Давід Рыгоравіч Сімановіч

Давід Рыгоравіч Сімановіч
Асабістыя звесткі
Дата нараджэння	26 чэрвеня 1932(1932-06-26)
Месца нараджэння	Нароўля, Нараўлянскі раён, Беларусь
Дата смерці	9 мая 2014(2014-05-09) (81 год)
Месца смерці	Віцебск, Віцебская вобласць, Беларусь
Пахаванне	Стара-Уланавіцкія могілкі[d]
Грамадзянства	СССР  Беларусь
Альма-матар	філалагічны факультэт БДУ
Месца працы	Віцебскі рабочы
Прафесійная дзейнасць
Род дзейнасці	перакладчык, паэт
Узнагароды

Давід Рыгоравіч Сімано́віч (26 чэрвеня 1932, Нароўля, Гомельская вобласць — 9 мая 2014, Віцебск) — беларускі паэт, перакладчык, сцэнарыст.

Біяграфія

Нарадзіўся 26 чэрвеня 1932 г. у Нароўлі ў яўрэйскай сям’і лесанарыхтоўшчыка Гірша Маісеевіча Сімановіча і яго жонкі Годы Давідаўны, правізара аптэкі ў мястэчку Нароўля. Дзед Давіда Сімановіча — Давід Гарадзецкі, купец 3-й гільдыі, пахаваны на яўрэйскіх могілках у Нароўлі.

Скончыў філалагічны факультэт Беларускага дзяржаўнага ўніверсітэта (1955).

Працаваў настаўнікам у сельскай школе (1955—1959), быў супрацоўнікам газет «Прыпяцкая праўда», «Віцебскі рабочы» (1959—1961) і віцебскага тэлерадыёкамітэта (1961—1971), кіраўніком Віцебскага літаратурнага аб’яднання (1971—1980). Жыў у Віцебску.

У 2007 г. прыязджаў у родную Нароўлю, дзе ў бібліятэцы зрабіў свой творчы вечар: чытаў свае вершы, расказваў гісторыі, звязаныя з бацькоўскім домам і нараўлянскімі сябрамі.

Творчасць

Пісаў творы на рускай мове. Дэбютаваў як паэт у 1948 годзе: газета «Зорка». Аўтар кніг вершаў: Вясновая казка. Мінск, 1959; Чароўны луг. Мінск, 1959; Чэрвень-рака. Мінск, 1962; Раўнадзенства. Мінск, 1966; Зялёны конік. Мінск, 1968; Хвіліны. Мінск, 1969; Станцыя трывогі і любові. Мінск, 1972; Ліст табе. Мінск, 1975; Сустрэчныя цягнікі. Мінск, 1978; Сілуэты дзён. Мінск, 1981; Сонечны хмель. Мінск, 1982; Скрозь далячынь часу. Мінск, 1984; Верасень. Мінск, 1990; Выбранае. Мінск, 1995; Маю гонар належаць. Віцебск, «Заходняя Дзвіна», 1999. Выпусціў таксама кн. прозы: Падарожная Аляксандра Пушкіна. Нарысы. Мінск, 1977; Скрозь далячынь часоў. Нарысы. Мінск, 1984. Склаў і адрэдагаваў «Шагалаўскі зборнік» (Віцебск, 1996).

Творы Сімановіча перакладзены на беларускую, балгарскую, грузінскую, ідыш, латышскую, літоўскую, нямецкую і чэшскую мовы. Член Саюза пісьменнікаў СССР (1960), Міжнароднага ПЭН-клуба. Быў старшынёй Пушкінскага (1989) і Шагалаўскага камітэтаў (1991).

Ушанаванне памяці

2 ліпеня 2023 г. бібліятэцы ў Нароўлі было прысвоена імя Давіда Рыгоравіча Сімановіча (1932—2014). У афіцыйнай урачыстасці ў нараўлянскай бібліятэцы прынялі ўдзел пляменніца паэта Браніслава Камарэнка, кіраўніцтва Нараўлянскага раёна, жыхары горада.

Літаратура

• Сімановіч Давід Рыгоравіч // Беларуская энцыклапедыя: У 18 т. Т. 14: Рэле — Слаявіна / Рэдкал.: Г. П. Пашкоў і інш. — Мн. : БелЭн, 2002. — Т. 14. — С. 383. — 10 000 экз. — ISBN 985-11-0035-8. — ISBN 985-11-0238-5 (т. 14).
• Сімановіч Давід // Пісьменнікі Віцебшчыны : даведнік / рэд. Ф. І. Сіўко. — Віцебск, 2001. — С. 73—76.

Спасылкі

• Сімановіч Давід Рыгоравіч на сайце анлайн-энцыклапедыі «Беларусь у асобах і падзеях»
• «Имею честь принадлежать…» // narovlya.by