Добраахвотнае таварыства садзейнічання арміі, авіяцыі і флоту
Добраахвотнае таварыства садзейнічання арміі, авіяцыі і флоту (ДТСААФ) (ад руск.: Добровольное общество содействия армии, авиации и флоту (ДОСААФ)), Добраахвотнае таварыства садзейнічанню арміі, авіяцыі і флоту — добраахвотнае таварыства, якое ставіць сваёй мэтай дзейнасць па падрыхтоўцы грамадзян да вайсковай службы, падрыхтоўцы спецыялістаў для Узброеных Сіл, іншых войскаў і ваенных фарміраванняў Рэспублікі Беларусь, кадраў масавых тэхнічных прафесій.
Арганізацыямі ДТСААФ штогод рыхтуецца каля 50 тысяч спецыялістаў масавых тэхнічных прафесій, якія маюць ваенна-прыкладнае значэнне (у тым ліку да 40% усіх кіроўцаў у Рэспубліцы Беларусь), да 2 тыс. кіроўцаў для Узброеных Сіл, іншых войскаў і ваенных фарміраванняў.
На базе аэраклубаў ДТСААФ падрыхтоўваюцца курсанты авіяцыйнага факультэта Ваеннай акадэміі Рэспублікі Беларусь.
Гісторыя
[правіць | правіць зыходнік]5 красавіка 1922 на тэрыторыі Беларусі быў створаны ВНК (ваенна-навуковы клуб) Мінскага гарнізона, яго кіраўніком стаў народны камісар па ваенных справах БССР Адамовіч І.А. Праз год быў створаны ВНК Заходняга фронту, працу клуба ўзначаліў камандуючы Заходнім фронтам Тухачэўскі М.Н, а таксама ТДПФ (Таварыства сяброў паветранага флоту), кіраўнік – старшыня ЦВК і СНК БССР Чарвякоў А.Г.
Пасля стварэння ДАБРАХІМа (Добраахвотнае таварыства сяброў хімічнай прамысловасці, старшыня Адамовіч І.А.) у 1924, у наступным годзе адбылося аб'яднанне ТДПФ і ДАБРАХІМа ў адно таварыства АВІЯХІМ БССР (Таварыства сяброў авіяцыйнай і хімічнай прамысловасці), якое ўзначаліў той жа І. А. Адамовіч. У 1926 ЦК КП(б)Б зацвердзіла Савет ТСА БССР (Таварыства садзейнічання абароне).
28 лютага 1927 аб'яднаны Пленум Цэнтральнага Савета Авіяхіма БССР і Таварыства садзейнічання абароне (ТСА) прыняў Пастанову аб стварэнні ТСААВІЯХІМА БССР (Саюз таварыстваў сяброў абароны і авіяцыйна-хімічнага будаўніцтва). Гэта дата лічыцца днём утварэння абароннага таварыства Беларусі.
У маі 1948 ТСААВІЯХІМ быў падзелены на тры абаронныя таварыствы: Добраахвотнае таварыства садзейнічання арміі (ДТСАРМ), Добраахвотнае таварыства садзейнічанню авіяцыі (ДТСАВ), Добраахвотнае таварыства садзейнічанню флоту (ДТСФЛОТ); аднак у верасні 1951 ДТСАРМ, ДТСАВ, ДТСФЛОТ былі аб'яднаны ў адзіную арганізацыю – Добраахвотнае таварыства садзейнічання арміі, авіяцыі і флоту (ДТСААФ) БССР.
У 1991 ДТСААФ БССР ператвораны са структурнага падраздзялення ДТСААФ СССР у самастойнае грамадскае аб'яднанне Беларускае абароннае спартыўна-тэхнічнае таварыства (БЕЛАСТТ), а ў 2003 БЕЛАСТТ ператворана ў рэспубліканскае дзяржаўна-грамадскае аб'яднанне «Добраахвотнае таварыства садзейнічання арміі, авіяцыі і флоту Рэспублікі Беларусь» (ДТСААФ).
Дзейнасць
[правіць | правіць зыходнік]У наш час ДТСААФ культывуе каля 20 відаў спорту, пачынаючы ад падводнага, аўтамотаспорту і канчаючы ўсімі відамі авіяцыйнага і ваенна-прыкладнага спорту:
- авіямадэльны спорт,
- аўтамабільны спорт
- аўтамадэльны спорт
- верталётны спорт
- водна-маторны спорт
- веславанне на ялах
- матацыклетны спорт
- парашутны спорт
- планёрны спорт
- падводны спорт
- радыёспорт
- ракетамадэльны спорт
- самалётны спорт
- суднамадэльны спорт
- кулявая стральба (у рамках ДТСААФ).
Абароннае таварыства штогод праводзіць больш за 80 чэмпіянатаў, першынстваў і рэспубліканскіх спаборніцтваў. За апошнія пяць гадоў спартсмены ДТСААФ удзельнічалі больш за ў 100 чэмпіянатах свету і Еўропы.
Літаратура
[правіць | правіць зыходнік]- Беларуская энцыклапедыя: У 18 т. Т. 2: Аршыца — Беларусцы / Рэдкал.: Г. П. Пашкоў і інш. — Мн. : БелЭн, 1996. — Т. 2. — 480 с. — 10 000 экз. — ISBN 985-11-0035-8. — ISBN 985-11-0061-7 (т. 2).
Спасылкі
[правіць | правіць зыходнік]- Афіцыйны сайт (руск.) Архівавана 5 чэрвеня 2020.
Слоўнікі і энцыклапедыі | |
|---|---|
| Нарматыўны кантроль |
