Маргарыта (спадарожнік Урана)

Маргарыта (англ.: Margaret) — нерэгулярны спадарожнік планеты Уран з прамым арбітальным абарачэннем. Названая ад імя персанажа з п'есы Шэкспіра «Многа шуму з нічога». Таксама пазначаецца як Уран XXIII.

Гісторыя адкрыцця

Маргарыта была адкрыта Скотам Шэпардам па здымках, зробленых ім сумесна з Дэвідам Джуітам 29 і 30 жніўня 2003 года з дапамогай тэлескопа «Субару» ў абсерваторыі Мауна-Кеа. Яны ж назіралі гэты аб’ект 20 верасня ў тэлескоп «Джэміні». Пазней Браян Марсдэн папярэдне ідэнтыфікаваў гэты аб’ект. Атрыманыя вынікі былі пацверджаны Джонам Кавеларсам па здымку, зробленым 25 жніўня 2001 г з дапамогай тэлескопа «Канада-Францыя-Гаваі». Спадарожнік атрымаў часовае абазначэнне S/2003 U 3. Уласная назва была прысвоена 29 снежня 2005 года.