Каоны

Као́ны, ці К-мезо́ны (4 віды; абазначаюцца як K⁺, K^-, K⁰, K⁰) — група нестабільных элементарных часціц з нулявым спінам і ненулявой дзіўнасцю.

Выяўлены ў касмічных прамянях у 1947—51, атрыманы з дапамогай паскаральнікаў зараджаных часціц у 1954 годзе. Каоны належаць да адронаў, удзельнічаюць у моцных узаемадзеяннях.

Існуе 4 віды каонаў: K⁺ (маса спакою 493,68 МэВ, сярэдні час жыцця 1,238×10^-8 с, дзіўнасць +1), K⁰ (497,6 Мэв, дзіўнасць +1) і адпаведныя ім антычасціцы K^- і K⁰ (дзіўнасць -1); утвараюць 2 ізатапічныя дублеты з ізатапічным спінам 1/2.

Пры распадах К-мезонаў, абумоўленых слабымі ўзаемадзеяннямі, у 1964 годзе выяўлена парушэнне СР-сіметрыі (гл. камбінаваная інверсія).

Літаратура

• К-мезоны // Беларуская энцыклапедыя: У 18 т. Т. 8: Канто — Кулі / Рэдкал.: Г. П. Пашкоў і інш. — Мн. : БелЭн, 1999. — Т. 8. С. 357.