Міхаіл Канстанцінавіч Недзьведзь
Міхаіл Канстанцінавіч Недзьведзь | |
---|---|
Дата нараджэння | 28 жніўня 1941[1] (82 гады) |
Месца нараджэння | |
Грамадзянства | |
Дзеці | Аляксандр Міхайлавіч Недзьведзь |
Род дзейнасці | навуковец, выкладчык універсітэта, патолагаанатам, медыцынскі адміністратар |
Навуковая сфера | паталагічная анатомія |
Месца працы | |
Навуковая ступень | доктар медыцынскіх навук (1979) |
Навуковае званне |
|
Альма-матар | |
Узнагароды | |
Медыяфайлы на Вікісховішчы |
Міхаі́л Канстанці́навіч Не́дзьведзь[2] (нар. 28 жніўня 1941, Пінск) — беларускі ўрач-патолагаанатам. Доктар медыцынскіх навук (1979), прафесар (1985). Выдатнік аховы здароўя Рэспублікі Беларусь. Старшыня Мінскага гарадскога навуковага таварыства ўрачоў-патолагаанатамаў (з 1990 года), намеснік старшыні Беларускага навуковага таварыства ўрачоў-патолагаанатамаў. Узнагароджаны ганаровымі граматамі Міністэрства аховы здароўя Рэспублікі Беларусь[3].
Біяграфія і навуковая дзейнасць[правіць | правіць зыходнік]
Міхаіл Канстанцінавіч Недзьведзь нарадзіўся 28 жніўня 1941 года ў горадзе Пінску (цяпер уваходзіць у склад Брэсцкай вобласці) у сям’і служачых.
У 1959 годзе з адзнакай скончыў Пінскае медыцынскае вучылішча, у 1965 годзе — з адзнакай Мінскі дзяржаўны медыцынскі інстытут. Пасля заканчэння інстытута Міхаіл Недзьведзь працаваў загадчыкам тэрапеўтычнага адзялення Слаўгарадскай раённай бальніцы Магілёўскай вобласці. З 1966 года — аспірант кафедры паталагічнай анатоміі Мінскага медыцынскага інстытута, з 1968 года — асістэнт гэтай жа кафедры. У 1970 годзе абараніў кандыдацкую дысертацыю па тэме «Паталагічная анатомія прыроджанай гідрацэфаліі» (руск.: Патологическая анатомия врождённой гидроцефалии), напісаную пад навуковым кіраўніцтвам Юрыя Валянцінавіча Гулькевіча. У 1979 годзе абараніў доктарскую дысертацыю па тэме «Паталагічная анатомія цэнтральнай нервовай сістэмы пры храмасомных хваробах, абумоўленых аберацыямі аўтасом» (руск.: Патологическая анатомия центральной нервной системы при хромосомных болезнях, обусловленных аберрациями аутосом).
З 1975 года Міхаіл Канстанцінавіч Недзьведзь быў дацэнтам, а з 1985 года стаў прафесарам кафедры паталагічнай анатоміі. З 1974 года па 1984 год быў галоўным патолагаанатамам Мінскага гарадскога аддзела аховы здароўя. У 1984—1987 гадах працаваў загадчыкам гістапаталагічнага адзялення Нацыянальнай лабараторыі здароўя ў горадзе Бразавіле (Народная Рэспубліка Конга).
У сферу навуковых інтарэсаў Міхаіла Канстанцінавіча Недзьведзя ўваходзяць прыроджаныя парушэнні цэнтральнай нервовай сістэмы, паталагічная анатомія павольных нейраінфекцый і вірусных энцэфалітаў, паразітарныя хваробы чалавека, некаторыя дэміэлінізуючыя захворванні. Пад яго кіраўніцтвам былі выкананыя і абароненыя 14 кандыдацкіх і 2 доктарскія дысертацыі. Прафесар Недзьведзь з’яўляецца аўтарам 540 друкаваных работ, у тым ліку 10 манаграфій, 3 рацыяналізатарскіх прапаноў, 2 вынаходстваў, 12 метадычных рэкамендацый[4]. У 2011 годзе Міхаілам Канстанцінавічам у сааўтарстве з прафесарам Яўгенам Давыдавічам Чарствым быў напісаны першы ў Беларусі нацыянальны падручнік па паталагічнай анатоміі для вышэйшых медыцынскіх устаноў адукацыі.
Сям’я і асабістае жыццё[правіць | правіць зыходнік]
Старэйшы брат, Георгій Канстанцінавіч Недзьведзь (1938—2019), быў вядомым урачом-неўролагам, доктарам медыцынскіх навук, прафесарам, лаўрэатам Дзяржаўнай прэміі Рэспублікі Беларусь (1995)[5]. Зводны старэйшы брат, Алег Феадосьевіч Макарэвіч (1927—2009), быў урачом-хiрургам, кандыдатам медыцынскіх навук, узнагароджаны званнем Ганаровага грамадзянiна горада Пiнска (1992).
Мае двух дзяцей. Дачка, Тамара Міхайлаўна Недзьведзь, — урач-патолагаанатам, кандыдат медыцынскіх навук[6]. Сын, Аляксандр Міхайлавіч Недзьведзь, — вучоны ў галіне біяфізікі і тэхнічнай кібернетыкі, доктар тэхнічных навук (2013), прафесар, дэкан факультэта прыкладной матэматыкі і інфарматыкі Беларускага дзяржаўнага ўніверсітэта[7].
Зноскі
- ↑ а б https://web.archive.org/web/20180120224635/https://www.bsmu.by/page/11/2648/
- ↑ НЕДЗЬВЕДЗЬ Міхаіл Канстанцінавіч // Беларуская энцыклапедыя: У 18 т. Т. 11: Мугір — Паліклініка / Рэдкал.: Г. П. Пашкоў і інш. — Мн. : БелЭн, 2000. — Т. 11. — С. 268. — 10 000 экз. — ISBN 985-11-0035-8. — ISBN 985-11-0188-5 (т. 11).
- ↑ БГМУ, персоналии: Недзьведь Михаил Константинович(недаступная спасылка). Архівавана з першакрыніцы 20 студзеня 2018. Праверана 8 сакавіка 2021.
- ↑ БГМУ, кафедра патологической анатомии: профессорско-преподавательский состав(недаступная спасылка). Архівавана з першакрыніцы 5 лістапада 2016. Праверана 8 сакавіка 2021.
- ↑ РНПЦ неврологии и нейрохирургии: 1 декабря 2019 г. на 82 году жизни скоропостижно скончался профессор Недзьведь Георгий Константинович(недаступная спасылка). Архівавана з першакрыніцы 26 кастрычніка 2020. Праверана 8 сакавіка 2021.
- ↑ НЕДЗЬВЕДЗЬ МІХАІЛ КАНСТАНЦІНАВІЧ — шорт-ліст да 75-годдзя з дня нараджэння
- ↑ Факультет прикладной математики и информатики: НЕДЗЬВЕДЬ АЛЕКСАНДР МИХАЙЛОВИЧ — Биография(недаступная спасылка). Архівавана з першакрыніцы 18 красавіка 2021. Праверана 8 сакавіка 2021.
Літаратура[правіць | правіць зыходнік]
- Недзведзь Міхаіл Канстанцінавіч // Беларуская энцыклапедыя: У 18 т. Т. 11: Мугір — Паліклініка / Рэдкал.: Г. П. Пашкоў і інш. — Мн. : БелЭн, 2000. — Т. 11. — 560 с. — 10 000 экз. — ISBN 985-11-0035-8. — ISBN 985-11-0188-5 (т. 11).
- Недзьведь Михаил Константинович // Регионы Беларуси : энциклопедия : в 7 т. Минск, 2009. Т. 1, кн. 2. С. 137.
- Недзьведь Михаил Константинович // Кто есть кто в Республике Беларусь. Деловой мир СНГ. Вып. 3. Минск : Энциклопедикс, 2006. С. 264.
- Недзьведь М. К. // Учёные Пинщины: справочное издание / авт.-сост. И. А. Кибак, П. Н. Синкевич. Минск : Экономика и право, 2003. С. 85.
- Нарадзіліся 28 жніўня
- Нарадзіліся ў 1941 годзе
- Нарадзіліся ў Пінску
- Выкладчыкі БДМУ
- Дактары медыцынскіх навук
- Прафесары
- Выпускнікі БДМУ
- Выдатнікі аховы здароўя Беларусі
- Узнагароджаныя Ганаровай граматай Міністэрства аховы здароўя Рэспублікі Беларусь
- Асобы
- Вучоныя паводле алфавіта
- Патолагаанатамы СССР
- Патолагаанатамы Беларусі
- Ганаровыя грамадзяне Пінска