Лембата
| Лембата | |
|---|---|
| індан. Lembata | |
 Вулкан Іліверунг | |
| Характарыстыкі | |
| Плошча | 1.266,39 км² |
| Насельніцтва | 135 930 чал. |
| Шчыльнасць насельніцтва | 107 369,67 чал./км² |
| Размяшчэнне | |
| 8°25′42″ пд. ш. 123°30′57″ у. д.HGЯO | |
| Акваторыя | Банда |
| Краіна | |
 | |
 Медыяфайлы на Вікісховішчы | |
Лембата (індан.: Lembata), раней вядомы як Ламблен (нідэрл.: Lomblen) — найбуйнейшы востраў у групе Салор. Уваходзіць у склад інданезійскай правінцыі Усходняя Нуса-Тэнгара. Плошча — 1 266,39 км². Насельніцтва (2020 г.) — 135 930 чалавек.
Востраў Лембата месціцца за 1824 км на паўднёвы ўсход ад Джакарты, сталіцы Інданезіі. Мае вулканічнае паходжанне. Суша сфарміравана сістэмамі некалькіх вулканаў. Найбуйнейшыя з іх — Іліверунг (1018 м), Ілілабалекан (1018 м) і Ілелеваталок (1423 м). Захоўваецца вулканічная актыўнасць. Апошняе вывяржэнне Ілелеваталока адбылося ў 2020 г. і суправаджалася выкідам слупа попелу на вышыню 15,24 км. Большая частка паверхні складзена базальтамі і гранітамі. Берагі моцна парэзаны. Вылучаюцца невялікія паўастравы і залівы.
Клімат трапічны з выразным вылучэннем сухога і вільготнага сезонаў. Мінімальныя тэмпературы вагаюцца паміж +20°C і +24°C, максімальныя — паміж +30°C і +33°C. Сярэднегадавая колькасць ападкаў залежыць ад вышыні паверхні. У гарах выпадае каля 1200 мм, а на прыбярэжных раўнінах — 500 мм. У 2005 г. агульная колькасць ападкаў не перавысіла 320 мм, так што на востраве пачалася засуха. У красавіку 2021 г. моцныя дажджы выклікалі паводку ў горных раёнах, у выніку якой загінула каля 80 чалавек.
На Лембаце захаваліся трапічныя лясы з багатай арнітафаўнай. Прыбярэжныя воды насяляюць кіты, дэльфіны, марскія чарапахі. У мінулым лоў кітоў з'яўляўся важным заняткам жыхароў узбярэжжа.
Асноўны сучасны занятак астравіцян — сельская гаспадарка. Для камерцыйных патрэб вырошчваюць спецыі. Трымаюць свінняў, коз, курэй. Карэнныя насельнікі паходзяць з усходняга Флорэса. Жыхары берагавых і горных раёнаў належаць да аўстранезійцаў, але адрозніваюцца па мове і культуры. Нароўні з хрысціянствам і ісламам распаўсюджаны старажытныя традыцыйныя вераванні, асабліва культ продкаў і вера ў магію.