Уладзімір (князь пінскі)

Уладзімір
Князь пінскі
Нараджэнне	XII стагоддзе
Смерць	не раней за 1229
Род	Ізяславічы Тураўскія
Дзеці	Дзямід Уладзіміравіч, Юрый Уладзіміравіч і Фёдар

Уладзімір (? — пасля 1229) — князь пінскі (зг. 1208, 1229).

Пінскі князь Уладзімір (Володимеръ Пиньски) згадваецца Галіцкага-Валынскім летапісам пад 1204 і 1229 гадамі паводле Іпацьеўскага спісу, паводле ўдакладнення Міхайлы Грушэўскага гэта 1208 год і сярэдзіна 1229 года адпаведна.

У 1208 годзе пінскі князь Уладзімір трапіў у палон, калі палякі занялі Уладзімір, каб пасадзіць на сталец белзскага князя Аляксандра Усеваладавіча, і разрабавалі горад. Такім чынам, магчыма, пінскі князь быў звязаны з выгнаным папярэднім уладзімірскім князем Святаславам Ігаравічам.

У падзеях 1226—1228 гадоў, паводле Іпацьеўскага спісу (1227 — пачатак 1229, паводле Грушэўскага), у якіх актыўны ўдзел бралі піняне і тураўцы, князь Уладзімір не згадваецца.

У другой палове 1229 года князі Даніла і Васілька пайшлі з войскамі ў Польшчу на дапамогу князю Конраду, а для абароны Уладзімірскай зямлі ад яцвягаў пакінулі ў Бярэсці пінскага князя Уладзіміра, берасцян і ўграўчан. Тым часам паўз Бярэсце з рабаўнічага паходу на Польшчу вярталіся літоўцы, мірныя з Данілам і Васількам яны спакойна ішлі праз іх зямлю, але пінскі князь Уладзімір, сказаўшы «ёсць мірныя [ім], але мне ёсць не мірныя», выйшаў з берасцянамі супраць літоўцаў і ўсіх забіў.

Ёсць думка, што было два пінскія князі Уладзіміры, адзін выступае ў падзеях 1208 года, другі — у 1229 годзе.

Сынам Уладзіміра быў пінскі князь Юрый, а таксама імаверна пінскі князь Дзямід, названы братам Юрыя, і, магчыма, Фёдар таксама пінскі князь, згаданы з двума першымі і старэйшы за іх, але яго крыніцы яўна ні Уладзіміравічам, ні іх братам не называе.

Літаратура

• Грушевський М. Хронологія подій Галицько-Волинського літопису // Записки Наукового товариства ім. Шевченка. — Львів: 1901. — Т. 41. — С. 1—72.