Міхаіл Паўлавіч Дрынеўскі

Міхаіл Паўлавіч Дрынеўскі
Міхаіл Паўлавіч Дрынеўскі
Асноўная інфармацыя
Поўнае імя	Міхаіл Паўлавіч Дрынеўскі
Дата нараджэння	12 лютага 1941
Месца нараджэння	Тонеж, Тонежскі сельсавет, Тураўскі раён, Палеская вобласць, БССР, СССР;
Дата смерці	9 лістапада 2020 (79 гадоў)
Месца смерці	Мінск, Беларусь;
Месца пахавання	Усходнія могілкі;
Краіна	СССР; Беларусь;
Альма-матар	Гомельскае музычнае вучылішча імя Н. Ф. Сакалоўскага (1963); Беларуская дзяржаўная кансерваторыя імя А. В. Луначарскага (1960-я);
Месца працы	Народны хор імя Г. І. Цітовіча; Беларуская дзяржаўная акадэмія музыкі; Мінскі дзяржаўны музычны каледж імя М. І. Глінкі;
Музычная дзейнасць
Педагог	Ганна Паўлаўна Зелянкова
Прафесіі	дырыжор, педагог
Грамадская дзейнасць
Член у	Саюз музычных дзеячаў Беларусі; БСТД;
Прэміі
Узнагароды	;

Міхаі́л Па́ўлавіч Дрыне́ўскі (12 лютага 1941, Тонеж — 9 лістапада 2020) — мастацкі кіраўнік і галоўны дырыжор Нацыянальнага акадэмічнага народнага хору Рэспублікі Беларусі імя Г. І. Цітовіча. Народны артыст Беларускай ССР (1987).

Біяграфія

Нарадзіўся ў вёсцы Тонеж Тураўскага раёна Гомельскай вобласці (БССР). У 13 гадоў пачаў працаваць кіраўніком хору калгаса «Труд» у вёсцы Тонеж.

У 1959 годзе паступіў у Гомельскае музычнае вучылішча, якое скончыў у 1963 годзе. У час вучобы Міхаіл Дрынеўскі працаваў з народным хорам вёскі Прыбыткі Гомельскага раёна, дзіцячым хорам Палаца піянераў г. Гомеля.

У 1963 годзе паступіў у Беларускую дзяржаўную кансерваторыю ім. А. В. Луначарскага (клас Г. П. Зелянковай), пасля заканчэння якой быў накіраваны на працу ў Мінскае музычнае вучылішча. З 1973 года М. Дрынеўскі — галоўны хормайстар, з 1975 года — мастацкі кіраўнік Народнага хору Рэспублікі Беларусь імя Г. І. Цітовіча. Дырыжор, фалькларыст, этнограф, знаўца народнай музыкі М. П. Дрынеўскі перапрацаваў і ўзбагаціў творчы працэс Народнага хору, сфармаваў высокапрафесійны нацыянальны калектыў. Ён працягвае развіваць традыцыі, закладзеныя заснавальнікам хору Г. І. Цітовічам.

Член Беларускага саюза тэатральных дзеячаў з 1984 года, член Беларускага саюза музычных дзеячаў з 1991 года.

Памёр 9 лістапада 2020 года ў выніку ўскладненняў, выкліканых COVID-19. Пахаваны на Усходніх могілках.

Узнагароды

Міхаіл Паўлавіч Дрынеўскі — заслужаны дзеяч мастацтваў БССР (1978), лаўрэат Дзяржаўнай прэміі БССР (1982), народны артыст БССР (1987), узнагароджаны ордэнам Працоўнага Чырвонага Сцяга (1986), медалём Францыска Скарыны (1990), ордэнам Францыска Скарыны (2002), прафесар.

Літаратура

Беларуская энцыклапедыя: У 18 т. Т. 6: Дадаізм — Застава / Рэдкал.: Г. П. Пашкоў і інш. — Мн. : БелЭн, 1998. — Т. 6. — 576 с. — 10 000 экз. — ISBN 985-11-0035-8. — ISBN 985-11-0106-0 (т. 6).

Спасылкі

Мастацкі кіраўнік — Дрынеўскі Міхаіл Паўлавіч Архівавана 20 красавіка 2019. // сайт Нацыянальнага акадэмічнага народнага хору Рэспублікі Беларусь імя Г. І. Цітовіча
Міхась Дрынеўскі: «Несці народу ягоную ж спадчыну» // Полымя, 2010, № 6, С. 130—149