Касцёл Найсвяцейшай Дзевы Марыі (Чавусы)

З Вікіпедыі, свабоднай энцыклапедыі
Каталіцкі храм
Касцёл Найсвяцейшай Дзевы Марыі
53°48′10″ пн. ш. 30°57′13″ у. д.HGЯO
Краіна  Беларусь
Горад Чавусы
Канфесія Рымска-каталіцкая царква
Епархія Мінска-Магілёўская архідыяцэзія
Дэканат Магілёўскі дэканат 
Архітэктурны стыль авангард
Першае згадванне 1651
Будаўніцтва 19972002 гады
Map

Касцёл Найсвяцейшай Дзевы Марыі — мураваны каталіцкі храм у горадзе Чавусы Магілёўскай вобласці. Знаходзіцца на вуліцы Фрунзэ, 27.

Гісторыя[правіць | правіць зыходнік]

Рынак. Касцёл і кляштар кармелітаў, 1905 год

Парафія існуе з 1651 года. Да 1832 года ў Чавусах дзейнічаў кляштар кармелітаў, але пасля паўстання 1830—1831 гадоў айцы кармеліты былі выгнаны, а парафія стала філіялам чэрыкаўскага касцёла. Пасля паўстання 1863—1864 гадоў касцёл быў закрыты і знаходзіўся ў запусценні. У 1868 годзе будынак касцёла быў перададзены пад юрысдыкцыю праваслаўнай царквы.

У 1913 годзе жыхары Чавусаў пабудавалі новы неагатычны касцёл Дзевы Марыі — Каралевы. Пасля Другой сусветнай вайны, падчас хрушчоўскай антырэлігійнай кампаніі быў разабраны на цэглу ў канцы 1950-х — пачатку 1960-х гадоў[1][2].

17 снежня 1994 года ў прыватным доме была здзейснена першая літургія адроджанай парафіі ў Чавусах. Ад вясны 1995 года вернікі сталі збірацца на могілках, дзе кожную суботу здзяйснялася літургія. Праз нейкі час была афіцыйна зарэгістраваная парафія Найсвяцейшай Дзевы Марыі — Маці Касцёла.

Увосень 1996 года ксёндз Караль Тамэцкі набыў дом пад часовую капліцу. Летам 1997 года ў парафію быў прызначаны новы пробашч Францішак Рудзь, які вырашыў пабудаваць новы касцёл. Тэрыторыя пад будынак была асвечана 31 жніўня 1999 года.

1 чэрвеня 2002 года касцёл быў асвечаны кардыналам Казімірам Свёнткам, архібіскупам Мінска-Магілёўскай архідыяцэзіі. З 5 жніўня 2007 года ў парафіі працуюць манахі з Ордэна Пабожных Школаў (айцы піяры)[3].

Архітэктура[правіць | правіць зыходнік]

Будынак цяперашняга касцёла — твор сучаснай авангарднай архітэктуры. Вырашаны прамавугольным у плане аб’ёмам пад двухсхільным дахам, які над фасадам завершаны прамавугольнай сценкай-званічкай з люкарнай па цэнтры. Да алтарнай сцяны далучана паўкруглая апсіда пад канічным пакрыццём, крапаваная высокай і глыбокай аркатурай. Плоскасныя бакавыя фасады рытмічна расчлянёны ўзнятымі пад карніз даху стральчатымі аконнымі праёмамі, ліштвы якіх выступаюць і ствараюць гафрыраваны пояс уздоўж яго.

Паралельна побач з храмам пастаўлена аднапавярховая прамавугольная ў плане плябанія, злучаная з алтарнай часткай храма крылом-пераходам.

Пробашчы[правіць | правіць зыходнік]

  • Караль Тамэцкі.
  • Францішак Рудзь.
  • Гжэгаж Ксёнжак.

Зноскі

  1. Касцёл кармэлітаў
  2. Парафія Дзевы Марыі
  3. Гісторыя парафіі ў Чавусах(недаступная спасылка). Архівавана з першакрыніцы 19 жніўня 2022. Праверана 21 студзеня 2020.

Літаратура[правіць | правіць зыходнік]

Спасылкі[правіць | правіць зыходнік]