Будзёнаўскі (Гомель)

Старая стайня, 2021 г.

Будзёнаўскі — былы пасёлак у Гомельскім раёне Гомельскай вобласці. У 1983 г. увайшоў у гарадскія межы Гомеля, фактычна стаўшы часткай жылога масіву Прудок у Чыгуначным раёне.

Утвораны ў 1921 г. на землях ранейшага фальварка Паскевічаў у Прудку, меў назву «Конезавод № 59», уваходзіў у склад Пакалюбіцкай воласці. Станам на 1929 г. у пасёлку было 17 падворкаў, пражывала 210 чалавек. У 1965 г. быў перайменаваны ў «Залінейны», а ў 1976 г. — у «Будзёнаўскі» ў гонар С. М. Будзённага. Але сярод прудкоўцаў яшчэ ў 1980-я гады бытавала яго першасная назва ў форме «Конезавод». Назва «Пасёлак Будзёнаўскі» сёння захоўваецца за адной з вуліц раёна. Сярод аб’ектаў былога пасёлка вылучаюцца:

• Гомельскі абласны цэнтр алімпійскага рэзерву па прыкладных відах спорту, дзе працуюць аддзяленні па конным спорце, сучасным пяцібор’і, стральбе з лука, фехтаванні, размешчаны іпадром;
• Гомельскі абласны цэнтр прафілактычнай дэзынфекцыі.

Гістарычнай цікавосткай з’яўляюцца фрагменты сядзібна-паркавага комплекса сярэдзіны ХІХ — пачатку ХХ ст. ( Гісторыка-культурная каштоўнасць Беларусі, шыфр 313Г000094).

Галерэя

• 
  Даўні будынак, 2022 г.
• 
  Жылая забудова, 2017 г.
• 
  У кірунку іпадрома, 2022 г.
• 
  Да сядзібы ХІХ ст., 2022 г.