Эканоміка Грэцыі

З пляцоўкі Вікіпедыя
Перайсці да: рух, знайсці
Эканоміка Грэцыі
Эканамічныя паказчыкі
Эканоміка Грэцыі

Валюта 1 еўра (ευρώ) = 100 цэнтаў (λεπτά)
Міжнародныя
арганізацыі
ЕС, СГА, АЭСР, АЧЭС
Статыстыка
ВУП (намінальны) 238 мільярдаў $
Эканамічна актыўнае насельніцтва 4,782,962
Знешні гандаль
Дзяржаўныя фінансы

Эканоміка Грэцыі з'яўляецца 44-й па велічыні ў свеце з намінальным валавым унутраным прадуктам (ВУП) у $238 мільярдаў у год. Апроч таго, яна займае 53-е месца ў свеце паводле парытэта пакупніцкай здольнасці з $286 мільярдаў у год. Па стане на 2015 год, Грэцыя з'яўляецца 15-й эканомікай з 28-мі краін Еўрапейскага Саюза. Дзяржава займае 38-е і 44-е месцы ў свеце з $18,064 і $26,449 па намінальным ВУП на душу насельніцтва і па парытэце пакупніцкай здольнасці на душу насельніцтва адпаведна.

Грэцыя з'яўляецца развітой краінай з эканомікай, заснаванай на сферы паслуг (82,8%) і прамысловасці (13,3%). У 2015 годзе сельскагаспадарчы сектар склаў 3,9% ад агульнага аб'ёму вытворчасці. Важнымі галінамі прамысловасці з'яўляюцца турызм і суднаходства. З 18 мільёнамі турыстаў у 2013 годзе па наведвальнасці Грэцыя заняла сёмае месца ў Еўрапейскім Саюзе і 16-е месца ў свеце. Гандлёвы флот Грэцыі з'яўляецца самым буйным у свеце з 15% сусветнага дэдвейта па стане на 2013 год. Павелічэнне попыту на міжнародныя марскія перавозкі паміж Грэцыяй і Азіяй прывяло да беспрэцэдэнтных інвестыцый у суднабудаўнічую прамысловасць.

Краіна таксама з'яўляецца важным вытворцам сельскагаспадарчай прадукцыі ў рамках Еўрапейскага Саюза. Грэцыя мае найбуйнейшую эканоміку на Балканскім паўвостраве і з'яўляецца галоўным рэгіянальным інвестарам. Яна з'яўляецца важным гандлёвым партнёрам Албаніі, Балгарыі, Румыніі, Сербіі і Былой югаслаўскай Рэспублікі Македоніі. Грэчаская тэлекамунікацыйная кампанія «OTE» стала важным гандлёвым партнёрам у былой Югаславіі і іншых балканскіх краінах.

Грэцыя стала адной з краін-заснавальніц арганізацыі эканамічнага супрацоўніцтва і развіцця (АЭСР) і арганізацыі чарнаморскага эканамічнага супрацоўніцтва (АЧЭС). Краіна далучылася да арганізацыі, якая сёння з'яўляецца Еўрапейскім Саюзам у 1981 годзе, а ў 2001 годзе прыняла еўра ў якасці нацыянальнай валюты, замяніўшы грэчаскую драхму па курсе 340,75 драхмаў за еўра. Апроч таго, Грэцыя з'яўляецца членам Міжнароднага валютнага фонда і Сусветнай гандлёвай арганізацыі.

Другая сусветная вайна (1939–1945) спустошыла эканоміку краіны, але высокі ўзровень эканамічнага росту з 1950 па 1980 гады быў названы «грэчаскім эканамічным цудам». З 2000 года Грэцыя перажывала высокія тэмпы росту ВУП, якія перавышалі сярэдні ўзровень у Еўразоне і дасяглі свайго піку на ўзроўні 5,8% у 2003 годзе і 5,7% у 2006 годзе. Пасля наступнай Вялікай рэцэсіі і даўгавога крызісу ў Грэцыі, які знаходзіўся ў цэнтры ўвагі ў рамках Еўрапейскага даўгавога крызісу, эканоміка пайшла на спад, а тэмпы росту рэальнага ВУП складалі -0,3% у 2008 годзе, -4,3% у 2009 годзе, -5,5% у 2010 годзе, -9,1% у 2011 годзе, -7,3% у 2012 годзе і -3,2% у 2013 годзе. У 2011 годзе дзяржаўны доўг краіны дасягнуў €356 мільярдаў (172% ад намінальнага ВУП). Пасля перамоваў аб найбуйнейшай рэструктурызацыі доўгу ў гісторыі з прыватным сектарам Грэцыя знізіла пазыковую нагрузку да €280 мільярдаў (137% ад ВУП), а таксама дасягнула росту рэальнага ВУП на 0,7% у 2014 годзе пасля шасці гадоў рэцэсіі, але ў 2015 годзе эканоміка краіны зноў пайшла на спад.