Vinsent

Vinsent
Асноўная інфармацыя
Поўнае імя	Дзмітрый Уладзіміравіч Папко
Дата нараджэння	3 кастрычніка 1988(1988-10-03) (35 гадоў)
Месца нараджэння	Івацэвічы, Івацэвіцкі раён, Брэсцкая вобласць, БССР, СССР
Краіна	Беларусь
Альма-матар	факультэт журналістыкі БДУ
Музычная дзейнасць
Прафесіі	спявак, акцёр, перакладчык
Гады актыўнасці	2009-па сённяшні дзень
Інструменты	вакал
Жанры	Хіп-хоп Рок
Медыяфайлы на Вікісховішчы

Vinsent (сапраўднае імя — Дзмітрый Уладзіміравіч Папко; нарадзіўся 3 кастрычніка 1988 года) — беларускі музыкант і акцёр.

Творчы шлях

Музыка

У 2009 годзе артыст выдаў дэбютны альбом «Пачатак». Пасля выдання адбылася прэзентацыя альбома. Пасля выдання дэбютнага альбома былі знятыя відэакліпы на дзве песні з дыска: «Працягваю жыць» і «Восеньскі вальс». Неўзабаве пасля выдання альбома, артыст пачаў канцэртаваць па гарадах Беларусі. Кліп на песню «Восеньскі вальс», зняты Змітром Карначыкам і Алесем Меліхаўцом, атрымаў узнагароды «Street Awards» і «Кліп-марафон» за найлепшы кліп года.

У 2010 годзе Vinsent выдае сінгл «Слава Героям!», напісаны па матывах рамана Уладзіміра Караткевіча «Каласы пад сярпом тваім». Героямі песні з’яўляюцца Алесь Загорскі і Кастусь Каліноўскі. Тэкст пабудаваны ў выглядзе перапіскі паміж героямі.

З 2011 года артыст выступае з жывым складам музыкаў. Пачынае эксперыментаваць, змешваючы хіп-хоп з рокам і джазам. Vinsent гастралюе па міжанародных фестывалях у Беларусі, Польшчы, Літве, Украіне.

У 2011 годзе выходзіць «Жывы DVD». Аснову DVD складае новае відэа, зробленае на клубных канцэртах, а таксама справаздачы з міжнародных фестываляў. У дадатак да гэтага дыск змяшчае канцэртныя аўдыёзапісы, інтэрв’ю, сумесныя трэкі, тэксты ды фотаздымкі.

У 2012 годзе Vinsent выдае сінгл і кліп «Ні кроку назад», які з’яўляецца саўндтрэкам да фільма «Вышэй за неба».

Vinsent мае сумесныя працы: сінгл «Развага» (2010) з гуртом :B:N:, сінгл «Дай сілы!» (2011) з гуртом IQ48.

У 2015 годзе выдаецца новы альбом «Vir», які змяшчаў 10 новых трэкаў. На песню «Жывы» быў зняты кліп.

У кастрычніку 2017 года музыка прыняў удзел у складанцы (Не) расстраляная паэзія, запісаўшы песню «Метрапалітэн». Тэкст песні быў напісаны на аснове верша забітага ў 1937 годзе беларускага паэта Зямы Піваварава.

Кіно

У 2013 годзе адбылася прэм’ера фільма «Жыве Беларусь», у якім акцёр Дзмітрый «Вінсэнт» Папко сыграў галоўную ролю Мірона Захаркі.

У 2013 годзе адбылася прэм’ера фільма «Вышэй за неба», у якім акцёр Дзмітрый «Вінсэнт» Папко сыграў ролю Макса. Ідэйным натхняльнікам і сурэжысёрам фільма з’яўляецца драматург Андрэй Курэйчык.

Дыскаграфія

Альбомы

• «Пачатак» (2009)
• «Vir» (2015)

DVD і кампіляцыі

• «Жывы DVD» (2011)

EP і сінглы

• «Слава Героям!» (2010)
• «Веру» (2010)
• «Ні кроку назад» (2012)
• «Ток» (2013)
• «Жывы» (2015)
• «Не пакіну» (2020)
• «Космас» (2021)
• «Не заўжды» (2023)

Сінглы ў супрацы з іншымі выканаўцамі

• «Развага», сумесна з гуртом :B:N: (2010)
• «Дай сілы!», сумесна з гуртом IQ48 (2011)

Відэакліпы

• «Працягваю жыць» (2009)
• «Восеньскі вальс» (2010)
• «Ні кроку назад» (2012)
• «Жывы» (2015)
• «Не заўжды» (2023)

Фільмаграфія

• «Жыве Беларусь» (2013) — Мірон Захарка
• «Вышэй за неба» (2013) — Макс