных ведаў.

Памёр ад раку крыві. Пахаваны на Паўночных могілках у Мінску.

Навукова-даследчыцкая дзейнасць

У 1975 абараніў кандыдацкую, а ў 1994 — доктарскую дысертацыю па філасофіі. Даследаваў гісторыю філасофскай і грамадска-палітычнай думкі Заходняй Еўропы і Беларусі часоў Адраджэння і Асветніцтва, тэарэтыка-метадалагічныя праблемы пазнання, грамадскай філасофіі і паліталогіі. Аўтар працы «Аказіяналізм Нікаля Мальбранша» (1978).

Грамадска-палітычная дзейнасць

Адзін з арганізатараў Беларускага народнага фронту «Адраджэнне». У 1989 г. узначаліў Камітэт БНФ «Дзеці Чарнобыля», які 20 лістапада 1990 ператварыўся ў дабрачынны фонд «Дзецям Чарнобыля» і дапамог больш як 2 млн жыхароў Беларусі. У 1993 г. фонд налічваў 14 тыс. членаў. Фонд накіраваў 160 тыс. дзяцей на аздараўленне за мяжу і да 2000 года ўвёз у Беларусь лекаў на суму каля $500 млн.

У Вярхоўным Савеце ўваходзіў у фракцыю Апазіцыя БНФ. Пасля рэферэндуму 1996 года грамадскія аб’яднанні 15-ці раёнаў Беларусі сабралі 116 тыс. подпісаў супраць скасавання яго дэпутацкіх паўнамоцтваў. У 1997 быў адным з заснавальнікаў Асамблеі НДА. З сакавіка 1997 г. па сакавік 1998 знаходзіўся ў Германіі праз пагрозу арышту. У 1999 атрымаў нарвежскую праваабарончую узнагароду памяці прафесара Торалфа Рафто.

Спасылкі

• Вольга Міцкевіч. Грушавы: Генетычныя наступствы Чарнобыля з часам толькі павялічыліся (нявызн.)(недаступная спасылка). Еўрарадыё (26 красавіка 2013). Архівавана з першакрыніцы 4 лістапада 2013. Праверана 12 студзеня 2017.