The Beatles

З пляцоўкі Вікіпедыя
Перайсці да: рух, знайсці
The Beatles
фота
Жанры

рок-музыка

Краіна

Flag of the United Kingdom.svg Вялікабрытанія

Адкуль

Ліверпул

Склад

Джон Ленан, Джордж Харысан, Пол Макартні, Рынга Стар

The Beatles (бел.: Бітлз) — брытанскі рок-гурт з Ліверпуля, заснаваны ў 1960 годзе. У складзе Джона Ленана, Пола Макартні, Джорджа Харысана і Рынга Стара, яны шырока разглядаліся як найвялікшы і самы ўплывовы калектыў рок-эпохі. Пачынаючы са скіфлу і рок-н-ролу 50-х, The Beatles пазней сталі эксперыментаваць з рознымі жанрамі, пачынаючы з поп балад і заканчваючы псіхадэлічным рокам і хард-рокам, часам выкарыстоўваючы класічныя элементы інавацыйнымі спосабамі. У пачатку 1960-х гадоў іх велізарная папулярнасць атрымала назву "Бітламаніі" (англ.: Beatlemania), але, калі з часам іх песні сталі больш вытанчанымі, The Beatles сталі ўспрымацца як увасабленне ідэалаў сацыякультурнай рэвалюцыі той эпохі.

Пачынаючы з 1960 года, The Beatles на працягу трох гадоў зараблялі сабе рэпутацыю, граючы ў клубах Ліверпуля і Гамбурга. У канцы 1962 года яны здолелі заваяваць папулярнасць у Вялікабрытаніі дзякуючы хіту "Love Me Do". З ростам Бітламаніі на тэрыторыі Брытаніі на працягу наступнага года яны набылі мянушку "цудоўная чацвёрка" (англ.: Fab Four), а ў пачатку 1964 The Beatles ужо сталі міжнароднымі зоркамі, якія рыхтаваліся да "брытанскага ўварвання" на поп-рынак Злучаных Штатаў. З 1965 года The Beatles выпусцілі тое, што большасць крытыкаў прызнае іх лепшымі матэрыяламі, у тым ліку такія інавацыйныя альбомы як "Rubber Soul" (1965), "Revolver" (1966), "Sgt. Pepper's Lonely Hearts Club Band" (1967), "The Beatles (White Album)" (1968), і "Abbey Road" (1969). Пасля распаду гурта ў 1970 годзе, кожны з музыкаў працягнуў сольную кар'еру. У 1980 годзе ля свайго дома быў забіты Джон Ленан, у 2001 годзе ад рака памёр Джордж Харысан. Пол Макартні і Рынга Стар працягваюць займацца творчасцю і пішуць музыку.

Па дадзеных RIAA The Beatles займае першае месца ў спісе самых прадаваных груп у Злучаных Штатах, а колькасць іх прададзенага мэдыякантэнту перавышае 177 мільёнаў адзінак. Яны маюць найбольшую колькасць альбомаў, якія лідзіравалі ў брытанскіх чартах і прадалі больш песен на тэрыторыі Вялікабрытаніі, чым любая іншая група. У 2008 годзе The Beatles узначалілі спіс самых паспяховых артыстаў па версіі часопіса Billboard. У спіс іх узнагарод таксама ўваходзяць 10 прэмій Грэмі, прэмія Оскар за лепшую музыку да фільма і 15 узнагарод Айвара Навэла. Калектыў увайшоў у спіс 100 самых уплывовых людзей 20 стагоддзя па версіі часопіса Time, а агульны аб'ём продажаў адзінак мэдыякантэнту, звязанага з групай, ужо перавысіў адзін мільярд асобнікаў. У 2004 годзе часопіс Rolling Stone паставіў The Beatles на 1 месца ў спісе найвялікшых выканаўцаў усіх часоў.

Біяграфія[правіць | правіць зыходнік]

Вытокі (1956—1960)[правіць | правіць зыходнік]

Карані ансамблю вырастаюць з сярэдзіны 1950-х, эпохі рок-н-ролу, якая стварыла светапогляд і музычныя густы будучых Beatles. Увесну 1956 года Джон Ленан упершыню пачуў песню «Heartbreak Hotel» Элвіса Прэслі, якая, па яго словах, значыла канец яго папярэдняга жыцця (цікава адзначыць, што пачуты ім раней Біл Хейлі — самы папулярны выканаўца рок-н-ролу да Прэслі — не надта яго ўразіў). Да таго часу Джон граў на губным гармоніку і банджа, цяпер ён пачаў асвойваць гітару. У сакавіку 1957 года разам з таварышамі па ліверпульскай школе ён заснаваў гурт Quarrymen, названы так у гонар іх школы, Quarry Bank. Quarrymen гралі скіфл — брытанскі варыянт аматарскага рок-н-ролу — і стараліся быць падобнымі да тэддзі-бояў. Улетку 1957 года Ленан падчас аднаго з першых канцэртаў Quarrymen пазнаёміўся з 15-гадовым Полам МакКартні, які ўразіў Джона веданнем «акордаў» і «слоў» апошніх навінак рок-н-ролу (у прыватнасці, песні «Twenty-Flight Rock» Эдзі Кокрана) і тым, што той быў яўна больш развіты музычна (Пол таксама граў на трубе і фартэпіяна). Праз год да іх далучыўся сябар Пола, Джордж Харысан. Менавіта гэтыя трое сталі асноўным касцяком гурту, для астатніх жа ўдзельнікаў Quarrymen рок-н-рол быў часовым падросткавым захапленнем, і неўзабаве яны пакінулі калектыў.

Quarrymen перыядычна гралі на розных вечарынах, вяселлях, грамадскіх мерапрыемствах, да сапраўдных канцэртаў і запісаў справа не ішла (праўда, у 1958 годзе за свае грошы яны запісалі пласцінку з дзвюма песнямі); некалькі разоў удзельнікі разбягаліся (Харысан пэўны час меў свой гурт). Ленан і МакКартні, пачалі разам пісаць свае песні па прыкладзе сваіх куміраў Бадзі Холі і Эдзі Кокрана (тыя не толькі спявалі, але і самі гралі на гітарах і самі сачынялі песні, што было было дастаткова незвычайна на той час). Пры гэтым яны вырашылі даваць сваім песням падвойнае аўтарства, гэтаксама, як гэта рабілі амерыканскія аўтарскія калектывы кшталту Лейбера і Столера. Напрыканцы 1959 года ў гурт увайшоў малады мастак Сцюарт Саткліф, з якім Ленан разам вучыўся ў арт-каледжы. Саткліф не вельмі добра валодаў гульнёй на бас-гітары, і гэта неаднаразова выклікала раздражненне МакКартні. У такім выглядзе склад ансамбля аказаўся амаль што поўным: Джон Ленан (вакал, рытм-гітара), Пол МакКартні (вакал, піяніна, гітара), Джордж Харысан (лідар-гітара), Сцюарт Саткліф (бас-гітара), — аднак была праблема знайсці ўдарніка, што прымушала музыкантаў нават рабіць конкурсы на сцэне, каб запрасіць каго-небудзь з гледачоў пайграць на барабанах.

Гурт актыўна спрабаваў увайсці ў канцэртна-клубнае жыццё Ліверпуля. Адзін за адным праходзілі конкурсы таленту, але гурту ўвесь час не шанцавала. Такія больш сур'ёзныя мерапрыемствы прымусілі музыкантаў задумацца, ці падыходзіць сцэнічнае імя, бо да Quarry Bank ніхто з удзельнікаў ніякага дачынення ўжо не меў. Так, напрыклад, на мясцовым тэлевізійным конкурсе ў снежні 1959 года гурт выступіў пад назвай «Johnny and the Moondogs», якая змянялася на іншыя назвы падчас наступных концэртаў. Назва «Beatles» з'явілася праз некалькі месяцаў, у красавіку 1960 года. Нават сёння няма адназначнага адказу, хто ж прыдумаў гэтае слова. Як успаміналі ўдзельнікі гурту, аўтарамі неалагізму былі Саткліф і Ленан, якія хацелі прыдумаць назву, якая б мела адразу некалькі значэнняў. Напрыклад, гурт Бадзі Холі The Crickets («цвыркуны», аднак для англічан быў і другі сэнс — «крыкет»). Выбар выпаў на «beetles». Аднак проста слова Beetles («жукі») не мела ніякага дадатковага сэнсу; толькі замена «e» на «a» дала арыгінальнае слова: калі вымаўляць яго, то чулася «beetles», але ў надрукаваным выглядзе адразу заўважаўся корань «beat» (як біт-музыка). Прамоўтары знаходзілі імя занадта кароткім і «някідкім», таму музыкі былі прымушаныя спачатку змяняць сваю назву на афішах на больш рэкламную — «Long John and The Silver Beetles». Гурт атрымліваў усё больш і больш прапановаў выступіць — як правіла, у пабах і маленькіх клубах. У красавіку 1960 года Beatles паехалі ў сваё першае невялікае турнэ па Шатландыі ў якасці гурту Джонні Джэнтла. Майстэрства Beatles як музыкантаў хутка ўзрастала, і ўсё адно яны працягвалі заставацца адным з многіх нікому не вядомых рок-н-рольных гуртоў Ліверпула.

Прызнанне[правіць | правіць зыходнік]

Група атрымала сусветнае прызнанне ў 1963 годзе з моманту выпуску сінгла "Please Please Me/ Ask Me Why" і сваёй творчасцю дала пачатак глабальнай з'яве пад назвай бітламанія. Чацвёрка стала першай брытанскай групай, пласцінкі якой заваявалі папулярнасць і першыя месцы ў чартах ЗША, і з яе пачалося сусветнае прызнанне брытанскіх калектываў, а таксама "ліверпульскага" гучання рок-музыкі.

Спасылкі[правіць | правіць зыходнік]


Шаблон:Джон Ленан Шаблон:Пол Макартні Шаблон:Джордж Харысан Шаблон:Рынга Стар