Канстанцін Пятровіч Шаранговіч

Канстанцін Пятровіч Шаранговіч
Імя пры нараджэнні	Канстанцін Пятровіч Шаранговіч
Дата нараджэння	4 студзеня 1956(1956-01-04)
Месца нараджэння	Качаны, Старагабскі сельсавет, Мядзельскі раён, Маладзечанская вобласць, БССР, СССР
Дата смерці	29 жніўня 2014(2014-08-29) (58 гадоў)
Месца смерці	Мінск, Беларусь
Грамадзянства	СССР  Беларусь
Род дзейнасці	мастак, графік, ілюстратар, выкладчык
Месца працы	Беларуская дзяржаўная акадэмія мастацтваў
Вучоба	Беларускі дзяржаўны тэатральна-мастацкі інстытут (1980) Рэспубліканская школа-інтэрнат па музыцы і выяўленчым мастацтве (1969)
Уплыў	Павел Канстанцінавіч Любамудраў
Член у	Беларускі саюз мастакоў

Канстанцін Пятровіч Шаранговіч (нар. 4 студзеня 1956, в. Качаны, Мядзельскі раён Мінскай вобл. — 29 жніўня 2014), Мінск — беларускі мастак–графік, педагог.

Біяграфічныя звесткі

Брат В. П. Шаранговіча. Вучыўся ў Рэспубліканскай школе-інтэрнаце па музыцы і выяўленчым мастацтве (1964–1969). У 1980 годзе скончыў Беларускі тэатральна-мастацкі інстытут па спецыяльнасці «мастак–графік». Вучыўся ў І. Грыгаровіча, П. Любамудрава, В. Шаранговіча. 3 1985 года выкладаў у Беларускай акадэміі мастацтваў (з 2000 па 2011 загадчык кафедры малюнка, жывапісу і скульптуры), дацэнт (1997).

Адзін з заснавальнікаў і кіраўнік салона-галерэі «ГАЛ-творчасць» (з 1989).

Член Беларускага саюза мастакоў з 1988 года.

Творчасць

Працаваў у галіне кніжнай і станковай графіцы, жывапісу. Аформіў «Казкі беларускіх пісьменнікаў» (1983), «Азербайджанскія народныя казкі» (1992), кнігі «Слон купіў веласіпед» І. Бурсава (1984), «Казкі. Нарысы. Літаратурныя партрэты» К. Паустоўскага, «Дзецям» В. Віткі (кн. 1—2), «Вайна з саламандрамі; Апавяданні» К. Чапека, «Мсціжы» І. Пташнікава (усе 1986), «Балады вайны і міру» А. Лойкі (1988), «У гадзіну Стральца» К. Тарасава (1989), «Люблю, спадзяюся, жыву» Г. Пашкова, «Аватара» В. Суханава (абедзве 1990), «Злая зорка» І. Шамякіна (1993), «ТВТ» Я. Маўра (1997). Аўтар графічнай серыі паводле рамана «Подых навальніцы» І. Мележа. (1980), жывапісных кампазіцый «Гара Чантурыя» (1989), «Рыжы лес» (1990), «Блакітная мячэць» (1992), «Вячэрні матыў» (1995), «Нёман» (2001), «Старая яблыня» (2002) і інш. Творы вылучаюцца вобразнасцю сюжэта, эмацыянальнасцю, лаканічнасцю выразных сродкаў.

Удзельнік мастацкіх выставак (з 1976) года.

У кастрычніку 2021 года творы К. Шаранговіча дэманстраваліся ў Нацыянальным мастацкім музеі Рэспублікі Беларусь.

Літаратура

• Беларуская энцыклапедыя: У 18 т. Т. 17: Хвінявічы — Шчытні / Рэдкал.: Г. П. Пашкоў і інш. — Мн. : БелЭн, 2003. — Т. 17. — С. 377. — 10 000 экз. — ISBN 985-11-0035-8. — ISBN 985-11-0279-2 (т. 17).
• Беларускі саюз мастакоў: Энцыклапедычны даведнік / аўтар-складальнік Б. А. Крэпак і інш.. — Мн .: ВТАА «Кавалер Паблішерс», 1998. — С. 609. — 664 с. — 3 000 экз. — ISBN 985-6427-09-6.

Спасылкі

• Прыклады кніжнай графікі К. Шаранговіча
• Шаранговіч Канстанцін Пятровіч на сайце анлайн-энцыклапедыі «Беларусь у асобах і падзеях»