З пляцоўкі Вікіпедыя.
Суні́цы (Fragaria) — род кветкавых раслін сямейства ружавых.
Адрозніваецца каля 25 відаў. Пашыраны ў Еўразіі і Амерыцы. На Беларусі 3 віды: суніцы зялёныя, або палуніцы, трапляюцца пераважна на паўднёвым усходзе, у далінах рэк, на лугах; суніцы лясныя найбольш пашыраны ў лясах, родапачынальнікі сартоў рэмантантных суніц, і больш рэдкія — клубніцы.
Шматгадовыя травяністыя расліны. Лісце трайчастае, доўгачаранковае, у прыкаранёвай разетцы. У пазухах лісця развіваюцца кароткія паўзучыя парасткі (вусы), якія ўкараняюцца ў вузлах. Кветкі двухполыя, радзей аднаполыя, белыя, у суквецці шчыток. Плод — несапраўдная ягада, ядомая. Плады маюць у сабе вітаміны, арганічныя кіслоты, пекцінавыя і дубільныя рэчывы.
Харчовыя і лекавыя расліны. Культывуюцца суніцы садовыя, або ананасныя, віргінскія, клубніцы, а таксама іх гібрыды і сарты.
Зноскі
- Скуратоеіч А. Суніцы // БЭ ў 18 т. Т. 15. Мн., 2002.
