Рымдзюны

Аграгарадок Рымдзюны Краіна Беларусь Вобласць Гродзенская Раён Астравецкі Сельсавет Гервяцкі Каардынаты 54°39′44″ пн. ш. 26°13′01″ у. д. Насельніцтва 262 чалавекі (2014) Часавы пояс UTC+3 Тэлефонны код +375 1591 Паштовыя індэксы 231214 Аўтамабільны код 4 Рымдзюны на карце Беларусі ±

Рымдзюны на Вікісховішчы

Рымдзю́ны (трансліт.: Rymdziuny, руск.: Рымдюны, літ.: Rimdžiūnai) — аграгарадок у Астравецкім раёне Гродзенскай вобласці Беларусі. Уваходзіць у склад Гервяцкага сельсавета.

У 1940—1964 гадах цэнтр Рымдзюнскага сельсавета.

Назва

Назва Рымдзюнаў балцка-літоўскага паходжання, ад антрапоніма (імя) з асновай Rimd-, якую ўтрымліваюць у сабе сучасныя літоўскія антрапонімы Rimdžiūnas, Rimdžius, Rimdeika. Далей гэтая аснова звязаная з літ.: rimti «спакайнець».

Геаграфія

Знаходзіцца за 30 км у напрамку на паўночны ўсход ад горада Астравец, за 250 км ад Гродна, за 14 км ад чыгуначнай станцыі Солы. Каля аграгарадка працякае рака Ашмянка.

Насельніцтва

• 2001 год — 288 жыхароў, 110 двароў.

Літоўскае насельніцтва

Рымдзюны адносяцца да Гервяцкага краю (літ.: Gervėčių kraštas), дзе да сёння захоўваецца літоўская мова ў жывым бытаванні.

У 1918—1925 гадах у Рымдзюнах дзейнічала пачатковая школа літоўскага асветніцкага таварыства Віленскага краю «Рытас», у 1933—1936 гадах — літоўская чытальня. Абедзве гэтыя ўстановы былі закрытыя польскімі ўладамі.

У 1994 годзе за сродкі Літоўскай Рэспублікі ў Рымдзюнах быў пабудаваны Літоўскі культурны, асветны і інфармацыйны цэнтр. У ім была заснаваная Рымдзюнская літоўская сярэдняя школа, дзейнічаў дзіцячы садок, інтэрнат для навучэнцаў і настаўнікаў (некаторыя настаўнікі ездзілі з Літвы).

У 2022 годзе літоўская школа была закрыта ўладамі Беларусі. Афіцыйнай падставай для гэтага стала тое, што, паводле зменаў у Кодэкс аб адукацыі РБ, з 1 верасня 2022 года ў Беларусі мовамі школьнага навучання з’яўляюцца толькі руская і беларуская. 12 жніўня 2022 года Міністэрства замежных спраў Літвы заявіла пасольству Беларусі ў Літве афіцыйную ноту з нагоды закрыцця літоўскіх школ у Беларусі.

Літаратура

• Рымдзюны // Беларуская энцыклапедыя: У 18 т. Т. 13: Праміле — Рэлаксін / Рэдкал.: Г. П. Пашкоў і інш. — Мн. : БелЭн, 2001. — Т. 13. — С. 509. — 10 000 экз. — ISBN 985-11-0035-8. — ISBN 985-11-0216-4 (т. 13).

Спасылкі

• На Вікісховішчы ёсць медыяфайлы па тэме Рымдзюны