Міхаіл Данілавіч Сіянін

Міхаіл Данілавіч Сіянін
Дата нараджэння	17 снежня 1901(1901-12-17)
Месца нараджэння	Забалацце, Аршанскі павет, Магілёўская губерня, Расійская імперыя
Дата смерці	1 кастрычніка 1973(1973-10-01) (71 год)
Месца смерці	Орша, Віцебская вобласць, БССР, СССР
Альма-матар	Ваенная акадэмія Генеральнага штаба Узброеных Сіл Расійскай Федэрацыі
Грамадзянства	Расійская імперыя  СССР
Прыналежнасць	СССР
Род войскаў	пяхота
Званне	палкоўнік
Бітвы/войны	Грамадзянская вайна ў Расіі Вялікая Айчынная вайна
Узнагароды і званні

Міхаіл Данілавіч Сія́нін (17 снежня 1901 — 1 кастрычніка 1973) — удзельнік Грамадзянскай і Вялікай Айчыннай войнаў, гвардыі палкоўнік. Герой Савецкага Саюза (1943).

Біяграфія

М. Д. Сіянін нарадзіўся ў вёсцы Забалацце (сучасны Аршанскі раён Віцебскай вобласці Беларусі). З 15 гадоў пачаў працаваць на заводзе ў Барані. У 1917 годзе добраахвотнікам уступіў у армію. Удзельнічаў у баях на Аршаншчыне, служыў у Дарагабужы, у 235-м Невельскім палку Омскай імя Італьянскага пралетарыята жалезнай дывізіі. Скончыў курсы Чырвоных камандзіраў. Ваяваў на Туркестанскім фронце, з 1923 па 1931 год удзельнічаў у барацьбе з басмачамі.

У Чырвонай Арміі з 1920 года; узнагароджаны ордэнам Чырвонага Сцяга і імянной шашкай Рэўваенсавета СССР. У 1927 годзе скончыў Вышэйшую кавалерыйскую школу, у 1941 г. — Ваенную акадэмію Генштаба.

У Вялікую Айчынную вайну на фронце з лістапада 1941 года: палкоўнік, камандзір 69-й механізаванай брыгады. Удзельнічаў у бітве пад Масквой. У верасні 1943 года брыгада пад яго камандаваннем вызначылася ў бітве за Дняпро каля сяла Вялікі Букрын, на паўднёвы ўсход ад Кіева, 22.09.1943 г. батальён брыгады фарсіраваў Дняпро ў раёне сяла Зарубніцы і захапіў плацдарм. На працягу трох сутак пад ударамі авіяцыі праціўніка М. Д. Сіяніну ўдалося пераправіць на плацдарм асноўныя сілы брыгады і замацавацца на плацдарме.

М. Д. Сіянін — удзельнік баёў на Дуклінскім перавале ў Чэхаславакіі.

У 1948 годзе М. Д. Сіянін скончыў Вышэйшую ваенную акадэмію імя К. Я. Варашылава. Жыў у Оршы, працаваў дырэктарам Мемарыяльнага музея Канстанціна Сяргеевіча Заслонава.

Узнагароды

• Медаль «Залатая Зорка»
• 2 ордэны Леніна
• 3 ордэны Чырвонага Сцяга
• Ордэн Суворава 3-й ступені
• Ордэн Айчыннай вайны 1-й ступені
• Медаль «За абарону Масквы»
• Медаль «За вызваленне Прагі»
• Медаль «За вызваленне Кіева»
• Медаль «За перамогу над Германіяй у Вялікай Айчыннай вайне 1941—1945 гг.»
• Юбілейны медаль «50 гадоў Узброеных Сіл СССР»‎
• Ганаровая грамата Рэвалюцыйнага камітэта Таджыкскай аўтаномнай Сацыялістычнай рэспублікі і імянны гадзіннік (1926)
• Ганаровая грамата вярхоўнага Савета БСРР
• іншыя ўзнагароды, у тым ліку, Чэхаславацкія ордэн і медаль за баявыя дзеянні на Дуклінскім перавале
• імянная зброя (шашка)

Памяць

Імем М. Д. Сіяніна названа вуліца ў Оршы.

Літаратура

• Сіянін Міхаіл Данілавіч // Памяць : гісторыка-дакументальная хроніка Оршы і Аршанскага раёна : у 2 кн. / рэдкал.: Г. П. Пашкоў [і інш.]. — Мн., 1999. — Кн. 1. — С. 373—374.
• Сіянін Міхаіл Данілавіч // Беларуская энцыклапедыя: У 18 т. Т. 14: Рэле — Слаявіна / Рэдкал.: Г. П. Пашкоў і інш. — Мн. : БелЭн, 2002. — Т. 14. — С. 429. — 10 000 экз. — ISBN 985-11-0035-8. — ISBN 985-11-0238-5 (т. 14).

Спасылкі

• Біяграфія на сайце Аршанскага райвыканкама (руск.)
• 69-я механизированная Проскуровская Краснознамённая, орденов Суворова, Кутузова бригада (руск.)
• Сіянін Міхаіл Данілавіч на сайце анлайн-энцыклапедыі «Беларусь у асобах і падзеях»