Уладзімір Рыгоравіч Цішкоўскі

Уладзімір Рыгоравіч Цішкоўскі
Дата нараджэння	22 чэрвеня 1933(1933-06-22)
Месца нараджэння	Магілёў, БССР, СССР
Дата смерці	2014
Месца смерці	Гродна, Гродзенская вобласць, Беларусь
Грамадзянства	СССР  Беларусь
Род дзейнасці	навуковец
Навуковая сфера	эндакрыналогія, кардыялогія, рэўматалогія, сексапаталогія
Месца працы	ГрДМУ
Навуковая ступень	доктар медыцынскіх навук (1984)
Навуковае званне	прафесар (1984)
Альма-матар	лячэбны факультэт БДМУ (1963)
Узнагароды

Уладзімір Рыгоравіч Цішко́ўскі (22 чэрвеня 1933, Магілёў — 2014) — урач, вучоны ў галіне кардыялогіі, рэўматалогіі, эндакрыналогіі і сексапаталогіі, доктар медыцынскіх навук (1984), прафесар (1984).

Біяграфія

Нарадзіўся ў Магілёве. Скончыў 7 класаў сярэдняй школы ў вёсцы Дашкаўка Магілёўскага раёна. У 1952—1956 гадах праходзіў службу ў Савецкай Арміі. У 1957 годзе скончыў Магілёўскую фельчарска-акушэрскую школу і паступіў на лячэбны факультэт Мінскага медыцынскага інстытута, які скончыў у 1963 годзе. З 1963 па 1965 год працаваў урачом-тэрапеўтам, намеснікам галоўнага ўрача ў раённай бальніцы ў Кіраўску. У 1965—1968 годзе праходзіў навучанне ў аспірантуры на кафедры шпітальнай тэрапіі Мінскага медыцынскага інстытута. Абараніў кандыдацкую дысертацыю на тэму «Клиническое значение некоторых сывороточных дегидрогеназ (ЛДГ, МДГ) и цинка в диагностике острого инфаркта миокарда».

З 1968 года У. Р. Цішкоўскі працаваў у Гродзенскім медыцынскім інстытуце — асістэнт кафедры шпітальнай тэрапіі, з 1976 года дацэнт кафедры ўнутраных хвароб № 1. У 1984 годзе абараніў доктарскую дысертацыю на тэму «Роль гормонов коры надпочечников и некоторых ферментов в патогенезе затяжного возвратного ревматизма». У 1985 годзе зацверджаны ў званні прафесара і працаваў на кафедры ўнутраных хвароб № 1, з 1989 года — загадчык курсам. У 1993—2004 гг. У. Р. Цішкоўскі на пасадзе загадчыка кафедрай эндакрыналогіі з сексапаталогіяй Гродзенскага дзяржаўнага медыцынскага ўніверсітэта.

Навуковая і грамадская дзейнасць

У. Р. Цішкоўскаму належаць навуковыя працы ў галіне кардыялогіі, рэўматалогіі, эндакрыналогіі і сексапаталогіі. Аўтар 114 навуковых прац. У 1975 годзе стварыў і ўзначаліў курс эндакрыналогіі ў Гродзенскім медыцынскім інстытуце. Прымаў удзел у шэрагу навуковых з’ездаў і канферэнцый.

Быў старшынёй праўлення Гродзенскай абласной асацыяцыі эндакрынолагаў і членам праўлення рэспубліканскай асацыяцыі.

Узнагароды

Ад імя Прэзідыума Вярхоўнага Савета СССР рашэннем выканаўчага камітэта Гродзенскага абласнога Савета народных дэпутатаў ад 13 кастрычніка 1986 года У. Р. Цішкоўскі ўзнагароджаны медалём «Ветэран працы».

Літаратура

• Цішкоўскі Уладзімір Рыгоравіч // Беларуская энцыклапедыя: У 18 т. Т. 17: Хвінявічы — Шчытні / Рэдкал.: Г. П. Пашкоў і інш. — Мн. : БелЭн, 2003. — Т. 17. — С. 131. — 10 000 экз. — ISBN 985-11-0035-8. — ISBN 985-11-0279-2 (т. 17).
• Тишковский Владимир Григорьевич // Кто есть Кто. Деловой мир СНГ. Вып. 2002. — Мн., 2002. — С. 381. (руск.)

Спасылкі

• Цішкоўскі, Уладзімір Рыгоравіч (доктар медыцынскіх навук; 1933—2014) // Вучоныя Беларусі. Нацыянальная бібліятэка Беларусі
• Владимир Григорьевич Тишковский // Часопіс Гродзенскага дзяржаўнага медыцынскага ўніверсітэта, 2003, № 2. (руск.)
• Никонова Л. В. Светлой памяти Владимира Григорьевича Тишковского (руск.) // Газета Гродзенскага дзяржаўнага медыцынскага ўніверсітэта «Эскулап», № 7 (192), 31 кастрычніка 2014 г.
• Цішкоўскі Уладзімір Рыгоравіч // Магілёўская абласная бібліятэка імя У. І. Леніна. База даных «Мой край — Магілёўшчына». Архівавана 24 чэрвеня 2023.