Сымон Самуэль Сангушка

Самуэль Сямён Сангушка
Samuel Szymon Sanguszko
Герб «Літоўская Пагоня»
14-ы Ваявода віцебскі 1626 — лістапад 1638
Папярэднік	Ян Завіша
Пераемнік	Ян Войцех Ракоўскі
10-ы Кашталян віцебскі 1621 — 1626
Папярэднік	Мікалай Вольскі
Пераемнік	Мікалай Завіша
9-ы Кашталян мсціслаўскі 1620 — 1621
Папярэднік	Канстанцін Галоўчынскі
Пераемнік	Крыштаф Друцкі-Сакалінскі
Нараджэнне	1570
Смерць	лістапад 1638
Род	Сангушкі
Бацька	Андрэй Рыгоравіч Сангушка
Маці	Соф’я з Сапегаў[d]
Жонка	Ганна з Завішаў[d] і Алена з Гасеўскіх[d]
Дзеці	Ян Уладзіслаў Сангушка, Геранім Уладзіслаў Сангушка і Кацярына з Сангушкаў[d]
Веравызнанне	Каталіцкая Царква

Сямён (Шыман) Самуэль Сангушка (? — 1638) — дзяржаўны дзеяч Вялікага Княства Літоўскага. Ваявода віцебскі (з 1626).

Біяграфія

Вучыўся ў Інгальштацкім універсітэце. Удзельнічаў у войнах супраць Швецыі 1600—1929 і Расіі 1609—1618. Маршалак аршанскі ў 1620, кашталян мсціслаўскі ў 1620—1621 і віцебскі ў 1621—1626, ваявода віцебскі з 1626. Уваходзіў у склад камісіі па расследаванні забойства ў 1623 у Віцебску архіепіскапа Іасафата Кунцэвіча. Валодаў Смалянамі, Абольцамі, Горвалем. У Смалянах пабудаваў замак Белы Ковель. Сабраў вялікую бібліятэку, склаў радавод Сангушкаў, выводзячы іх ад Любарта, займаўся маляваннем і гравюрай. Аўтар друкаваных прамоў. Перайшоў з праваслаўя ў каталіцтва.

Сям’я

Сын Андрэя Сангушкі і Соф’і Сапегі, дачкі кіеўскага кашталяна Паўла Сапегі.

Быў двойчы жанаты. Ад першай жонкі, Ганны Завішы (? — 1619), дачкі Юрыя Завішы, меў дзяцей:

• Казіміра (памёр у 1655),
• Гераніма Уладзіслава (1611—1657), смаленскага біскупа,
• Яна Уладзіслава (? — 1652), старасту суражскага,
• Кацярыну, якая была замужам за аршанскім харужым Янам Статкевічам,
• Крысціну, якая была замужам за браслаўскім маршалкам Янам Мікалаем Рудамінам-Дусяцкім,
• Еўфрасінню, якая была замужам за каралеўскім дваранінам Юрыем Шверынам.

Другі раз ажаніўся з Тарэзай Гасеўскай (? — 1635), дачкой Аляксандра Гасеўскага, але гэты шлюб быў бяздзетным.

Літаратура

• Пазднякоў В. Сангушкі // Вялікае княства Літоўскае: Энцыклапедыя. У 3 т. / Рэдкал.: Г. П. Пашкоў (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — С. 540. — 792 с. — ISBN 985-11-0378-0 (т. 2), ISBN 985-11-0315-2.