Міхась Лазарук

Міхась Лазарук
Міхась Лазарук
Дата нараджэння	5 ліпеня 1926
Месца нараджэння	Ушаловічы, Бокшыцкі сельсавет, Слуцкі раён, Слуцкая акруга, БССР, СССР;
Дата смерці	15 лістапада 2000 (74 гады)
Месца смерці	Мінск, Беларусь;
Грамадзянства	БССР; Беларусь;
Род дзейнасці	навуковец, літаратурны крытык
Навуковая сфера	літаратуразнаўства
Месца працы	БДПУ; Варшаўскі ўніверсітэт;
Навуковая ступень	доктар філалагічных навук (1970)
Навуковае званне	прафесар (1971);
Альма-матар	БДПУ;
Член у	Саюз пісьменнікаў СССР;
Узнагароды

Міхась Лазарук (Міхаіл Арсеньевіч Лазарук; 5 ліпеня 1926, вёска Ушаловічы, Слуцкі раён — 14 лістапада 2000, Мінск) — беларускі літаратуразнавец, крытык, педагог. Акадэмік Акадэмія педагагічных навук СССР (1982), замежны член Расійскай акадэміі адукацыі. Доктар філалагічных навук (1970), прафесар (1971).

Біяграфія

Нарадзіўся 5 ліпеня 1926 года ў в. Ушаловічы Слуцкага раёна ў сялянскай сям’і.

Пасля вызвалення Случчыны ад нацысцкіх захопнікаў у 1944 годзе прызваны ў Чырвоную Армію. Дайшоў да Берліна. У 1951 годзе скончыў філалагічны факультэт Мінскага педагагічнага інстытута і паступіў у аспірантуру пры гэтым інстытуце. Пасля заканчэння аспірантуры (1954) — выкладчык, потым дацэнт кафедры беларускай літаратуры, з 1968 года — дэкан філалагічнага факультэта, з 1971 года — прарэктар Мінскага педінстытута. Паўтара года (1959—1960) працаваў на кафедры беларускай філалогіі Варшаўскага ўніверсітэта. У 1978 годзе прызначаны дырэктарам навукова-даследчага Інстытута педагогікі Міністэрства народнай адукацыі БССР.

Памёр 14 лістапада 2000 года ў Мінску.

Навуковая дзейнасць

Выступаў у друку з крытычнымі і літаратуразнаўчымі артыкуламі з 1949 г. Аўтар даследаванняў і манаграфій «Пімен Панчанка» (1959), «Пытанні тэорыі літаратуры» (з А. Ленсу, 1964), «Станаўленне беларускай паэмы» (1968), «Беларуская паэма ў другой палавіне XIX — пачатку XX стагоддзя» (1970), зборніка крытычных артыкулаў «Часу непадуладнае» (1981), навучальных дапаможнікаў і падручнікаў для філалагічных факультэтаў ВНУ «Уводзіны ў літаратуразнаўства» (з А. Ленсу, 1970, 2-е выданне, 1982), падручніка для 9 класа «Беларуская літаратура ў школе» (з В.Івашыным, 1979, 8-е выданне, 1990), дапаможнікаў «Тэорыя літаратуры» (1967, 2-е выданне, 1971), «Слоўніка літаратуразнаўчых тэрмінаў» (з А.Ленсу, 1983). Адзін з аўтараў «Гісторыі беларускай літаратуры» (ч. 1-2, 1981, ч. 3, 1983, ч. 4, 1985), працы «Изучение русской литературы во взаимосвязи с белорусской» (1988).

Працы

Артыкулы ў энцыклапедыях, слоўніках і даведніках

«Вясна гола перапала» // Беларуская энцыклапедыя: У 18 т. Т. 4: Варанецкі — Гальфстрым / Рэдкал.: Г. П. Пашкоў і інш. — Мн. : БелЭн, 1997. — Т. 4. — С. 402. — 10 000 экз. — ISBN 985-11-0035-8. — ISBN 985-11-0090-0 (т. 4).

Узнагароды

Зноскі

Літаратура

Міхась Лазарук // Беларускія пісьменнікі: Біябібліяграфічны слоўнік. У 6 т. / пад рэд. А. І. Мальдзіса. — Мн.: Беларуская Энцыклапедыя, 1992—1995.
Лазарук Міхаіл Арсенавіч // Беларусь: энцыклапедычны даведнік / Рэдкал. Б. І. Сачанка (гал. рэд.) і інш.; Маст. М. В. Драко, А. М. Хількевіч. — Мн.: БелЭн, 1995. — С. 416. — 800 с. — 5 000 экз. — ISBN 985-11-0026-9.

Спасылкі

Міхась Лазарук у базе даных «История белорусской науки в лицах» Цэнтральнай навуковай бібліятэкі імя Якуба Коласа НАН Беларусі (руск.)