Эдуард Барысавіч Зарыцкі

Эдуард Барысавіч Зарыцкі
Дата нараджэння	9 лютага 1946(1946-02-09)
Месца нараджэння	Красны Кут, Краснакуцкі раён, Саратаўская вобласць, РСФСР, СССР
Дата смерці	6 чэрвеня 2018(2018-06-06) (72 гады)
Месца смерці	Мінск, Беларусь
Месца пахавання	Усходнія могілкі
Альма-матар	Беларуская дзяржаўная акадэмія музыкі
Месца працы	Беларускі дзяржаўны акадэмічны тэатр юнага гледача
Музычная дзейнасць
Педагог	Анатоль Васільевіч Багатыроў
Прафесіі	кампазітар
Узнагароды
Цытаты ў Вікіцытатніку

Эдуард Барысавіч Зарыцкі (9 лютага 1946, Красны Кут, Саратаўская вобласць, РСФСР — 6 чэрвеня 2018, Мінск) — беларускі кампазітар. Народны артыст Беларусі (1999).

Біяграфія

З 1948 года жыў у Мінску. Скончыў Беларускую дзяржаўную кансерваторыю па класе кампазіцыі Анатоля Багатырова ў 1970 годзе. У 1973-82 гадах загадваў музычнай часткай Беларускага рэспубліканскага тэатра юнага гледача. Працаваў пераважна ў галіне інструментальнай музыкі (апіраўся на класічныя традыцыі), масавай і эстраднай песні, тэатральнай і кінамузыкі.

Памёр ад анкалагічнага захворвання ў Мінску 6 чэрвеня 2018 года. Пахаваны на Усходніх могілках Мінска.

Творчасць

Сярод твораў: сімфонія (1970), сюіта (1980), канцэрціна «Пастараль» (1977) для сімфанічнага аркестра; канцэрты для габоя (1973) і валторны (1974) і камернага аркестра; капрычыа для фартэпіяна з камерным аркестрам (1978), сюіта на тэмы беларускіх песень (1976); камерна-інструментальная музыка; сюіты з музыкі да спектакляў «Дванаццатая ноч», «Снежная каралева», «Тэатральная сюіта».

Эдуард Зарыцкі аўтар больш за 600 песень. Ён аўтар такіх вядомых песень як «Белыя крылы», «Замова», «Начныя кастры», «Будзьма», «Палыновая ростань», «Лісток календара», «Так прыйшла да нас Перамога».

Таксама Зарыцкі стварыў цыклы на вершы Адама Міцкевіча, Якуба Коласа і Уладзіміра Караткевіча.

Узнагароды

У 2006 годзе быў узнагароджаны ордэнам Францыска Скарыны.

Літаратура

• Беларуская энцыклапедыя: У 18 т. Т. 6: Дадаізм — Застава / Рэдкал.: Г. П. Пашкоў і інш. — Мн. : БелЭн, 1998. — Т. 6. — 576 с. — 10 000 экз. — ISBN 985-11-0035-8. — ISBN 985-11-0106-0 (т. 6).