Пагоня (мастацкая суполка)

«Пагоня» — творчая суполка ў складзе Беларускага саюза мастакоў, створаная ў 1990 годзе.

Прыдумалі і рэалізавалі яе ў знакамітай майстэрні «На Паддашку» мастакі Аляксей Марачкін, Яўген Кулік, Віктар Маркавец, Мікола Купава, браты Уладзімір і Міхась Басалыгі. У 2016 годзе сябрамі творчай суполкі «Пагоня» — крыху больш за паўсотні беларускіх масткоў.

Члены суполкі амаль штогод ладзяць выстаўкі сваіх прац, частку з якіх здымаюць па патрабаванні чыноўнікаў. В 2015 годзе былі зняты 3 творы: жывапісныя палотны Алеся Мары «Двубой, альбо супраціўленне двухгаловаму мутанту», Алеся Пушкіна «Памяці беларусаў, загінулых за Украіну» і партрэт амерыканскай мастачкі беларускага паходжання Галіны Русак работы Віктара Маркаўца. Прычым, апошняе палатно знялі толькі за тое, што фон карціны нагадаў цэнзаршы бел-чырвона-белы сцяг.

Мэта аб’яднання

Развіццё нацыянальнага мастацтва, захаванне яго пераемнасці, узбагачэнне традыцый, зберажэнне і памнажэнне мастацкіх набыткаў культурна-гістарычнай спадчыны. Усё дзеля абуджэння нацыянальнай самасвядомасці народу, яго духоўнага, культурнага і дзяржаўнага адраджэння.

Кіраўнікі суполкі

• Аляксей Марачкін (1990—1998);
• Мікола Купава (1998—2004);
• Леў Талбузін (2004—2007);
• Аляксей Марачкін (2007—2011);
• Генадзь Драздоў (2011—2016);
• Ігар Марачкін (2017—2019);
• Юрый Піскун (2019 — цяперашнi час).

Спасылкі

• pagonia.art — афіцыйны сайт
• Суполка Пагоня. Выстава памяці.