Павел Андрэевіч Місько

Павел Андрэевіч Місько
Асабістыя звесткі
Псеўданімы	Андрэеў П., Жытнёвы П., Шумскі П. і Эхінопсіс Вульгарыс
Дата нараджэння	14 сакавіка 1931(1931-03-14)
Месца нараджэння	Старцавічы, Сераднікоўскі сельсавет, Слуцкі раён, БССР, СССР
Дата смерці	9 чэрвеня 2011(2011-06-09) (80 гадоў)
Месца смерці	Мінск, Беларусь
Грамадзянства	СССР  Беларусь
Альма-матар	філалагічны факультэт БДУ Школа № 10 імя С. Ф. Рубанава
Месца працы	Звязда Сельская газета Літаратура і мастацтва Полымя Мастацкая літаратура
Прафесійная дзейнасць
Род дзейнасці	публіцыст, перакладчык, пісьменнік, паэт, дзіцячы пісьменнік, драматург
Жанр	дзіцячая літаратура, проза і паэзія
Мова твораў	беларуская
Грамадская дзейнасць
Член у	Саюз пісьменнікаў СССР

Павел Андрэевіч Місько (14 сакавіка 1931, в. Старцавічы, цяпер Знамя, Слуцкі раён — 9 чэрвеня 2011) — беларускі пісьменнік, празаік, паэт, публіцыст.

Біяграфічныя звесткі

Нарадзіўся ў сялянскай сям’і. Скончыў філалагічны факультэт Беларускага дзяржаўнага ўніверсітэта (1955). Працаваў адказным сакратаром, намеснікам рэдактара давыд-гарадоцкай раённай газеты «Сцяг Леніна». У 1959—1964 гадах — уласны карэспандэнт газеты «Звязда» па Гродзенскай вобласці, у 1964—1967 — літаратурны супрацоўнік «Сельскай газеты», у 1967—1971 — загадчык аддзела культуры рэдакцыі штотыднёвіка «Літаратура і мастацтва», у 1971—1972 — загадчык аддзела навукі і мастацтва часопіса «Полымя». З 1972 года — загадчык рэдакцыі прозы, у 1976—1980 гадах — намеснік галоўнага рэдактара выдавецтва «Мастацкая літаратура». Член Саюза пісьменнікаў СССР з 1968 года.

Творчасць

Друкуецца з 1954 года. Як пісьменнік дэбютаваў апавяданнем у 1958 годзе (альманах «Брэст»). Першы зборнік апавяданняў і аповесцей «Калодзеж» (1967). Кнігі нарысаў «Гаспадыні свайго лёсу» (1968), «Дрэва жыцця» (1973), аповесць «Ціхае лета» (1973), раман «Градабой» (1980) прысвечаны пасляваеннай вёсцы. Падзеі Вялікай Айчыннай вайны адлюстраваў у аповесцях «Поезд ішоў на захад» (1972), «Калянае лісце» (1974), рамане «Мора Герадота» (1976). Ваеннае і пасляваеннае жыццё паказаў у рамане «Хлопцы, чые вы будзеце…» (ч. 1-2, 1990-94). Аўтар дэтэктыўна-фантастычнай аповесці «Ніль адмірары, або Я выбіраю смерць» (1999). Творчасці Паўла Місько ўласцівыя ўвага да бытавой стыхіі народнага жыцця, шчырыя адносіны да чалавека працы, жывое шматколернае народнае слова.

Аўтар зборнікаў сатыры і гумару «Дзівак-чалавек» (1972), «Чэрці ў коміне» (1978), «Вясельны марафон» (1984), «Лекцыя з падвывам» (1988), «Развітальная гастроль» (1991), аднаактовых п’ес «Ліха крадзецца ціха» (1976), «Канфлікт мясцовага значэння» (калектыўны зборнік «Радзіма мая дарагая», 1989) і інш.

У творы для дзяцей уваходзіць прыгодніцкі і фантастычны элемент (кнігі «Падарожжа ў калгас», 1970; «Зямля ў нас такая», 1971; «Навасёлы, або Праўдзівая, часам вясёлая, часам страшнаватая кніга пра незвычайны месяц у жыцці Жэні Мурашкі», 1972; «Прыгоды Бульбобаў», 1977; «Грот афаліны»,1985; «Эрпіды на планеце Зямля», 1987; «Прыйдзі, дзень-залацень!», 1993, і інш.).

Пісаў вершы. Выдаў зборнік «Ружовыя ліўні» (2001), раман у вершах «Пакуль зямлю мілуе сонца…» (2005).

Пераклаў на беларускую мову паэму М. Гогаля «Мёртвыя душы», казку П. Яршова «Канёк-гарбунок», паасобныя творы У. Цендракова, У. Лічуціна, Я. Носава, В. Бялова, К. Чукоўскага, перакладаў таксама з украінскай, польскай і балгарскай моў.

Бібліяграфія

• Выбраныя творы. Т. 1-2. Мн., 1991.
• «Адмаўленне ад крыжа». Кніга нарысаў. 1964 г.
• «Калодзеж». Зборнік апавяданняў і аповесцей. 1967 г.
• «Гаспадыні свайго лёсу». Кніга нарысаў. 1968 г.
• «Падарожжа ў калгас». Дакументальная аповесць. 1970 г.
• «Зямля ў нас такая». Кніга прозы для дзяцей. 1971 г.
• «Навасёлы, або Праўдзівая, часам вясёлая, часам страшнаватая кніга пра незвычайны месяц у жыцці Жэні Мурашкі». Кніга прозы для дзяцей. 1972 г.
• «Дзівак-чалавек». Зборнік гумару. 1972 г.
• «Дрэва жыцця». Кніга нарысаў. 1973 г.
• «Калянае лісце». Зборнік апавяданняў і аповесцей. 1974 г.
• «Мора Герадота». Раман. 1976 г.
• «Прыгоды Бульбобаў». Кніга прозы для дзяцей. 1977 г.
• «Чэрці ў коміне». Зборнік гумару. 1978 г.
• «Градабой». Раман. 1980 г.
• «Вясельны марафон». Зборнік гумару. 1984 г.
• «Грот афаліны». Кніга прозы для дзяцей. 1985 г.
• «Эрпіды на планеце Зямля». Кніга прозы для дзяцей. 1987 г.
• «Лекцыя з падвывам». Зборнік гумару. 1988 г.
• «Хлопцы, чые вы будзеце…». Раман. Кніга першая. 1990 г.
• «Мёртвыя душы». Пераклад на беларускую мову паэмы М. В. Гогаля. 1990 г.
• «Развітальная гастроль». 1991 г.
• «Прыйдзі, дзень-залацень!». Казкі дзеда Аўласкі і бабы Параскі.1993 г.
• «Хлопцы, чые вы будзеце…». Раман. Кніга другая. 1994 г.
• «Ніль адмірары, або Я выбіраю смерць». Аповесць (часопісны варыянт).1999 г.
• «Ружовыя ліўні». Зборнік вершаў. 2001 г.
• «Пакуль зямлю мілуе сонца…». Раман у вершах. 2005 г.
• «Прыгавораны да жыцця». Апавяданне, аповесці. 2007.
• «Востраў „Мёртвая галава“». Аповесць.
• «Зялёныя змеі». Аповесць.

Літаратура

• Юрэвіч У. Абрысы. — Мн., 1976.
• Шупенька Г. Цеплыня чалавечнасці. — Мн., 1977.
• Дзюбайла П. Беларускі раман. Гады 70-я. — Мн., 1982.
• Андраюк С. Жыць чалавекам. — Мн., 1983.
• Савік Л. Каб не астыла цяпло зямлі. — Мн., 1984.
• Місько́ Павел Андрэевіч // Беларусь: энцыклапедычны даведнік / Рэдкал. Б. І. Сачанка (гал. рэд.) і інш.; Маст. М. В. Драко, А. М. Хількевіч. — Мн.: БелЭн, 1995. — С. 497. — 800 с. — 5 000 экз. — ISBN 985-11-0026-9.
• Беларуская энцыклапедыя: У 18 т. Т. 10: Малайзія — Мугаджары / Рэдкал.: Г. П. Пашкоў і інш. — Мн. : БелЭн, 2000. — Т. 10. — С. 475. — 10 000 экз. — ISBN 985-11-0035-8. — ISBN 985-11-0169-9 (т. 10).

Спасылкі

• Прыгоды Бульбобаў (поўны тэкст па-беларуску)
• «Як на нашы імяніны…» (поўны тэкст па-беларуску)
• Пётр Яршоў. «Канёк-гарбунок». Пераклад Паўла Місько (поўны тэкст па-беларуску)
• Адарка і пацукі. Апавяданне. Архівавана 2 чэрвеня 2015. (поўны тэкст па-беларуску)
• Эрпіды на планеце Зямля. Аповесць. (поўны тэкст па-беларуску)
• Зямны вандроўнік: да 90-годдзя Паўла Місько // Маладзечанская цэнтральная раённая бібліятэка імя Максіма Багдановіча