Перайсці да зместу

Міхаіл Іосіфавіч Чахоўскі

Дадаць спасылкі
З Вікіпедыі, свабоднай энцыклапедыі
Міхаіл Іосіфавіч Чахоўскі
Дата нараджэння 1763
Дата смерці 1825
Працы і дасягненні
Працаваў у гарадах Мінск і інш.
Архітэктурны стыль класіцызм
У Вікіпедыі ёсць артыкулы пра іншых асоб з прозвішчам Чахоўскі.

Міхаіл Іосіфавіч Чахоўскі (1763 — пасля 1825(?)) — беларускі архітэктар. Прадстаўнік архітэктуры класіцызму. Аўтар праектаў пабудоў у Чэрвені, Мазыры, Вілейцы, Бабруйску, Слуцку, Пінску, Барысаве[1]. У 1805—1825 гадах працаваў мінскім губернскім архітэктарам[2]. Тытулярны саветнік.

Біяграфія

[правіць | правіць зыходнік]

У 1804—1831 гадах займаўся архітэктурнай практыкай у Мінску[3].

Пасля пажару 1809 года займаўся аднаўленнем будынка Троіцкага манастыра базыльянак, з прыбудовай да яго з усходу галерэі.

На заказ Мінскага дабрачыннага таварыства архітэктар М. Чахоўскі распрацаваў праект пабудовы на рыначным Траецкім пляцы комплексу касцёла і шпіталя сясцёр міласэрнасці. Гэты комплекс быў пабудаваны ў 1811 годзе. Дамінантай архітэктурнага ансамбля з’яўляўся велізарны касцёл у стылі ампір, па баках да якога прылягалі манастырскія карпусы[4].

У 1814 годзе распрацаваў праект новага каменнага касцёла Святой Тройцы, арыентаванага галоўным фасадам на вуліцу Траецкую, але на пабудову храма не хапіла сродкаў. Вядома, што на вуглу Аляксандраўскай і Траецкай быў збудавана аднапавярховы каменны будынак плябаніі з вялікім склепам і дзве невялікія крамы, а таксама драўляныя гаспадарчыя пабудовы[5].

М. Чахоўскі з’яўляецца верагодным аўтарам праекту мінскіх гандлёвых радоў, пабудаваных у 1810—1817 гадах.

У 1817—1825 гадах Мінскі губернскі архітэктар[3].

У 1819 годзе правёў рэканструкцыю мінскай ратушы, калі да яе паўднёва-ўсходняга фасада прыбудавалі арыгінальную агароджу, упрыгожаную ляпным дэкорам і маляўнічымі кампазіцыямі.

У 1824 годзе склаў праект рамонту і частковай рэканструкцыі Петрапаўлаўскай царквы ў Мінску[6].

Разам з Казімірам Хршчановічам кіраваў будаўніцтвам Пішчалаўскага замка[7].

М. Чахоўскі згадваецца, як губернскі архітэктар, яшчэ ў 1825 годзе, але яго далейшы лёс невядомы.

Творчасць

[правіць | правіць зыходнік]

Работы: праекты будынка ўрадавай установы і будынка павятовага і ніжняга земскага суда ў Чэрвені (1803—1806), флігеля для павятовага казначэйства ў Мазыры (1804), будаўніцтва духоўнай семінарыі (з А. Мельнікавым) і дома К. Шэмета па вул. Францысканскай у Мінску (1803), праекты будынкаў урадавай установы для Вілейкі, казначэйства і гараднічага праўлення для Бабруйска, 2-павярховага корпуса і 3 флігеляў для казначэйства і гараднічага праўлення ў Слуцку, дома гараднічага ў Пінску (усе 1806), моста цераз р. Свіслач у Мінску (1812), вайсковых пабудоў у Мінску і дваранскага дома ў Бабруйску (1814), корпуса ўрадавай установы і казначэйства ў Пінску і будынка ўрадавай установы з архівам і казначэйства ў Барысаве (1817), праект рамонту і частковай рэканструкцыі Кацярынінскай (Петрапаўлаўскай) царквы ў Мінску (1824)[3].

Зноскі

  1. ↑ 250 гадоў з дня нараджэння МІХАІЛА ІОСІФАВІЧА ЧАХОЎСКАГА
  2. ↑ Дойлідства Беларусі. Частка 1 (А-БЯРОЗА) Архівавана 18 лютага 2017.
  3. ↑ а б в Чахоўскі Міхаіл Іосіфавіч // Архітэктура Беларусі: Энцыклапедычны даведнік. — Мн.: БелЭн, 1993. — 620 с. — ISBN 5-85700-078-5.
  4. ↑ Сувораўскае ваеннае вучылішча Архівавана 13 верасня 2011.. // Сайт «Мінск стары і новы». (Праверана 14 снежня 2010).
  5. ↑ (бел.) Дзянісаў У. М. Першы касцёл // Памяць: Гісторыка-дакументальная хроніка Мінска. У 4 кн. Кн. 1-я. — Мн.: БЕЛТА, П15 2001. — С. 310.
  6. ↑ Чахоўскі Міхаіл Іосіфавіч
  7. ↑ Турэмныя вежы ня вытрымалі

Літаратура

[правіць | правіць зыходнік]
Узята з "https://be.wikipedia.org/w/index.php?title=Міхаіл_Іосіфавіч_Чахоўскі&oldid=4439542"