Валянцін Віктаравіч Волкаў
Валянцін Віктаравіч Волкаў | |
---|---|
Дата нараджэння | 19 красавіка 1881 |
Месца нараджэння | г. Ялец Арлоўская губерня, Расійская імперыя |
Дата смерці | 8 лістапада 1964 (83 гады) |
Месца смерці | Мінск |
Грамадзянства | Расійская імперыя → |
Дзеці | Анатоль Валянцінавіч Волкаў |
Род дзейнасці | мастак |
Месца працы | |
Жанр | тэматычная карціна, партрэт, пейзаж, нацюрморт |
Вучоба | Пензенскае мастацкае вучылішча |
Вядомыя працы | «Мінск 3-га ліпеня 1944 года», Выява герба БССР |
Уплыў на | Уладзімір Сакалоў, Валянцін Дзежыц |
Член у | |
Узнагароды | |
Медыяфайлы на Вікісховішчы |
Валянцін Віктаравіч Волкаў (7 (19) красавіка 1881, г. Ялец Арлоўскай губерні, цяпер Ліпецкая вобласць, Расія — 8 лістапада 1964, г. Мінск) — беларускі жывапісец, народны мастак БССР (1955), прафесар (1957). Аўтар малюнка герба БССР[1].
Біяграфія
Сям'я і дзяцінства
Валянцін Волкаў паходзіў з сям'і рускіх мастакоў Арлоўскай губерні. Дзед быў першым прафесійным мастаком. Ён быў прыгонным, гаспадар аддаў яго ў вучылішча жывапісу і скульптуры, але пан за некалькі месяцаў да заканчэння вучэння забраў яго з вучэльні, каб не даваць яму вольную. Бацька яго таксама быў прафесійным мастаком жанрыстам і партрэтыстам ў Яльцы. З самага дзяцінства ён рос сярод карцін і мастакоў, альбом не пакідаў яго рук, у ім былі накіды, копіі.
Валянцін Волкаў — бацька Анатоля Волкава і дзед Сяргея Волкава, таксама мастакоў.
Адукацыя
Вучыўся ў Пензенскім мастацкім вучылішчы (1901—1907) у К. А. Савіцкага, А. Ф. Афанасьева , Вышэйшым мастацкім вучылішчы пры Імператарскай Акадэміі мастацтваў (Санкт-Пецярбург, 1907—1915) у В. Я. Савінскага , П. П. Чысцякова[1].
Сталае жыццё
Удзельнік выставак з 1903 года. Удзельнічаў у рэвалюцыйных падзеях 1905 года ў Маскве[1].
Жыў на Беларусі з 1919[1], у Мінску з 1929 года.
Выкладаў у Веліжскай народнай мастацкай школе і Педагагічным інстытуце (1919—1923), Віцебскім мастацкім тэхнікуме (1923—1929), кіраваў мастацкай студыяй Саюза архітэктараў БССР (Мінск, 1933—1935), мастацкай студыяй юных талентаў пры Доме народнай творчасці (Мінск, 1935—1941), выкладаў у Мінскім мастацкім вучылішчы (1947—1949), Беларускім дзяржаўным тэатральна-мастацкім інстытуце (1953—1964), з 1961 года — загадчык кафедры малюнка. Прафесар (1957)[1].
Сябра «Общества независимых» (Санкт-Пецярбург, 1911—1913), камітэта «Художественно-артистической ассоциации» (Санкт-Пецярбург, 1912), «Общины художников » (Санкт-Пецярбург, 1914—1920), Віцебскага філіяла Усебеларускай асацыяцыі мастакоў (1927—1929). Сябра Саюза савецкіх мастакоў БССР (з 1940).
Творчасць
Працаваў у жанрах тэматычнай карціны, пісаў пейзажы, нацюрморты. Удзельнічаў у выстаўках з 1903 года.
У 1918 годзе ў Петраградзе ён займаўся убраннем горада да 1-й гадавіны Кастрычніцкай рэвалюцыі (эскізы пано «Уся ўлада Саветам», «Штурм Зімняга»). Эскізы гэтага свята знаходзяцца ў Дзяржаўным рускім музеі.
Адзін з першых беларускіх жывапісцаў стварыў вобраз У. І. Леніна («Партрэт У. І Леніна», 1926)[1]. У 1926 годзе ён удзельнічаў у конкурсе стварэння герба БССР і перамог у ім. Таксама з'яўляецца аўтарам выявы герба БССР 1938 года[1].
У 1920-30-я гады стварыў шэраг манументальных твораў-пано: «Індустрыялізацыя», «Калектывізацыя» (абодва ў 1930) для мытні на станцыі Негарэлае, дэкаратыўны фрыз «Кастрычнік на Беларусі» для павільёна БССР на Усесаюзнай сельскагаспадарчай выстаўцы ў Маскве (1939)[1].
Ілюстраваў і аформіў шэраг кніг для Дзяржаўнага выдавецтва БССР (1928—1941). Стварыў сюжэтна-тэматычныя карціны, прысведчаныя гістарычнаму мінуламу Беларусі, грамадзянскай вайне ў Расіі і Вялікай Айчыннай вайне, сучаснасці.
Творам Волкава ўласцівы рэалізм вобразаў, складанасць кампазіцыйных пабудоў, у якіх адчуваецца ўплыў традыцый акадэмічнай школы, стрыманая каляровая гама, дакладнасць дэталей. Сярод работ «Кастусь Каліноўскі» (1923), «Барыкады» (1923), «Малатабоец» (1926), «Партызаны» (1928), «Мінск 3 ліпеня 1944 года», «Студэнты» і інш. У партрэтным жанры прадаўжаў традыцыі псіхалагічнага партрэта рускага рэалістычнага мастацтва 2-й паловы 19 ст. Імкнуўся да глыбокага пранікнення ў характар людзей, адлюстравання іх грамадзянскай значнасці. Сярод лепшых твораў: партрэты М. Багдановіча (1927), мастака М. Гусева (1950), М. Горкага (1951), партрэты дзеячаў тэатра імя Я. Купалы, партрэт хірурга Ю. Лося і інш[1]. Шырокую вядомасць атрымала яго велізарная кампазіцыя «Мінск 3-га ліпеня 1944 года».
Спадчына В. В. Волкава мае значную каштоўнасць: партрэты, пейзажы, эскізныя малюнкі карцін, дзе ён поруч з глыбокім псіхалагічным вобразам прадэманстраваў дасканалае валоданне пластычнай формай, тонкі густ у выкарыстанні фактурных магчымасцей алоўкавага штрыха («Трактарыстка» (1956), партрэт хірурга Р. Р. Чарковай (1960) і інш.).
Зноскі
Літаратура
Валянцін Віктаравіч Волкаў у Вікікрыніцах | |
Валянцін Віктаравіч Волкаў на Вікісховішчы |
- Беларускі саюз мастакоў, 1938—1998: энцыкл. давед. — Мн., 1998.
- Элентух И. Б. Валентин Викторович Волков. — М., 1956.
Спасылкі
- Нарадзіліся 19 красавіка
- Нарадзіліся ў 1881 годзе
- Асобы
- Нарадзіліся ў Арлоўскай губерні
- Памерлі 8 лістапада
- Памерлі ў 1964 годзе
- Памерлі ў Мінску
- Выкладчыкі Мінскага дзяржаўнага мастацкага каледжа імя А. К. Глебава
- Выкладчыкі Беларускай акадэміі мастацтваў
- Члены Беларускага саюза мастакоў
- Кавалеры ордэна «Знак Пашаны»
- Мастакі паводле алфавіта
- Мастакі Беларусі
- Народныя мастакі Беларускай ССР
- Мастакі-ілюстратары Беларусі
- Выпускнікі Пензенскага мастацкага вучылішча
- Выпускнікі Імператарскай Акадэміі мастацтваў
- Выкладчыкі Віцебскага Народнага мастацкага вучылішча
- Нарадзіліся ў Ліпецкай вобласці