Першы Кантынентальны Кангрэс

Першы Кантынентальны Кангрэс быў з'ездам дэлегатаў 12 калоній (акрамя Джорджыі, Канадскіх калоній, Багамскіх астравоў і некаторых іншых уладанняў Кароны, якія атрымалі запрашэнне на Кангрэс, але вырашылі не адпраўляць дэлегатаў) Вялікабрытаніі, які пачаў паседжанне 5 верасня 1774 г. ў Карпентэрз-Холе ў Філадэльфіі, Пенсільванія пасля ўвядзення Брытанскім урадам невыносных законаў. Мэта апошніх была, сярод іншага, прымусіць улады горада Бостана i калоніі Масачусэтс пакараць удзельнікаў акцыі "Бостанскае чаяпіцце".

Карпентэрз-Хол

На Кангрэс прыехала 56 дэлегатаў. Кожная калонія паслала не меньш за 2-х прадстаўнікоў; больш усяго дэлегатаў прыслалі калоніі Нью Ёрк (9 чал.), Пенсільванія (8 чал.) і Вірджынія (6 чал.). Яны абмеркавалі шэраг пытанняў, сярод якіх быў байкот англійскіх тавараў як адказ на невыносныя законы, таксама былі разгледжаны парушэнні правоў каланістаў з боку брытанскай каланіяльнай адміністрацыі; ад імя Кангрэса каралю Георгу III была зроблена заява аб неабходнасці справядлівага ўрэгулявання склаўшыхся праблем і адмены непапулярных заканадаўчых актаў супраць каланістаў.

У выпадку ігнаравання прапановаў 1-га Кангрэса меркавалася скліканне Другога Кантынентальнага Кангрэса. 2-і Кангрэс пачаў працаваць у маі 1775 г.

Праца Кангрэса і яе вынікі

1-ы Кангрэс працаваў з 5 верасня па 26 кастрычніка 1774 г. Спачатку старшынёй паседжанняў быў Пейтан Рэндальф, а з 22 па 26 кастрычніка - Генры Мідлтан. Сакратаром Кангрэса быў абраны Чарльз Томсан.

Сярод дэлегатаў Кангрэса не было адзінай думкі наконт будучага калоній. Напрыклад, Патрык Генры выступаў за стварэнне незалежнага ад Брытаніі ўрада, а некаторыя іншыя дэлегаты прапанавалі кампрамісныя варыянты ўрэгулявання адносін з метраполіяй. З аднаго боку было вырашана аб'явіць байкот англійскім таварам з 1 снежня 1774 г. і фарміраваць атрады апаўчэнцаў для абароны калоній ад магчымых рэпрэсій метраполіі, з другога дэлегаты Кангрэса рабілі спробы дамовіцца з каралём, што сведчыла аб жаданні большасці з іх пазбегнуць грамадзянскай вайны і канчатковага аддзялення калоній ад Брытаніі. Байкот брытанскіх тавараў прынёс некаторую шкоду эканоміке метраполіі, але не дасягнуў сваёй мэты - дабіцца адмены невыносных законаў. Але вынікам паседжання Першага Кангрэса стала таксама рашэнне склікаць Другі Кантынентальны Кангрэс, які аб'явіў сябе рэвалюцыйным урадам паўстаўшых калоній і даў назву парламенту ЗША.

Спіс дэлегатаў ад кожнай калоніі

• Нью Гэмпшыр: Натэніэл Фолсам, Джон Саліван;
• Масачусэтс: Джон Адамс, Самюэль Адамс, Томас Кушынг, Роберт Пейн;
• Род Айлэнд: Стывен Хопкінс, Самюэль Уорд;
• Канэктыкут: Сілас Дін, Эліфалет Дайер, Роджэр Шэрман;
• Нью-Ёрк: Джэймс Дуэйн, Джон Джэй, Філіп Лівінгстан, Айзек Лоў, Саймон Берэм, Джон Харынг, Генры Ўішэр, Уільям Флойд, Джон Алсап;
• Нью-Джэрсі: Стывен Крэйн, Джон дэ Харт, Джэймс Кінслі, Уільям Лівінгстан, Рычард Сміт;
• Пенсільванія: Эдвард Бідл, Джон Дыкінсан, Джозеф Галоўэй, Чарльз Хамфрыз, Томас Міфін, Джон Мортан, Самюэль Роўдз, Джордж Рос;
• Дэлавэр: Томас МакКін, Джордж Рыд, Сізар Родні;
• Мерылэнд: Самюэль Чэйз, Роберт Гоўлдзбара, Томас Джонсан, Уільям Пака, Мэт'ю Цілгмэн;
• Вірджынія: Рычард Бланд, Бенджамін Харысан, Патрык Генры, Патрык Генры Лі, Эдмунд Пендлтан; Джордж Вашынгтон;
• Паўночная Караліна: Рычард Касвэл, Джозеф Хьюэс, Уільям Хупер;
• Паўднёвая Караліна: Крыстафер Гадздэн, Томас Лінч малодшы, Генры Мідлтан, Эдвард Рутледж, Джон Рутледж.

Дакументы Кангрэса

• Full text of Journals of the Continental Congress, 1774-1789 (Пратаколы паседжанняў Кантынентальнага Кангрэса на англ. мове)
• Papers of the Continental Congress (Digitized Original Documents) (Дакументы Кантынентальнага Кангрэса, алічбаваныя тэксты арыгінальных дакументаў)