Міхась Клімковіч

Міхась Клімковіч
Асабістыя звесткі
Імя пры нараджэнні:	Міхаіл Мікалаевіч Клімковіч
Дата нараджэння:	20 лістапада 1899(1899-11-20)
Месца нараджэння:	Сялітранка, Барысаўскі павет, Мінская губерня, Расійская імперыя
Дата смерці:	5 лістапада 1954(1954-11-05) (54 гады)
Месца смерці:	Мінск, СССР
Пахаванне:	Вайсковыя могілкі
Грамадзянства:	Расійская імперыя  БССР  СССР
Жонка:	Марыя Язэпаўна Клімковіч[d]
Дзеці:	Святлана Міхайлаўна Клімковіч і Мая Міхайлаўна Клімковіч[d]
Літаратурная дзейнасць
Род дзейнасці:	паэт, драматург, празаік, крытык
Мова твораў:	беларуская
Грамадская дзейнасць
Партыя	КПСС
Член у	Саюз пісьменнікаў СССР

Міха́сь Клімко́віч (Міхаі́л Мікала́евіч; 20 лістапада 1899, в. Сялітранка, цяпер Барысаўскі раён, Мінская вобласць, Беларусь — 5 лістапада 1954, Мінск) — беларускі паэт, драматург, празаік, крытык, аўтар тэксту гімна БССР — «Мы, беларусы».

Біяграфія

Нарадзіўся ў вёсцы Сялітранка Барысаўскага павета ў сялянскай сям'і. У 1915 г. скончыў Барысаўскае вышэйшае чатырохкласнае вучылішча. Здаў экстэрнам экзамен на званне народнага настаўніка. Настаўнічаў у Барысаўскім павеце (1915—1921). Служыў у Чырвонай Арміі (1921—1923), потым ізноў настаўнічаў. Працаваў на партыйнай і прафсаюзнай рабоце. У 1932—1934 гг. — старшыня аргкамітэта па стварэнні Саюза пісьменнікаў БССР, а ў 1934—1939 — першы старшыня праўлення гэтага камітэта. У 1937 г. пад ціскам абвінавачванняў спрабаваў скончыць жыццё самагубствам.

У 1943—1947 гг. быў галоўным рэдактарам Дзяржаўнага выдавецтва БССР у Маскве, потым у Мінску.

У 1932—1937 гг. кандыдат у сябры ЦК КП(б) Беларусі. Сябра ЦВК БССР у 1931—1938 гг.

З жонкай Марыяй Язэпаўнай мелі дачок Маю і Святлану. Памёр 5 лістапада 1954 года, пахаваны ў Мінску на Вайсковых могілках.

Творы

Магіла на Вайсковых могілках у Мінску

• Паэма «14 слуцкіх»
• Вершаваныя п'есы: «Кацярына Жарнасек» (ставілася ў Тэатры імя Я. Купалы), «Адплата», «Уся ўлада Саветам»
• Драматычная трылогія «Георгій Скарына» (ставілася ў Тэатры імя Я. Купалы)
• П'еса «Адплата»
• Лібрэта да опер і балетаў: «Князь-возера», «Кастусь Каліноўскі», «Апошні вечар на хутары», аднаактовак «На віленскім шляху», «На скрыжаванні дарог, «Маленькая хмарка»
• Пераклады на беларускую мову твораў рускіх, украінскіх, польскіх, літоўскіх аўтараў і інш.

Аўтар тэксту Дзяржаўнага гімна БССР «Мы, беларусы» (1944)

У 1946 г. у дзяржаўным выдавецтва БССР выйшаў зборнік прозы М. Клімковіча «Лясное возера». Апрацаваў зборнік «Беларускія народныя казкі» (1946). У 1947 г. выйшаў зборнік «Драматычныя паэмы». У 1959 г. выдадзены Збор твораў у 2 тамах.

Даследаваў беларускую літаратуру. Аўтар прац «Літаратура Савецкай Беларусі за 15 год» (1934), «Аб жыватворчым уплыве рускай літаратуры на беларускую літаратуру (1953), «Літаратурна-крытычныя артыкулы (1962).

Літаратура

• Міхась Клімковіч // Беларускія пісьменнікі (1917—1990): Даведнік; Склад. А. К. Гардзіцкі. Нав. рэд. А. Л. Верабей. — Мн.: Мастацкая літаратура, 1994. — 653 с.: іл. ISBN 5-340-00709-X