Беларуская дзяржаўная філармонія
| Беларуская дзяржаўная філармонія | |
|---|---|
.jpg) | |
| Заснаваны | 25 красавіка 1937 |
| Архітэктар | Георгій Міхайлавіч Бенядзіктаў |
| Сайт | philharmonic.by |
 |
|
Беларуская дзяржаўная філармонія, Установа «Беларуская дзяржаўная ордэна Працоўнага Чырвонага Сцяга філармонія» — філармонія ў горадзе Мінску. Архітэктар будынка — Г. М. Бенядзіктаў.
Гісторыя[правіць | правіць зыходнік]
Афіцыйна адкрылася 25 красавіка 1937 года ў складзе сімфанічнага аркестра, аркестра беларускіх народных інструментаў, Беларускага ансамбля народнай песні і танца і Беларускай харавой капэлы. Спачатку не мела нават свайго памяшкання. Першы галоўны дырыжор сімфанічнага аркестра Белдзяржфілармоніі Ілья Мусін успамінаў: «Канцэртнай залай філармоніі служыла памяшканне клуба. Няўтульнае, пустое фае, гэткая ж непрывабная зала. Замест эстрады — тыповая клубная сцэна з кужэльнымі парталамі. Акустыка агідная. Нядзіўна, што гэта памяшканне не спрыяла прыцягненню слухачоў»[1].
У красавіку 1963 года адбылося адкрыццё канцэртнай залы (930 месцаў, раён плошчы Я. Коласа, Бульвар Мулявіна).
На працягу двух гадоў праводзіліся рамонтныя работы, была палепшана акустыка залы, падсвятленне. Колькасць месцаў у Вялікай зале было скарочана да 688 і адкрыта Малая зала імя Р. Шырмы (200 месцаў).
26 студзеня 2005 года адбыўся першы канцэрт у абноўленай зале.
Пасля масавых фальсіфікацый на прэзідэнцкіх выбарах 2020 года, жорсткага разгону акцый пратэстаў, збіцця і катаванняў затрыманых пратэстоўцаў, калектыў філармоніі выйшаў 13 жніўня на акцыю пратэсту з плакатамі «У мяне скралі голас»[2]. Харавая капэла імя Рыгора Шырмы выканала на прыступках будынка песню «Магутны Божа»[3]. Супрацоўнікі філармоніі напрацягу 2 тыдняў выходзілі на акцыі пратэстаў, выконваючы таксама «Купалінку», «Пагоню» М. Багдановіча, «Разбуры турмы муры» і іншыя песні як на плошчы Якуба Коласа, так і перад МТЗ[4], у крытым павільёне Камароўскага рынку[5], на станцыі метро «Купалаўская», у атрыумах гандлёвых цэнтраў «Сталіца» і «Галерэя».
Архітэктура[правіць | правіць зыходнік]
Будаўніцтва вялося з 1955 года на паўторна выкарыстанаму праекту, які ў 1959 годзе пасля завяршэння агульных работ перапрацаваны архітэктарам Г. Бенядзіктавым з улікам спецыфікі прызначэння. Будынак адкрыты ў 1963 годзе. Трохпавярховы прамавугольны ў плане аб’ём з двухсхільным дахам. У 1983 годзе да тарца будынка дабудавана пяціпавярховае крыло. Галоўны фасад аформлены порцікамі з 6 канеліраванымі слупамі і трохвугольным франтонам. На бакавых фасадах вылучаюцца паўкруглыя эркеры лесвіц фае. Фасады па тынкоўцы аформлены пад блочную муроўку і завершаны магутным карнізам. Прасценкі паміж вокнамі бакавых фасадаў крапаваны шырокімі лапаткамі з арнаментальнымі паясамі ў завяршэнні. Вокны ў прафіляваным абрамленні з падаконнымі філёнгамі[6].
Канцэртная зала (996 месцаў) вырашана ў форме амфітэатра. Устаноўлены арган работы чэшскіх майстроў. Двухсветлавое фае з антрэсольнай галерэяй мае каланаду. Інтэр'ер аздоблены габеленам «Музыка» (1976; аўтары В. Нямцоў, У. Ткачоў, А. Яскін)[6].
Творчыя калектывы[правіць | правіць зыходнік]
- Дзяржаўны акадэмічны сімфанічны аркестр Рэспублікі Беларусь
- Нацыянальны акадэмічны народны аркестр Рэспублікі Беларусь імя І. Жыновіча
- Заслужаны калектыў Дзяржаўная акадэмічная харавая капэла Рэспублікі Беларусь імя Р. Шырмы
- Дзяржаўны камерны аркестр Рэспублікі Беларусь
- Дзяржаўны камерны хор Рэспублікі Беларусь
- Ансамбль салістаў «Класік-авангард»
- Мінскі струнны квартэт
- Ансамбль салістаў пад кіраваннем І.Іванова
- Беларускі дзяржаўны ансамбль народнай музыкі «Свята»
- Ансамбль «Камерата»
- Фальклорная група «Купалінка»
- Канцэртна-гастрольны аддзел
- Філармонія для дзяцей і юнацтва
- Беларускі паэтычны тэатр аднаго акцёра «Зніч»
Дырэктары[правіць | правіць зыходнік]
- Рыгор Прагін (1937—1951)
- Ігар Андрэеў (1999—2002)
- Аляксандр Гарбар (2004—2020)
- Аляксандр Нікіта (з 2020)
Адлюстраванне ў культуры[правіць | правіць зыходнік]
- У 2008 годзе выйшаў у свет дакументальны фільм «Адкрыты сезон» у гонар 70-годдзя філармоніі (РУП «Беларускі відэацэнтр», рэж. Аляксандр Старчанка)
Зноскі
- ↑ Гісторыя Беларускай дзяржаўнай філармоніі
- ↑ Хор Белорусской филармонии вышел протестовать с плакатами «У меня украли голос». И спел
- ↑ МИР. Государственная академическая хоровая капелла им. Ширмы
- ↑ Артысты Мінска прыехалі да МТЗ, каб заспяваць для бастуючых рабочых ВІДЭА
- ↑ На Комаровском рынке исполнили песню «Пагоня».
- ↑ а б А. М. Кулагін. 152. Будынак Беларускай дзяржаўнай філармоніі // Збор помнікаў гісторыі і культуры Беларусі / АН БССР. Ін-т мастацтвазнаўства, этнаграфіі і фальклору; Рэд. кал.: С. В. Марцэлеў (гал. рэд.) і інш. — Мн.: БелСЭ, 1988. — Мінск. — 333 с.: іл. — ISBN 5-85700-006-8.
Літаратура[правіць | правіць зыходнік]
- А. М. Кулагін. 152. Будынак Беларускай дзяржаўнай філармоніі // Збор помнікаў гісторыі і культуры Беларусі / АН БССР. Ін-т мастацтвазнаўства, этнаграфіі і фальклору; Рэд. кал.: С. В. Марцэлеў (гал. рэд.) і інш. — Мн.: БелСЭ, 1988. — Мінск. — 333 с.: іл. — ISBN 5-85700-006-8.
Спасылкі[правіць | правіць зыходнік]
На Вікісховішчы пакуль няма медыяфайлаў па тэме, але Вы можаце загрузіць іх- Афіцыйны сайт Белдзяржфілармоніі Архівавана 10 чэрвеня 2016.
