Сусалаўшчына

Сусалаўшчына (у польскамоўных дакументах — Susołowszczyzna) — мясцовасць, сумежная з Гомелем («in contiguitate Miasta Homla»). Згадваецца ў дакументах «Volumina legum» 60-х гадоў XVIII стагоддзя ў сувязі з падзеямі 1744 года, калі ўвайшла ў склад Гомельскага староства. Да таго з’яўлялася спадчынным уладаннем (грунтам дзедзічным) паноў Міцкевічаў, якое, меркавана, было анклавам сярод зямель Гомельскага староства. Уваходжанне Сусалаўшчыны ў склад апошняга адбылося дзякуючы намаганням гомельскага старосты князя Міхала Фрэдэрыка Чартарыйскага праз абмен грунтамі з панамі Міцкевічамі, якія ў выніку атрымалі ўрочышча Зялёная Лука. Дакладнае месцазнаходжанне Сусалаўшчыны застаецца невядомым.

Літаратура

• Potwierdzenie zamiany gruntow w Starostwie Homelskim z UU. Mickiewiczami zaszłey // Volumina legum : prawa, konstytucie y przywileie Krolestwa Polskiego, Wielkiego Xięstwa Litewskiego [Tekst]. — T. 7 : ab anno 1764 ad annum 1768. — Petersburg : J. Ohryzko, 1860. — S. 85—86.