Марыён (востраў)
Марыён | |
---|---|
афрык. Marion | |
Характарыстыкі | |
Плошча | 290 км² |
Насельніцтва |
|
Размяшчэнне | |
46°56′41,40″ пд. ш. 37°49′39,20″ у. д.HGЯO | |
Акваторыя | Індыйскі акіян |
Краіна | |
Марыён (афр.: Marion) — найбуйнейшы востраў архіпелага Прынс-Эдвард на паўднёвым захадзе Індыйскага акіяна. Агульная плошча — 290 км². Сталага насельніцтва няма.
Геаграфія[правіць | правіць зыходнік]
Востраў Марыён знаходзіцца за 2490 км на паўднёвы ўсход ад Прэторыі, сталіцы ПАР, за 2277 км ад узбярэжжа Антарктыды. Даўжыня з захаду на ўсход — 23,3 км. Шырыня з поўдня на поўнач — 16,62 км.
Узнік у выніку вулканічных вывяржэнняў, якія пачаліся каля 450 тысяч гадоў таму і працягваюцца да нашых дзён. Востраў месціцца на падводнай платформе каля 3000 м вышынёй. У глыбіні яна злучана з платформай суседняга вострава Прынс-Эдвард. Паверхня сфарміравана двума шчытавымі вулканамі, якія ўзвышаюцца на 1230 м і 1185 м. Усяго налічваецца 150 вулканічных конусаў. Апошняе істотнае вывяржэнне зафіксавана ў 1980 г.
Паверхня вострава Марыён складаецца з базальтаў, туфаў і іншых лававых парод. Толькі на ўзбярэжжы сустракаюцца тарфяныя нізіны. Глебы вострава ўтрымоўваюць нізкі працэнт азоту.
Клімат субантарктычны вільготны. Найбольш цёплы месяц — люты, калі сярэдняя тэмпература вагаецца ад 5,3 °C да 10,9 °C. У жніўні слупок тэрмометра трымаецца каля 1,2 °C — 6,3 °C. Сярэднегадавая колькасць ападкаў — 2399 мм.
Прырода[правіць | правіць зыходнік]
З-за аддаленасці ад кантынентаў і вывяржэнняў вулканаў, а таксама прахалоднага клімату флора вострава даволі бедная. Пераважаюць зараснікі траў, імхі і папараці. На пляжах спыняюцца цюлені і марскія сланы. На востраве Марыён гняздуе некалькі мільёнаў птушак, у тым ліку 1,4 млн пінгвінаў.
У 1949 г. на востраў з карабля выпадкова трапіла 2 каты. Яны здолелі выжыць і пачалі размножвацца. У выніку ў 1975 г. колькасць катоў дасягнула болей за 2000. Каты наносілі значную шкоду птушкам. Таму ў 1977—1982 гг. было вылаўлена і вывезена 4208 катоў. Лічыцца, што апошнія каты былі злоўлены ў 1991 г.
Марыён з’яўляецца часткай марскога запаведніка.
Гісторыя[правіць | правіць зыходнік]
Адкрыты ў 1663 г. галандскімі маракамі. У 1772 г. нанава адкрыты французскай экспедыцыяй на чале з Маркам Жазэфам Марыёнам-Дуфрэнам (1724—1772). Ад яго імя востраў атрымаў сучасную назву. У 1833—1930 гг. кейптаўнскія лаўцы цюленяў трымалі на ўсходзе Марыёна сезонную базу. 4 студзеня 1948 г. далучаны да тэрыторыі ПАР. З 1959 г. на востраве вядуцца навуковыя даследаванні. Дзейнічае метэаралагічная станцыя.
Спасылкі[правіць | правіць зыходнік]
- Marion Island Архівавана 24 чэрвеня 2014.
- Marion Island volcano
- Impact of trampling on the vegetation of subantarctic Marion Island
- Marion Island — Life at the base Архівавана 25 жніўня 2016.
- Marion Island — History Архівавана 24 ліпеня 2017.