Дубраўка (Дубраўскі сельсавет)

Аграгарадок Дубраўка Краіна Беларусь Вобласць Мінская Раён Пухавіцкі Сельсавет Дубраўскі Каардынаты 53°27′07″ пн. ш. 28°06′46″ у. д. Водныя аб’екты Талька Насельніцтва ▼730 чал. (2019) Часавы пояс UTC+3 Тэлефонны код +375 1713 Аўтамабільны код 5 СААТА 6244870021 Дубраўка на карце Беларусі ±

Дубраўка на Вікісховішчы

Ду́браўка (трансліт.: Dubraŭka, руск.: Дубровка) — аграгарадок у Пухавіцкім раёне Мінскай вобласці. Уваходзіць у склад Дубраўскага сельсавета. Месціцца за 10 км на поўдзень ад Мар’інай Горкі, 65 км ад Мінска, каля ракі Таль.

Назва

Паселішча, верагодна, заснавана ва ўрочышчы, дзе расло шмат дубоў.

Гісторыя

Ранняя гісторыя

У XVIII стагоддзі ў Менскім павеце Менскага ваяводства Вялікага Княства Літоўскага, паселішча адносілася да маёнтка Навасёлкі ўласнасці Барэцкай.

У выніку другога падзелу Рэчы Паспалітай 1793 года тэрыторыя апынулася ў складзе Расійскай імперыі. У XIX стагоддзі ў Ігуменскім павеце Мінскай губерні. У 1885 годзе ўрочышча ў Амяльнянскай воласці Ігуменскага павета. У 1897 годзе былі аднайменныя фальварак і вартоўня.

Паводле перапісу 1917 года былі аднайменныя маёнтак і ўрочышча.

Найноўшы час

З канца лютага 1918 года тэрыторыя акупаваная войскамі Германскай імперыі. 25 сакавіка 1918 года згодна з Трэцяй Устаўной граматай абвяшчалася часткай Беларускай Народнай Рэспублікі. Жыхары Амяльнянскай воласці накіроўвалі звароты ў Народны Сакратарыят Беларусі са скаргамі на дзеянні нямецкіх акупацыйных улад. У снежні 1918 года занята Чырвонай Арміяй, з 1 студзеня 1919 года ў адпаведнасці з пастановай І з’езда КП(б) Беларусі яна ўвайшла ў склад Савецкай Беларусі, з 27 лютага 1919 года — у ЛітБел ССР. У час польска-савецкай вайны ў жніўні 1919 — ліпені 1920 гадоў пад акупацыяй Польшчы (Мінская акруга ГУУЗ).

З 31 ліпеня 1920 года ў Беларускай ССР. У 1926 годзе паселішча мела статус пасёлка. У пачатку 1930-х праведзена прымусовая калектывізацыя, створаны калгасы «Краіна Саветаў» і «Спаборнік», працавалі 2 кузні.

У Другую сусветную вайну з канца чэрвеня 1941 года да 3 ліпеня 1944 года пад акупацыяй Германіі. У жніўні 1941 года пасёлак спалены, загінула 7 жыхароў. Пасля вайны населены пункт адноўлены.

У 1960 годзе былі вёскі Дубраўка 1 і Дубраўка 2 у Сінчанскім сельсавеце.

З 23 ліпеня 1984 года цэнтр сельсавета.

Насельніцтва

• 1897 год — фальварак, 29 жыхароў; вартоўня, 5 жыхароў
• 1917 год — маёнтак, 42 жыхары; урочышча, 5 жыхароў
• 1926 год — 20 гаспадарак, 99 жыхароў
• 1960 год — Дубраўка 1, 131 жыхар; Дубраўка 2, 135 жыхароў
• 2002 год — 268 двароў, 858 жыхароў
• 2010 год — 275 гаспадарак, 824 жыхары
• 2012 год — 274 гаспадаркі, 813 жыхароў
• 2019 год — 730 жыхароў

Вядомыя выхадцы

• Андрэй Максімавіч Варанецкі — настаўнік, старшыня калгас. Герой Сацыялістычнай Працы (1966).

Інфраструктура

Эканоміка

• Ашчадная каса
• Аддзяленне сувязі
• Рамонтна-механічныя майстэрні
• Крама

Адукацыя

• Дубраўская сярэдняя школа

Культура

• Бібліятэка
• Дом культуры

Медыцына

• Амбулаторыя
• Ветэрынарны ўчастак

Літаратура

• Дуброўка // Гарады і вёскі Беларусі: Энцыклапедыя. Т. 8: Мінская вобласць, кн. 4 / рэдкал.: Т. У. Бялова (дырэктар) і інш. — Мн.: Беларуская Энцыклапедыя імя Петруся Броўкі, 2013. — С. 135—136. — 2 000 экз. — ISBN 978-985-11-0735-9.
• Памяць: Пухав. р-н: Гіст.-дак. хронікі гарадоў і р-наў Беларусі / Укл. А. А. Прановіч; Рэдкал.: А. М. Карлюкевіч і інш.. — Мінск: Беларусь, 2003. — 749 с. — ISBN 985-01-0251-9.

Спасылкі

• На Вікісховішчы ёсць медыяфайлы па тэме Дубраўка (Дубраўскі сельсавет)