Аляксандр Раманавіч Пшчолка

Аляксандр Раманавіч Пшчолка
Асабістыя звесткі
Псеўданімы	Белорусс і А. Крицкий
Дата нараджэння	1869
Месца нараджэння	Чарсцвяды, Лепельскі павет, Віцебская губерня, Расійская імперыя
Дата смерці	1943
Грамадзянства	Расійская імперыя  СССР
Альма-матар	Віцебская духоўная семінарыя Юр’еўскі ўніверсітэт
Месца працы	Полацкі дзяржаўны лясны каледж
Прафесійная дзейнасць
Род дзейнасці	пісьменнік, адвакат, публіцыст, этнограф
Мова твораў	беларуская
Творы ў Вікікрыніцах
Медыяфайлы на Вікісховішчы

Аляксандр Раманавіч Пшчолка (28 снежня 1869 (9 студзеня 1870), в. Чарсцвяды, Лепельскі павет, Віцебская губерня, цяпер Ушацкі раён, Віцебская вобласць — 1943; Псеўданімы і крыптанімы: Белорусс, А. Крицкий, А. П – ко, А. Р. П – ко) — беларускі празаік, публіцыст, этнограф.

Біяграфія

Нарадзіўся ў сям’і дзяка. Скончыў Полацкае духоўнае вучылішча (1885), Віцебскую праваслаўную духоўную семінарыю (1890). Служыў у Віцебскім Маркавым манастыры (1890—1891), потым тры гады быў псаломшчыкам. З 1894 года выкладаў агародніцтва і садоўніцтва ў сельскагаспадарчай школе, працаваў народным настаўнікам у школе вёскі Арэхаўна. З верасня 1900 па красавік 1907 вучыўся на юрыдычным факультэце Юр’еўскага універсітэта. Працаваў памочнікам рэдактара ў газеце «Віцебскія губернскія ведамасці».

З 1905 года жыў у Вільні, працаваў у акруговым судзе. З 1908 гарадскі суддзя ў Себеже, з 1911 міравы суддзя 3-га ўчастка Туккум-Тальсенскай акругі, з 1914 на той жа пасадзе на 2-м участку Рэвельска-Гапсальскай акругі. У час Першай сусветнай вайны перабраўся ў Гарадок, дзе выкладаў гісторыю ў народнай школе.

З 1918 года працаваў адвакатам пры Полацкім губернскім судзе, выкладаў геаграфію ў Полацкім лясным тэхнікуме. З 1927 года жыў у Старой Таропе Калінінскай вобласці, займаў пасаду адваката ў мясцовым судзе. У 1937 годзе выйшаў на пенсію.

Творчасць

Друкаваўся з 1898 года ў «Витебских губернских ведомостях», пазней у газетах «Сельский вестник», «Минское слово», «Белорусская жизнь» і інш. Пісаў на беларускай і рускай мовах.

Выдаў больш за 10 кніг апавяданняў і нарысаў, дзе паказаў неўладкаванасць і бюракратызм мясцовых чыноўнікаў. У этнаграфічных нарысах апісваў народныя звычаі і абрады Лепельшчыны («Дзяды», «Мікітавы хаўтуры», «Зажынкі і абжынкі», «Беларускія святы»).

У 1910 годзе ў Полацку А. Р. Пшчолка арганізаваў хор, які выконваў беларускія народныя песні, і беларускі тэатр.

Пад рэдакцыяй А. Р. Пшчолкі ў 1910 годзе выдадзена паэма «Тарас на Парнасе».

Літаратура

• Беларуская энцыклапедыя: У 18 т. Т. 13: Праміле — Рэлаксін / Рэдкал.: Г. П. Пашкоў і інш. — Мн. : БелЭн, 2001. — Т. 13. — С. 149. — 10 000 экз. — ISBN 985-11-0035-8. — ISBN 985-11-0216-4 (т. 13).
• Энцыклапедыя гісторыі Беларусі. У 6 т. Т. 6. Кн. 1: Пузыны — Усая / Рэдкал.: Г. П. Пашкоў (галоўны рэд.) і інш.; Маст. Э. Э. Жакевіч. — Мн. : БелЭн, 2001. — С. 12. — 10 000 экз. — ISBN 985-11-0214-8.
• Пшчолка Аляксандр // Беларускія пісьменнікі: Біябібліяграфічны слоўнік. У 6 т. / пад рэд. А. І. Мальдзіса. — Мн.: Беларуская Энцыклапедыя, 1995. — Т. 5. Пестрак — Сяўрук. — 480 с.; іл.. — ISBN 5-85700-168-4. — С. 85.
• Пшчо́лка Аляксандр Раманавіч // Беларусь: энцыклапедычны даведнік / Рэдкал. Б. І. Сачанка (гал. рэд.) і інш.; Маст. М. В. Драко, А. М. Хількевіч. — Мн.: БелЭн, 1995. — С. 610. — 800 с. — 5 000 экз. — ISBN 985-11-0026-9.

Спасылкі

• Пшчолка Аляксандр Раманавіч // Прыдзвінскі край: гісторыя і сучаснасць