Адміністрацыйны падзел Іспаніі

Іспанія з'яўляецца ўнітарнай дзяржавай. Аднак Краіна Баскаў і Каталонія маюць шырокую аўтаномію.

Асноўнай адміністрацыйна-тэрытарыяльнай адзінкай у Іспаніі з'яўляецца аўтаномная супольнасць (ісп.: comunidad autónoma; часам у беларускіх тэкстах выкарыстоўваецца тэрмін аўтаномная вобласць). У наш час у краіне налічваецца 17 аўтаномных супольнасцяў. Утварэнне аўтаномных супольнасцяў прадугледжана Канстытуцыяй 1978 года, (у прыватнасці артыкул 152.1 устанаўлівае істытуцыянальную аснову гэтых аўтаномных супольнасцяў - Заканадаўчая Асамблея, абіраная ўсеагульным галасаваннем, Савет Урада з выканаўчымі функцыямі і Старшыня аўтаномнай супольнасці, абіраны Заканадаўчай Асамблеяй), іх межы, як правіла, супадаюць з межамі правінцый, якія ўваходзяць у гістарычныя вобласці, хоць некаторыя рэгіёны сталі развіваць сваю ідэнтычнасць толькі пасля пераходу да дэмакратыі (прыклады — Мадрыд, Рыёха). Аўтаномныя супольнасці маюць уласныя статуты; урады супольнасцяў падзяляюць уладу з цэнтральным урадам. Прадстаўнічымі органамі аўтаномных супольнасцяў з'яўляецца парламенты (Parlamento), у Астурыі — генеральная ўправа (Junta General), у Мурсіі, Эстрэмадуры і Мадрыдзе — сходы (Asamblea), у Арагоне, Кастыліі-ла-Манчы, Кастыліі-і-Леоне і Валенсіі — палаты (cortes), выканаўчымі органамі — урады (Gobierno), у Галісіі, Эстрэмадуры, Кастыліі-ла-Манчы, Кастыліі-і-Леоне — управы (Junta), у Арагоне і Навары — дэпутацыі (Diputación), у Андалусіі, Астурыі і Валенсіі — саветы (Consejo), кожны з гэтых выканаўчых органаў складаецца са старшыні (Presidente) і саветнікаў (Consejero).

У сваю чаргу аўтаномныя супольнасці падзяляюцца на правінцыі (provincias) — іх налічваецца 50, плюс два так званых аўтаномных горада (ciudades autónomas) у Афрыцы — Сеўту і Мелілью. Прадстаўнічымі органамі правінцый з'яўляюцца правінцыйныя дэпутацыі (Diputación provincial), выканаўчымі органамі — управы ўрада (Junta de Gobierno), кожная з якіх складаецца са старшыні (Presidente) і вакалаў (Vocal).

Правінцыі падзяляюцца на камаркі, а камаркі, у сваю чаргу, падзяляюцца на муніцыпіі (аж да асобных паселішчаў і нават кварталаў у рамках населеных пунктаў). Прадстаўнічым органам муніцыпія з'яўляецца — аюнтам'ента (Ayuntamiento), выканаўчым — управа мясцовага ўрада (Junta de Gobierno Local), кожная з якіх складаецца з алькальда (alcalde) і вакалаў (Vocal)

Аўтаномныя супольнасці Іспаніі і іх сталіцы

№	Рэгіён	Адміністрацыйны цэнтр	Плошча км²	Насельніцтва 2011	Сцяг рэгіёна
1	Андалусія	Севілья	87 268	8 424 102
2	Арагон	Сарагоса	47 719	1 346 293
3	Астурыя	Аўеда	10 604	1 081 487
4	Балеарскія астравы	Пальма-дэ-Малёрка	4 992	1 113 114
5	Валенсія	Валенсія	23 255	5 117 190
6	Галісія	Сант'яга-дэ-Кампастэла	29 574	2 795 422
7	Канарскія астравы	Лас-Пальмас-дэ-Гран-Канарыя, Санта-Крус-дэ-Тэнэрыфэ	7 447	2 126 769
8	Кантабрыя	Сантандэр	5 321	593 121
9	Кастылія — Ла-Манча	Таледа	79 463	2 115 334
10	Кастылія і Леон	Вальядалід	94 223	2 558 463
11	Каталонія	Барселона	32 114	7 539 618
12	Мадрыд	Мадрыд	8 028	6 489 680
13	Мурсія	Мурсія	11 313	1 470 069
14	Навара	Памплона	10 391	642 051
15	Рыёха	Лагроньё	5 045	322 955
16	Краіна Баскаў	Віторыя	7 234	2 184 606
17	Эстрэмадура	Мерыда	41 634	1 109 367
	Усяго		505 625	47 029 641