Кастусь Мерляк

Кастусь Мерляк
Дата нараджэння	25 снежня 1919(1919-12-25)
Месца нараджэння	Дзетамля, Уселюбскі сельсавет, Навагрудскі раён, Беларусь
Дата смерці	25 лістапада 2007(2007-11-25) (87 гадоў)
Месца смерці	Нью-Ёрк, штат Нью-Ёрк, ЗША
Месца пахавання	Беларускія могілкі ў Іст-Брансуіку
Член у	Беларуская народная самапомач Беларуска-амерыканскае задзіночанне Беларуска-амерыканскае аб'яднанне

Кастусь Мерляк (25 снежня 1919, в. Дзетамля, Навагрудскі раён Гродзенскай вобл. — 25 лістапада 2007) — беларускі грамадскі дзеяч на эміграцыі.

Біяграфія

Нарадзіўся ў вёсцы Дзетамля Навагрудскага павета. Бацька быў настаўнікам і афіцэрам у царскай арміі. Пасля Першай сусветнай вайны вярнуўся ў сваю вёску і жыў на зямлі. Кастусь вучыўся ў польскай пачатковай школе. Пазней закончыў двухгадовую Ральнічую школу ў Кушалеве ў 1935 годзе. Адразу паступіў у школу кааперацыі, якую закончыў у 1938 годзе.

З 1939 года працуе як бухгалтар. Пасля далучэння Заходняй Беларусі да БССР, у 1940 годзе скончыў курсы крэдытных інспектараў у Беластоку.

Пад час нямецкай акупацыі працаваў у Навагрудку ў гарадской управе, пасля ў Беларускай народнай самапомачы. З канца 1943 — інтэндант эскадрона/батальёна Б. Рагулі. У жніўні 1944 быў у батальёне «Дальвіц». Пазней абверам закінуты ў Італію, здаўся ў палон да амерыканцаў і быў інтэрнаваны ў лагеры, адкуль неўзабаве ўцёк.

З 1947 — у Аргенціне, заснавальнік і старшыня Згуртавання беларусаў у Аргенціне. З 1948 года Кастусь Мярляк узначальваў таксама прадстаўніцтва Рады БНР у гэтай краіне.

У 1954 годзе прыбыў у Нью-Ёрк. Пры канцы 1956­ распачаў супрацоўніцтва з ЦРУ. На той час К. Мярляк быў адзіным агентам гэтай спецслужбы ў асяродку беларускай эміграцыі ў ЗША.

Старшыня Галоўнай управы Беларуска-амерыканскага задзіночання (БАЗА) у 1959-1964, затым — Беларуска-амерыканскага аб'яднання ў Нью-Ёрку (пасля канфлікту і сыходу з БАЗА). Быў актыўны ў палітычнай і грамадска-рэлігійнай дзейнасці. Пахаваны на беларускім могільніку ў Іст-Брансуіку, штат Нью-Джэрсі.

Бібліяграфія

• Дзейнасьць Кастуся Мерляка на эміграцыі. Нью-Ёрк, 1992.

Літаратура

• Я[нка] З[апруднік]. Сьв. Пам. Кастусь Мерляк // Беларус, 2007, № 539, снежань;
• Шчэцька В. Адыйшоў ад нас Сьв. Пам. Кастусь Мерляк… // Беларус, 2007, № 539, снежань.

Спасылкі

• Мерляк Кастусь (бел.) // Запісы. — Нью-Ёрк - Менск: БІНіМ, 2014. — № 37. — С. 148.