Лоскі замак

З пляцоўкі Вікіпедыя
Jump to navigation Jump to search
Замчышча

Ло́скі замак — абарончае збудаванне ў мястэчку Лоск у ВКЛ (сучасная в. Лоск Валожынскага раёна). Існаваў у 14—18 ст. на прыродным узвышшы, паміж рэчкамі Казлоўка і Верасоўка (прытокі Бярэзіны).

Замак меў драўляныя ўмацаванні ў выглядзе зрубных сцен-гародняў і баявых вежаў, якія стаялі на кальцавым земляным вале. Паводле інвентара 1621 года, было 10 трох'ярусных вежаў і двух'ярусная вежа-брама, што зачынялася варотамі і кратай-герсай. Гародні мелі зверху баявыя галерэі з бойніцамі і абламамі, накрытыя двухсхільнай гонтавай страхой. На дзядзінцы стаялі 2 двухпавярховыя палацы[1][2]. Адзін з іх пабудаваны ў стылі рэнесансу, завяршаўся вежай з гадзіннікам. На першым паверсе вакол прыхожай было 9 жылых пакояў з узорыстымі кафлянымі грубкамі і 2 каморы, на другім, абкружаным адкрытай галерэяй, вакол гасцінай — 2 святліцы, жылы пакой, 3 каморы. Другі палац меў 42 розныя памяшканні. Недалёка ад вежы-брамы стаяла кухня. За сценамі замка знаходзіліся лазня і бровар.

Захавалася замчышча на паўднёва-ўсходняй ускраіне в. Лоск. Яго пляцоўка авальная, памер 75x160 м, вышыня 12—15 м, схілы замкавай гары аплылі. Абследавалі ў 1956 Л. Аляксееў, у 1985 Я. Звяруга, раскопкі праводзілі ў 1987 3. Пазняк і М. Чарняўскі, у 1988—89 З. Пазняк і Г. Сагановіч, у 1990 Г. Сагановіч. Даследавана каля 400 м², культурны пласт 1—2 м.

Зноскі

  1. М. А. Ткачоў, Ю. А. Якімовіч. Лоскі замак // Беларуская энцыклапедыя: У 18 т. Т. 9: Кулібін — Малаіта / Рэдкал.: Г. П. Пашкоў і інш. — Мн.: БелЭн, 1999. С. 348
  2. Міхась Ткачоў. Лоскі замак // Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. Т. 2: Кадэцкі корпус — Яцкевіч. — Мінск: Беларуская Энцыклапедыя, 2005. С. 218

Літаратура[правіць | правіць зыходнік]