Беспарадкі ў Кот-д’Івуары (2008)

Беспарадкі 2008 года ў Кот-д’Івуары
Дата 16 чэрвеня — 24 лістапада 2008 Месца паўночныя раёны Кот-д’Івуара Прычыны несвоечасовыя ўзнагароджанні за раззбраенне Мэты прадастаўленне грашовых выплат Характарыстыка беспарадкі, узброеныя напады Вынік улады выплацілі паўстанцам кампенсацыю
Бакі канфлікту
Урад Кот-д’Івуара Кіраўніцтва «Новых сіл»	Атрады «Новых сіл» у Буаке, Вавуа і Сегэлэ	Міратворцы ААН
Ключавыя фігуры
Гіём Саро	Захарыя Кані	невядома
Лік удзельнікаў
невядома	2568 баевікоў (у Буаке)	невядома

Летам і восенню 2008 года, праз паўтара года пасля завяршэння Першай Івуарыйскай вайны, па Кот-д’Івуары пракацілася хваля беспарадкаў, арганізаваных асобнымі атрадамі групоўкі «Новыя сілы». Ахвярамі гэтых падзей сталі прынамсі 12 чалавек, якія загінулі падчас сутыкненняў.

Перадгісторыя

19 верасня 2002 года на поўначы Кот-д’Івуара ўспыхвае ўзброенае паўстанне супраць прэзідэнта Ларана Гбагбо. Касцяком мяцежнікаў стала групоўка «Новыя сілы», а адным з лідараў — Гіём Саро. Паўстанцы захапілі ўсю поўнач краіны, але былі прыпынены французскімі войскамі, якія разам з міратворцамі ААН размясціліся ўздоўж фронту. «Новыя сілы» паспелі ўзяць каля 60% тэрыторыі дзяржавы (193 000 км²).

4 сакавіка 2007 года ва Уагадугу (Буркіна-Фасо) паміж урадам і апазіцыяй быў падпісаны мірны дагавор. Лідар «Новых сіл» Гіём Саро быў пасля прызначаны прэм’ер-міністрам і ўступіў на пасаду ў пачатку красавіка. 27 лістапада Гбагбо і Саро падпісалі яшчэ адно пагадненне, у якім прызначылі выбары на канец чэрвеня 2008 года.

У гэты ж час пачаліся мерапрыемствы па раззбраенні атрадаў паўстанцаў.

Ход падзей

Буаке (16—17 чэрвеня)

Да канца мая 2008-га 2568 баевікоў «Новых сіл» былі згрупаваны ў лагерах ля горада Буаке. Паўстанцаў апавясцілі, што ім будуць выплачаныя грашовыя сумы за раззбраенне. Аднак выдачу ўзнагароджанняў затрымалі на адзін тыдзень. Як вынік, 16 чэрвеня апазіцыянеры паднялі паўстанне, страляючы ў паветра і нападаючы на мірных жыхароў. На вуліцах ўзведзены барыкады. Прэм’ер-міністр Гіём Саро 17 чэрвеня распарадзіўся неадкладна аднавіць выплаты баевікам. Да вечара таго ж дня беспарадкі завяршыліся.

Вавуа і Сегэлэ (28 чэрвеня)

28 чэрвеня паднялі мяцеж байцы «Новых сіл», верныя Захары Кані, які быў звольнены з групоўкі ў маі месяцы за недысцыплінаванасць. Спярша беспарадкі пачаліся ў Вавуа, а затым распаўсюдзіліся на Сегэлэ. Былі забіты трое мірных жыхароў і адзін баявік. Яшчэ адзін паўстанец атрымаў раненні. У той жа дзень беспарадкі спыніліся.

Буаке (жнівень)

20 жніўня ў Буаке зноў успыхнула паўстанне. У ім прынялі ўдзел каля трох ста апалчэнцаў. 22 жніўня кіраўніцтву групоўкі ўдалося ўціхамірыць сваіх падначаленых.

Сегэлэ (24 лістапада)

24 лістапада лагер «Новых сіл» у Сегэлэ падвергнуўся нападу групы невядомых. Яны вызвалілі зняволеных і паспрабавалі забраць зброю і боепрыпасы. Падчас сутычкі паўстанцы забілі восем нападнікаў.