Чэмпіёны грамадзянскай супольнасці

З пляцоўкі Вікіпедыя
Jump to navigation Jump to search
Чэмпіёны грамадзянскай супольнасці

Прэмія «Чэмпіёны грамадзянскай супольнасці» (англ.: Civil Society Champions award) — штогадовая прэмія, якой адзначаюцца найбольш значныя, выбітныя і яскравыя асобы, арганізацыі і падзеі знакавыя для развіцця беларускага трэцяга сектара. Прэмія заснавана Асамблеяй няўрадавых дэмакратычных арганізацый Беларусі (далей — Асамблея НДА) у 2009 годзе. Першая цырымонія ўзнагароджання адбылася 23 снежня 2009 года ў Мінску.[1]

Ідэі прэміі[правіць | правіць зыходнік]

Ідэя — адзначыць найбольш паспяховыя рэалізаваныя крэатыўныя ідэі ў грамадскім сектары, вызначыць усе цікавыя падзеі года ў жыцці грамадзянскай супольнасці і прыцягнуць да іх увагу беларускага грамадства.[2]

Працэдура вызначэння пераможцаў[правіць | правіць зыходнік]

Пералік намінацый прэміі вызначаецца Праўленнем Асамблеі НДА. Сябры Рабочай групы Асамблеі НДА прапаноўваюць кандыдатаў на кожную намінацыю з абгрунтаваннем яе вылучэння. Шорт-ліст складае Праўленне. Максімальная колькасць намінантаў па кожнай намінацыі 7. За пераможцаў галасуюць сябры Рабочай групы, кіраўнікі і эксперты ўплывовых беларускіх грамадскіх аб’яднанняў, лаўрэаты прэміі «Чэмпіёны грамадзянскай супольнасці» мінулых гадоў. Галасаваць можна толькі за адну кандыдатуру ў кожнай намінацыі. Пераможцам абвяшчаецца кандыдат, які набраў найбольшую колькасць галасоў. Вынікі галасавання зацвярджаюцца Праўленнем Асамблеі НДА.[3]

Намінацыі[правіць | правіць зыходнік]

  • Грамадскі лідар года — уручаецца грамадскаму дзеячу за яго ўнёсак у развіццё грамадзянскай супольнасці Беларусі ў бягучым годзе. Улічваюцца ягоны ўплыў на грамадскі сектар, аўтарытэт і дасягненні.
  • Кампанія года — уручаецца ініцыятарам і/або прадстаўнікам найбольш значнай агульнанацыянальнай кампаніі, праведзенай НДА ў бягучым годзе. Улічваецца важнасць паднятай тэмы, маштаб кампаніі, дасягнутыя вынікі, а таксама розгалас у СМІ.
  • Новая ініцыятыва — уручаецца прадстаўнікам новай грамадзянскай ініцыятывы, якая распачала сваю дзейнасць у бягучым годзе. Улічваецца актуальнасць абранага кірунку дзейнасці і важнасць ініцыятывы для мэтавай аўдыторыі.
  • Рэгіянальная падзея — уручаецца ініцыятарам найбольш значнай рэгіянальнай грамадскай акцыі/кампаніі/падзеі. Улічваецца маштаб падзеі, дасягнутыя вынікі і розгалас пра падзею ў агульнанацыянальным маштабе.
  • Месца года — уручаецца прадстаўнікам адміністрацыі памяшкання, якое актыўна выкарыстоўваецца ў дзейнасці НДА. Улічваецца даступнасць месца для грамадскіх актывістаў і ягоная папулярнасць.
  • Крэатыў года — уручаецца ініцыятарам найбольш яскравай і крэатыўнай грамадскай акцыі/кампаніі/ падзеі. Улічваецца нестандартны падыход да актуалізацыі грамадсказначнай тэмы.
  • «Гарбуз» года — уручаецца за негатыўныя дзеянні ў дачыненні да арганізацый грамадзянскай супольнасці і іх прадстаўнікоў.
  • Медыя/журналіст года — уручаецца за найбольш грунтоўнае і рознабаковае асвятленне грамадскай дзейнасці ў масмедыя. Улічваецца адкрытасць да супрацоўніцтва з НДА і асвятленне актуальных для няўрадавага сектара тэмаў.
  • Найлепшы сайт НДА (Медыяактыўнасьць года) — уручаецца найбольш прыкметнаму ў бягучым годзе сайту няўрадавай арганізацыі ці ініцыятывы. Улічваюцца ягоная наведвальнасць, абнаўляльнасць, зручнасць падачы інфармацыі, карысць для мэтавай аўдыторыі і прамоцыі грамадскай дзейнасці ў Беларусі.
  • Партнёрства года — уручаецца за салідарныя дзеянні і рэалізацыю найлепшай ініцыятывы, якая аб’яднала партнёраў з розных сфер і сектараў на карысць грамадзянскай супольнасці. Улічваецца колькасць партнёраў і сацыяльная важнасць увасобленых імі імпрэзаў або кампаній.
  • Талака года — уручаецца за найбольш паспяховае далучэнне да грамадскай актыўнасці людзей праз краўдфандынг, супольныя акцыі, валанцёрства і іншыя формы дзейнасці. Улічваецца колькасць удзельнікаў, важнасць тэматыкі, дасягнутыя вынікі і трываласць далучанасці да грамадскай дзейнасці.

Пераможцы 2009 года[4][правіць | правіць зыходнік]

23 снежня 2009 года ўпершыню адбылася нефармальная цырымонія ўзнагароджання найбольш выбітных грамадскіх ініцыятыў ды кампаній.

  • Нерэгістрацыя года — Міністэрства юстыцыі Рэспублікі Беларусь.
  • Грамадзянская кампанія года — супольная ініцыятыва беларускіх праваабаронцаў «Праваабаронцы супраць смяротнага пакарання ў Беларусі».[5]
  • Рэгіянальная падзея года — масавы Форум Асамблеі НДА Магілёўскай вобласці, які сабраў пад адным дахам больш за 80 актывістаў дэмакратычных аб’яднанняў Магілёўшчыны.[6]
  • Крэатыў года — выправа Дзядоў Марозаў у пракуратуру, якія дамагаюцца адмены крымінальнага артыкула 193.1 у межах кампаніі Stop 193.1.[7]
  • За дзейсную дабрыню — група ініцыятыўных блогераў, якія самаарганізаваліся дзеля дапамогі дзіцячаму дому.
  • За чалавечнае стаўленне да жывёлаў — кампанія ў абарону бяздомных жывёлаў, якая ладзілася цэлым шэрагам арганізацый і асобаў: грамадскімі аб’яднаннямі «Эгіда» і «Ратаванне», «Абаронім жыццё», «Заасвет», былымі валанцёрамі «Фаўна гораду», «Ініцыятыва», «Беларуская музычная альтэрнатыва» ды інш.
  • Найбольш абсурдная адмова года — галоўнае ўпраўленне юстыцыі Гродзенскага аблвыканкама. Чыноўнікі адмовілі ў рэгістрацыі грамадскай арганізацыі «Залаты леў», таму што «ў тэксце статута арганізацыі адсутнічае расшыфроўка назвы „Залаты леў“».[8]

Пераможцы 2010 года[9][правіць | правіць зыходнік]

21 лютага 2011 года ў Галерэі «Ў» прадстаўнікі Асамблеі НДА адзначылі найбольш значныя ў 2010 годзе ініцыятывы. 2010 год прайшоў пад знакам прэзідэнцкай кампаніі. Аднак, грамадскія ініцыятывы і аб’яднанні спраўна дзейнічалі ў неспрыяльных умовах. 19 снежня 2010 адбыўся жорсткі разгон акцыі пратэсту супраць фальсіфікацыі выбараў, шэраг палітыкаў, грамадскіх актывістаў, журналістаў апынуліся ў турмах.[10] Салідарнасць і ўзаемную павагу можна адзначыць як асноўны прынцып дзейнасці трэцяга сектару ў 2010 годзе.

  • Кампанія года — ініцыятыва Беларускага Хельсінкскага камітэта і Праваабарончага цэнтру «Вясна» «Праваабаронцы за свабодныя выбары».
  • Грамадскі лідар года — старшыня Беларускай Асацыяцыі журналістаў, сябра Рабочай групы Асамблеі НДА, Жана Літвіна.
  • Рэгіянальная падзея года — Фэст маладзёжнай журналістыкі «Твой стыль», які адбыўся ў Гродне і ў якім прымалі ўдзел каля 150 рэпарцёраў-пачаткоўцаў.
  • Акцыя года — Акцыя Салідарнасці з рэпрэсаванымі 19-20 снежня.[11]
  • Нечаканая рэгістрацыя года — Асацыяцыя дадатковай адукацыі і асветы, якой першапачаткова было адмоўлена ў рэгістрацыі, пасля чаго адмова паспяхова была аспрэчана ў судзе.[12]
  • Адмова года — аб’яднанне «Берасцейская вясна». Колькасць адмоваў у рэгістрацыі арганізацыі наблізілася да дзесяці.[13]
  • Асяродак грамадзянскай супольнасці — Кнігарня «Ў».
  • Выкарыстанне віртуальнай прасторы ў грамадскай дзейнасці — блогер Zmagarka (Таццяна Елавая), якая правяла ў Інтэрнэце грамадскае расследаванне па падзеях 19 — 20 снежня.[14]

Пераможцы 2011 года[15][правіць | правіць зыходнік]

Цырымонія ўзнагароджання прайшла 7 лютага 2012 года ў Мінску ў «Арт-сядзібе». Пераможцы атрымалі ганаровыя дыпломы і гадзіннікі з выяваю персанажу Вож Проста Вож.

  • Грамадскі лідар года — праваабаронца, старшыня ПЦ «Вясна», Алесь Бяляцкі, які знаходзіцца за кратамі праз сваю праваабарончую дзейнасць. Прэмію за Алеся Бяляцкага атрымалі праваабаронцы Валянцін Стэфановіч і Таццяна Рэвяка.
  • Месца года — галерэя «Ў».
  • Найлепшая грамадская ініцыятыва — «Народны журналіст».
  • Рэгістрацыя года — Офіс па правах людзей з інваліднасцю.[16]
  • Адмова года — «Цэнтр развіцця валанцёрства» па прычыне адмовы кіраўніка цэнтру Мікалая Кванталіяні супрацоўнічаць з КДБ.[17]
  • Найлепшая кампанія года — Кампанія па зборы подпісаў за непрыняцце закону аб некамерцыйных арганізацыях, якую праводзілі супольна Асамблея НДА і Цэнтр прававой трансфармацыі «Lawtrend».
  • Найлепшая рэгіянальная падзея — Страйк супрацоўнікаў жыллёва-камунальнай гаспадаркі горада Барысава. Супрацоўнікі ЖКГ пабаяліся прыехаць у Мінск, таму прызы за іх атрымаў барысаўскі журналіст Міхаіл Васільеў, які асвятляў гэтую падзею. Разам з дыпломам, гадзіннікам і кубкам у Барысаў перадалі цвікі з бел-чырвона-белымі стужкамі як сімвал непахіснасці характару барысаўскіх пралетарыяў.[18]
  • Крэатыў года — віртуальны абменнік — сайт Prokopovi.ch. Самі стваральнікі сайту не рызыкнулі прыйсці за ўзнагародай і ў звароце папрасілі пакінуць да лепшых часоў прызы ў офісе Асамблеі НДА.[19]

Пераможцы 2012 года[20][правіць | правіць зыходнік]

1 лютага 2013 года ў Мінску ў кнігарні «Логвінаў» адбылася цырымонія ўзнагароджання.

  • Грамадскі лідар года — гродзенскі журналіст Анджэй Пачобут і выдавец часопісу ARCHE Валер Булгакаў. Узнагароды ў гэтай намінацыі давялося ўручаць дыстанцыйна.
  • Месца года — офіс праваабарончага цэнтра «Вясна».
  • Адмова года — «Арт Сядзіба».
  • Крэатыў года — плюшавы дэсант, які быў зладжаны Studio Total.
  • Кампанія года — Беларуская антыядзерная кампанія.
  • Рэгістрацыя года — Прыватная культурна-асветніцкая ўстанова «Платформ Інавэйшн»[21].
  • Новая ініцыятыва — Марафон салідарнасці «Свабоду палітвязням».[22]
  • Рэгіянальная падзея — стварэнне структураў незалежных прафсаюзаў на прадпрыемстве «Граніт» у Мікашэвічах.[23]

Пераможцы 2013 года[24][правіць | правіць зыходнік]

23 снежня 2013 года ў памяшканні «Арт Сядзібы» адбылася пятая штогадовая цырымонія ўручэння прэміі «Чэмпіёны грамадзянскай супольнасці». Сёлета паступіла рэкордная колькасць прапановаў па кожнай намінацыі — агулам больш за 160 прапановаў.

  • Грамадскі лідар года — Сяргей Міхалок, лідар гурта «Ляпіс Трубяцкі».
  • Кампанія года — агульнанацыянальная кампанія Асамблеі НДА «Зробім лепш!», удзел у якой узялі 27 грамадскіх арганізацый з 14 гарадоў Беларусі. У межах кампаніі праведзены шэраг разнастайных мерапрыемстваў, якія аб’ядналі больш за шэсць тысяч чалавек па ўсёй краіне. Кампанія завяршылася вялікім фэстам «Зробім лепш!» у мінскім клубе Re:public.[25]
  • Новая ініцыятыва — моўныя курсы «Мова ці кава», што цягам года праходзілі ў сталічнай галерэі «Ў». Прэмію атрымала аўтар курсаў журналістка Кацярына Кібальчыч.[26]
  • Рэгіянальная падзея — народныя бунты супраць ліквідацыі хатніх свіней у сувязі з небяспекаю распаўсюджання афрыканскай чумы. Атрымаць прэмію ў Мінск прыехала актыўная ўдзельніца кампаніі Кацярына Музыкантава з вёскі Сумарокава (Магілёўскі раён).[27]
  • Месца года — пляцоўка «ЦЭХ».
  • Крэатыў года — PRацоўня сацыяльнай рэкламы за крэатыўную прамоцыю НДА[28] і прыватная ініцыятыва па ўсталяванні ў Астравецкім раёне помніка паўстанцам Каліноўскага мецэнатам Мікітам Забудам[29]
  • СМІ года — інтэрнэт-тэлебачанне партала TUT.by. Статуэтку і дыплом атрымала рэдактар TUT.BY-TV Алёна Андрэева.
  • Найлепшы сайт НДА — сайт Праваабарончага цэнтра «Вясна».
  • Лапаць года — Ірына Бійнік, арганізатар велапрабегу «Стылягі на роварах». За арганізацыю велапрабегу яе прысудзілі да штрафу ў два мільёны беларускіх рублёў.

Пераможцы 2014 года[правіць | правіць зыходнік]

13 студзеня 2015 года ў Арт Сядзібе прайшла шостая цырымонія ўручэння прэміі «Чэмпіёны грамадзянскай супольнасці». Асамблея няўрадавых дэмакратычных арганізацый адзначыла выбітныя і яскравыя акцыі ў грамадскім сектары за 2014 год. Сёлета ў журы ўвайшло 100 чалавек з ліку лідараў трэцяга сектару, мінулагодніх пераможцаў і журналістаў, якія стала пішуць пра НДА.

  • Грамадскі лідар года — вядоўцы моўных шоў «Мова нанова», «Мова ці кава», «Мова веда» і «Мова TUT».
  • Кампанія года — кампанія «Пазнач сябе беларусам». Цягам 2014 года моладзь з Арт Сядзібы правяла шэраг акцый па прамоўцыі беларускіх сімвалаў, вышымаек, былі зладжаныя два Дні вышыванкі і раздадзеныя 5 кіламетраў стужкі з нацыянальным арнаментам.
  • Новая ініцыятыва — эксперты ў абарону Курапатаў. Археолагі, архітэктары, інжынеры, юрысты, культуролагі, журналісты ў 2014 годзе аб’ядналі свае намаганні, каб юрыдычна бараніць ахоўныя межы Курапатаў ад незаконнага скарачэння і забудовы.
  • Рэгіянальная падзея — Дзень памяці паўстанцаў 1863 года ў Свіслачы. У 2014 падзея адзначыла свой 20-гадовы юбілей.
  • Крэатыў года — акцыя салідарнасці футбольных фанатаў на матчы «Беларусь-Украіна», які прайшоў 9 кастрычніка на Барысаў-Арэне.
  • Журналіст/медыя года — Марат Гаравы, журналіст газеты «Новы час».
  • Найлепшы сайт НДА — інфармацыйна-метадычны партал для настаўнікаў www.nastaunik.info.
  • Гарбуз года — антыпрэмію атрымалі Упраўленне па грамадзянству і міграцыі ГУУС Мінгарвыканкама і Аддзел па грамадзянству і міграцыі Першамайскага РУУС г. Мінска за ануляванне віду на жыхарства праваабаронцы Алены Танкачовай.

Пераможцы 2015 года[правіць | правіць зыходнік]

15 студзеня 2016 года Асамблея зладзіла сёмую цырымонію ўганаравання пераможцаў прэміі «Чэмпіёны грамадзянcкай супольнасці», каб адзначыць лідараў і найбольш значныя падзеі трэцяга сектару за мінулы год. Журы складалася з 114 грамадскіх лідараў, экспертаў, журналістаў і пераможцаў мінулых гадоў, з якіх за намінантаў прагаласавала 75 чалавек.

  • Грамадскі лідар года — Святлана Алексіевіч. Атрыманне ёй Нобелеўскай прэміі аб’яднала беларусаў, а грамадская пазіцыя прымусіла задумацца пра сітуацыю ў краіне.
  • Кампанія года — кампанія салідарнасці з кадэтамі Ястрэмбельскай школы-інтэрната (#Пагоняпобач). Прэмію ўручылі ініцыятарам кампаніі — прадстаўнікам «Арт Сядзібы».
  • Новая ініцыятыва — серыя перформансаў у падтрымку людзей з абмежаванымі магчымасцямі, якую зладзілі студэнты Тэатральнай лабараторыі «Фартынбрас» пры Беларускім свабодным тэатры.
  • Рэгіянальная падзея — абарона берагу возера Балдук у Пастаўскім раёне ад забудовы. Сябры арганізацый «Зялёная сетка», «Экадом», «Ахова птушак Бацькаўшчыны» разам з мясцовымі жыхарамі з 2012 года змагаюцца супраць забудовы ля возера.
  • Партнёрства года — Гуманітарны маршрут «Беларусь-АТО». У 2015 годзе гэта намінацыя была ўведзена ўпершыню, і ўручалася за салідарныя дзеянні і рэалізацыю найлепшай ініцыятывы, якая аб’яднала партнёраў з розных сфер і сэктараў на карысць грамадзянскай супольнасці.
  • Найлепшы сайт НДА — партал adukacyja.info.
  • Крэатыў года — стрыт-арт фэст Urban Myths у Мінску.
  • Гарбуз года — антыпрэмію атрымала Міністэрства інфармацыі за загад знішчыць наклад кнігі Віталя Сіліцкага «Доўгая дарога ад тыраніі: посткамуністычны аўтарытарызм і барацьба за дэмакратыю ў Сербіі і Беларусі».
  • Медыя/журналіст года — блогер Антон Матолька.

Пераможцы 2016 года[правіць | правіць зыходнік]

23 снежня 2016 года ў Мінску прайшла восьмая цырымонія ўручэння прэміі «Чэмпіёны грамадзянскай супольнасці». Асамблея няўрадавых дэмакратычных арганізацый адзначыла найбольш выдатныя і яскравыя падзеі ў грамадскім сектары за бягучы год. Журы складалася з 116 грамадскіх лідараў, экспертаў, журналістаў і пераможцаў мінулых гадоў, а лонг-ліст намінантаў сёлета склаў 166 прапаноў.

  • Грамадскі лідар года — Зміцер Дашкевіч. Ён цягам 2016 года ініцыяваў збор подпісаў за наданне бел-чырвона-беламу сцягу статусу гістарычнай каштоўнасці, знішчыў «3,5 кв.м урадлівага слою глебы» на беларуска-расійскай мяжы, пратэставаў супраць адкрыцця графіці «Масква-Мінск» і ўсталявання помніку Леніну.
  • Кампанія года — кампанія па зборы подпісаў за наданне бел-чырвона-беламу сцягу статусу гісторыка-культурнай каштоўнасці, #нашсцяг.
  • Новая ініцыятыва — установа «Human Constanta», якая запомніліся грамадству дзеяннямі ў абарону правоў уцекачоў і мігрантаў у Брэсце.
  • Рэгіянальная падзея — кампанія ў абарону гісторыка-культурнага раёна Мінска «Асмалоўка».
  • Партнёрства года — платформа Talaka.by. На гэтай некамерцыйнай пляцоўцы актыўныя людзі знаходзяць каманду, памочнікаў і фінансы для рэалізацыі сваіх ідэй. Найбольшую падтрымку на платформе атрымліваюць ідэі ў сферы развіцця беларускай мовы і культуры.
  • Медыяактыўнасць года — онлайн-часопіс «Имена», які дае магчымасць не толькі даведацца пра гісторыі, лёс і ўчынкі беларусаў, а таксама ствараць і падтрымліваць важныя для грамадства праекты.
  • Крэатыў года — невядомы мастак, які дамаляваў калючы дрот на прапагандысцкім графіці «Мінск-Масква».
  • Гарбуз года — супрацоўнікі ГУУС Мінгарвыканкама, якія сёлета жорстка затрымалі ўдзельнікаў негвалтоўнай акцыі раварыстаў «Крытычная маса».
  • Мэдыя / журналіст года — Галіна Абакунчык, карэспандэнтка Радыё Свабода, аўтар 98 матэрыялаў пра грамадзянскую супольнасць, яе ініцыятывы і пераслед у 2016 годзе.

Пераможцы 2017 года[правіць | правіць зыходнік]

21 снежня 2017 года Асамблея НДА зладзіла дзявятую цырымонію ўганаравання пераможцаў прэміі «Чэмпіёны грамадзянcкай супольнасці», каб адзначыць выбітных асобаў і важныя падзеі трэцяга сэктара Беларусі ў 2017 годзе. Журы складалася з 110 грамадcкіх лідараў, экспертаў, журналістаў і пераможцаў мінулых гадоў, з якіх за намінантаў прагаласавала 90 чалавек.

  • Грамадскі лідар года — Сяргей Драздоўскі, каардынатар Офіса па правах людзей з інваліднасцю, рухавік кампаніі «Павестка 50». Кампанія разгарнулася ў пяці беларускіх гарадах і была накіравана на імплементацыю палажэнняў Канвенцыі аб правах людзей з інваліднасцю.
  • Кампанія года — Кампанія ў абарону Курапатаў, #курапаты.
  • Новая ініцыятыва — грамадскі рух «Дзея» ды ініцыятыва «Хайсы» з Віцебску (2 пераможцы).
  • Рэгіянальная падзея — «маршы недармаедаў» супраць дэкрэта № 3, якія прайшлі сёлета ў розных гарадах Беларусі. У акцыях бралі актыўны ўдзел грамадскія актывісты і мясцовыя жыхары. 
  • Партнёрства года — Беларускія ўікэнды. Дзякуючы ім цягам 2017 года беларускамоўныя версіі фільмаў былі паказаныя ў шэрагу кінатэатраў краіны. 
  • Медыяактыўнасць года — сацыяльныя сеткі пошукава-выратавальнага атрада «Анёл».
  • Крэатыў года — акцыя «Ноч расстраляных паэтаў» — супольная ініцыятыва Маладога Фронту і творчых асяродкаў.
  • Гарбуз года — журы вырашыла «адзначыць» антыпрэміяй крымінальную справу па «факце» навучання і падрыхтоўкі да ўдзелу ў масавых беспарадках. Па справе было затрымана больш за 30 чалавек — былых актывістаў арганізацыі «Белы легіён» і спартыўна-патрыятычнага клубу «Патрыёт». 
  • Медыя / журналіст / журналістка года — гомельскі відэаблогер Максім Філіповіч. Ягоны канал на YouTube стаў такім папулярным, што ўлады абвінавацілі Максіма ў «падмене дзяржаўных СМІ».

Пераможцы 2018 года[правіць | правіць зыходнік]

У чацвер 10 студзеня 2019 года ў культурніцкай прасторы «Корпус» у Мінску назвалі пераможцаў прэміі «Чэмпіёны грамадзянскай супольнасці». Дзясяты раз яе ўручала Асамблея НДА. У шорт-лісце было 57 намінантаў, а ў журы — 112 грамадскіх лідараў, экспэртаў і журналістаў з усёй Беларусі.

  • Грамадскі лідар года — Павел Белавус, заснавальнік «Арт Сядзібы». Адзін з арганізатараў святкавання 100-годздзя БНР, канцэрту і інфармацыйнай кампаніі #БНР100, акцыяў #добрыясловы і «Брукаванка памяці» ў Курапатах.
  • Кампанія года — кампанія па адзначэнні 100-годздзя БНР. Агульнабеларуская грамадская кампанія, якая ўцягнула мноства людзей, арганізацый, камерцыйных структураў і нават дзяржаўных устаноў у дзясятках гарадоў нашай краіны.
  • Новая ініцыятыва — універсітэт імя Ніла Гілевіча. Зарэгістраваны ў якасці ўстановы ў сакавіку 2018. Заснаваны ТБМ, каб выправіць ганебную сітуацыю з немагчымасцю атрымаць вышэйшую адукацыю на беларускай мове.
  • Рэгіянальная падзея — кампанія супраць акумулятарнага завода ў Берасці.
  • Партнёрства года — кааліцыйная праца праваабарончых НДА Беларусі пры падрыхтоўцы дакладу для Камітэта па правах чалавека ААН. У выніку больш як 60 рэкамэндацый Камітэта правоў чалавека ААН да ўраду Беларусі маюць у сваім складзе прапановы беларускіх праваабаронцаў дзеля выпраўлення сітуацыі з правамі чалавека ў краіне.
  • Медыяактыўнасць года — кароткія ролікі ў сацсетках і перадача «Мова пра мову» Вінцука Вячоркі папулярызуюць мову сучаснымі сродкамі.
  • Крэатыў года — бацькоўская ініцыятыва «Дзеткі-кветкі», якая правяла грамадскі маніторынг моўнага статуса 106 дзіцячых садкоў у Мінску.
  • Гарбуз года — антыўзнагарода «Гарбуз года» дастаўся БелТА, па заяве якой 14 журналістаў недзяржаўных медыя абвінавацілі ў несанкцыянаваным доступе да інфармацыі.
  • Мэдыя / журналіст / журналістка года — Таццяна Каравянкова, якая на БелаПАН прафесійна асвятляе грамадска-палітычныя тэмы ў Беларусі.
  • Талака года — краўдфандынгавая платформа «Талака», якая летась дасягнула паказальніку ў 1 мільён рублёў, сабраных на грамадскія праекты.

Пераможцы 2019 года[правіць | правіць зыходнік]

9 студзеня ў мінскім клубе «Брюгге» адбылася цырымонія ўзнагароджання пераможцаў прэміі «Чэмпіёны грамадзянскай супольнасці-2019». Асамблея НДА ў адзінаццаты раз адзначыла асоб і важныя падзеі грамадскага сектару. Сёлета ў журы была рэкордная колькасць грамадскіх лідараў, экспертаў, журналістаў і пераможцаў мінулых гадоў — агулам 150 чалавек.

  • Грамадская лідарка года — першае месца падзялілі Святлана Гатальская з руху «Маршыруй, дзетка!», які прасоўвае прыняццtt закону аб супрацьдзеянні хатняму гвалту, і Алена Маслюкова, лідарка ініцыятывы супраць запуску завода па вытворчасці бялёнай цэлюлозы ў Светлагорску.
  • Кампанія года — кампанія па ўшанаванні паўстанцаў 1863—1864 гадоў у Вільні.
  • Новая ініцыятыва — адукацыйна-асветніцкая пляцоўка «Тэрыторыя правоў», заснаваная Беларускім домам правоў чалавека і ПЦ «Вясна».
  • Мэдыяактыўнасць — перамог відэаблог на YouTube «Рудабельская паказуха».
  • Талака года — краўдфандынгавая пляцоўка MolaMola.
  • Рэгіянальная падзея — праект «Інклюзіўны барыста», які распаўсюдзіў сваю працу на абласныя і малыя гарады.
  • Партнёрства года — усталяванне помніка Алесю Адамовічу ў Глушы. Грамадзянская супольнасць ініцыявала і сабрала сродкі. Праект падрыхтаваў скульптар Гэнік Лойка, падтрымала дачка пісьменніка Галіна Адамовіч, а мясцовая ўлада вылучыла годнае месца для помніка і дапамагла з арганізацыяй урачыстасці.
  • Крэатыў года — мабільная аплікацыя reBrest — гід па архітэктурнай спадчыне горада.
  • Журналістка года — Дыяна Серадзюк, якая вядзе рубрыку «Грамадства» у «Новым Часе».
  • Антыпрэмія «Гарбуз» года — апраўданне зноса памятных крыжоў у Курапатах і пераследу абаронцаў мемарыялу.

Зноскі[правіць | правіць зыходнік]

  1. Асамблея раздала ўзнагароды
  2. Асамблея НДА ўручыць прэміі «Чэмпіёны грамадзянскай супольнасці»
  3. Хто стане чэмпіёнамі грамадзянскай супольнасці-2013?
  4. Асамблея НДА раздала ўзнагароды
  5. У Беларусі распачалася кампанія «Праваабаронцы супраць смяротнага пакарання»
  6. Адбыўся форум грамадскіх арганізацый Магілёўшчыны
  7. Снегурочки, зайчики и Деды Морозы штурмовали палату представителей национального собрания
  8. Гарадзенскі суд над Залатым Львом
  9. Названы «Чэмпіёны грамадскай супольнасці — 2010»
  10. [1]
  11. Хваля рэпрэсій выклікала цунамі салідарнасці
  12. [2]
  13. Вынікі 2010 года: палітыка «лібералізацыі» завяршылася небывалымі рэпрэсіямі і масавымі арыштамі
  14. Таццяна Елавая: Правакатары маглі быць наймітамі спецслужбаў
  15. Алесь Бяляцкі — «Грамадскі лідар году-2011»
  16. Офіс па правах людзей з інваліднасцю адчыніўся ў Беларусі!
  17. Кіраўнік Цэнтра развіцця валанцёрства заявіў пра націск напярэдадні вырашэння пытання аб рэгістрацыі грамадскага аб’яднання ў Міністэрстве юстыцыі
  18. Страйк у Барысаве завяршыўся поспехам
  19. Сайт Prokopovi.ch перамог у намінацыі «Крэатыў году»
  20. У Мінску ўручаны прэміі «Чэмпіёны грамадзянскай супольнасці — 2012»
  21. Андрэй Бандарэнка: Зарэгістравалі новую арганізацыю, працуем далей
  22. Ганна Шапуцька: Мэта марафону — узмацніць хвалю салідарнасці
  23. Незалежны прафсаюз на «Граніце» стаў падзеяй года
  24. У Мінску аб’яўлены лаўрэаты пятай штогадовай прэміі «Чэмпіёны грамадзянскай супольнасці»
  25. Кампанія «Зробім лепш!»
  26. Першая мінская «Мова ці кава» сабрала сто чалавек
  27. Куды падзець сьвіней? Перасяліць!
  28. У Мінску стартаваў праект «PR недзяржаўных арганізацый, ініцыятыў, кампаній. Візітоўкі»
  29. Прыватны помнік Кастусю Каліноўскаму

Відэа[правіць | правіць зыходнік]

Спасылкі[правіць | правіць зыходнік]