Слабодка (Браслаўскі раён)

Аграгарадок Слабодка Касцёл Сэрца Ісуса Краіна Беларусь Вобласць Віцебская Раён Браслаўскі Сельсавет Слабодкаўскі Каардынаты 55°41′12″ пн. ш. 27°11′06″ у. д. Насельніцтва 860 чалавек (2001) Часавы пояс UTC+3 Тэлефонны код +375 2153 Паштовы індэкс 211977 Аўтамабільны код 2 СААТА 2208881266 Слабодка на карце Беларусі ±

Слабодка на Вікісховішчы

Слабо́дка (трансліт.: Slabodka, руск.: Слободка) — аграгарадок у Браслаўскім раёне Віцебскай вобласці Беларусі. Адміністрацыйны цэнтр Слабодкаўскага сельсавета.

Геаграфія

Знаходзіцца паміж азёрамі Поцех, Недрава і Ільмёнак. За 9 км на паўночны ўсход ад горада Браслаў, 220 км ад Віцебска, 21 км ад чыгуначная станцыі Друя; на аўтамабільнай дарозе Браслаў — Друя.

Назва

Варыянты назвы ў гістарычных крыніцах: Слабада, Слабодка Заверская, Быхаўка, Юзафова.

Гісторыя

Першы пісьмовы ўспамін пра Слабодку як паселішча Друйскага двара датуецца 1618 годам. У інвентары Браслаўскага староства за 1649 год значыцца мястэчка Слабада. Ад часу свайго заснавання паселішча ўваходзіла ў склад Браслаўскага павета Віленскага ваяводства. У XVIII стагоддзі Слабодка адносілася да маёнтку Завер’е, пераважна належала Мірскім. У канцы XVIII стагоддзя згадваецца прыкагалак (у 1783 годзе — 6 яўрэйскіх дамоў).

У выніку трэцяга падзелу Рэчы Паспалітай (1795) Слабодка апынулася ў складзе Расійскай імперыі, у Браслаўскім павеце Віленскай губерні. У 1806 годзе С. Мірскі фундаваў пабудову мураванага касцёла. 18 снежня 1842 года Слабодка як цэнтр воласці ўвайшла ў склад Новааляксандраўскага павета Ковенскай губерні, у гэты час тут працавалі валасная ўправа і пазыковая каса. У 1865 годзе расійскія ўлады адкрылі народную школу. У 1903 годзе ў Слабодцы і ваколіцах працаваў фалькларыст В. Камінскі, які запісаў тут больш за 30 беларускіх народных песень.

У Першую сусветную вайну каля Слабодкі праклалі вузкакалейную чыгунку, якая ў 1920—1960-я гады дзейнічала як пасажырская лінія.

Згодна з Рыжскім мірным дагаворам (1921) Слабодка апынулася ў складзе міжваеннай Польскай Рэспублікі, дзе зрабілася цэнтрам гміны Браслаўскага павета Віленскага ваяводства. На 1931 год у мястэчку працавалі чыгуначная станцыя, школа, пошта, аптэка, карчма, крамы.

У 1939 годзе Слабодка ўвайшла ў БССР, дзе 12 кастрычніка 1940 года зрабілася цэнтрам сельсавета Браслаўскага раёна.

Насельніцтва

• XIX стагоддзе: 1850 год — каля 300 чал., 30 двароў; 1897 год — 643 чал., 124 двары.
• XX стагоддзе: 1931 год — 848 чал., 146 двароў; 1999 год — 1133 чал., 396 двароў.
• XXI стагоддзе: 2001 год — 860 жыхароў, 387 двароў.

Інфраструктура

• Лабараторыя азёразнаўства БДУ
• турысцкая база Нацыянальнага парка «Браслаўскія азёры»
• Дом культуры
• Сярэдняя школа
• Бібліятэка
• Абласная псіхіятрычная і ўчастковая бальніцы

Славутасці

• Касцёл Сэрца Ісуса (1903—1906 гады) —  Гісторыка-культурная каштоўнасць Беларусі, шыфр 212Г000212
• Гарадзішчы (VII ст. да н.э. — IV ст. н.э.) —  Гісторыка-культурная каштоўнасць Беларусі, шыфр 213В000213
• Млын водны (1-я палова XX ст.)

Вядомыя асобы

• Зінаіда Іосіфаўна Дудзюк (нар. 1950) — беларуская паэтэса, празаік, драматург.

Галерэя

• Краявіды Слабодкі
• 
  Возера Поцех з боку вёскі
• 
  Касцёл Сэрца Ісуса
• 
  Брама касцёла
• 
  Каплічка касцёла
• 
  Слабодка, азёры Поцех і Недрава

Літаратура

• Шыдлоўскі К. С. Слабодка // Беларуская энцыклапедыя: У 18 т. Т. 14: Рэле — Слаявіна / Рэдкал.: Г. П. Пашкоў і інш. — Мн. : БелЭн, 2002. — Т. 14. — С. 485. — 10 000 экз. — ISBN 985-11-0035-8. — ISBN 985-11-0238-5 (т. 14).
• Słobódka (73) // Słownik geograficzny Królestwa Polskiego i innych krajów słowiańskich. Tom X: Rukszenice — Sochaczew (польск.). — Warszawa, 1889. — S. 805.
• Республика Беларусь. Атлас охотника и рыболова: Витебская область (руск.) / Редактор Г. Г. Науменко. — Мн.: РУП «Белкартография», 2010. — С. 17. — 72 с. — 10 000 экз. — ISBN 978-985-508-136-5.

Спасылкі

• На Вікісховішчы ёсць медыяфайлы па тэме Слабодка (Браслаўскі раён)