Ля Траецкага
Ля Трае́цкага (руск.: У Троицкого; таксама вядомы як «Дом Чыжа»[A][1]) — шматпавярховы жылы дом прэміум-класу на вуліцы Старажоўскай у Мінску[2].
Апісанне[правіць | правіць зыходнік]
Комплекс зроблены як працяг 12-павярховага шматсекцыйнага жылога дома, так званай «Панарамы», з частковым павышэннем забудовы, з улікам убудаваных аб’ектаў да 25 паверхаў, з прыступкавым падзеннем пры набліжэнні да Траецкага прадмесця да 7 паверхаў, з утварэннем на перападах шматлікіх пентхаусаў, раскрытых у бок Свіслачы[2].
У комплексе налічваецца 235 кватэр з метражом ад 57 да 332 кв. м. Гараж-стаянка комплексу разлічана на 316 месцаў[2].
Аўтар праекта — архітэктар Алег Ладкін, забудоўшчык — кампанія «Трайпл»[2].
Крытыка[правіць | правіць зыходнік]
Збудаванне шматпавярховага будынка ў непасрэднай блізкасці да Траецкага прадмесця і гістарычнага цэнтра Мінска ў цэлым выклікала абурэнне грамадскасці і архітэктурнай супольнасці. Так, дэкан архітэктурнага факультэта БНТУ Армэн Сардараў і загадчык кафедры Архітэктуры жылых і грамадскіх будынкаў Сяргей Сергачоў, абодва дактары архітэктуры, назвалі з’яўленне гэтай «махіны» памылкай і трагедыяй беларускай архітэктуры, следствам горадабудаўнічай усёдазволенасці. Імі была выказана занепакоенасць тым, што яна знішчыла значнасць Траецкага прадмесця і Опернага тэатра[3][4]. Галоўны архітэктар «Мінскпраекта» Міхаіл Гаўхфельд лічыць, што будынак разам з забудовай праспекта Пераможцаў насупраць «Мінск-Арэны» збудаваны папярок зялёнага дыяметра і такім чынам перакрываюць патокі пануючых вятроў і свежага паветра, якія ідуць ад Заслаўя да цэнтра горада, што спрыяе з’яўленню смогу і забруджанню паветра[5]. Старшыня Беларускага добраахвотнага таварыства аховы помнікаў гісторыі і культуры Антон Астаповіч заявіў, што пры будаўніцтве ЖК «Ля Траецкага» былі найгрубейшым чынам парушаны некалькі артыкулаў Закона аб ахове гісторыка-культурнай спадчыны, так, напрыклад, была знішчана гісторыка-планіровачная структура квартала, ландшафт, застаўся без вывучэння, якое прадугледжана законам, культурны пласт. Паводле яго меркавання, у будучыні трэба ставіць пытанне пра знос комплексу[3].
15 студзеня 2013 года Прэзідэнт Беларусі Аляксандр Лукашэнка на прэс-канферэнцыі для прадстаўнікоў беларускіх і замежных СМІ прызнаўся ў тым, што яму таксама «не вельмі падабаецца» комплекс «Ля Траецкага»[6].
З іншага боку аўтар праекта Алег Ладкін параўнаў сваё тварэнне з Эйфелевай вежай, якую спачатку таксама многія ўспрынялі неадназначна, і выказаў меркаванне, што кантраст паміж старым і новым толькі падкрэсліў гістарычную забудову[3]. Аўтара праекта падтрымаў тагачасны галоўны архітэктар Мінска Аляксандр Пятроў, аднак заўважыў, што эстэтыку будынка ён да канца зразумець не можа[7].
21 студзеня 2013 года міністр культуры Барыс Святлоў зацвердзіў Праект зоны аховы гісторыка-культурнай каштоўнасці — гістарычнага цэнтра Мінска, які прызнаў, што жылы комплекс Ля Траецкага і яшчэ шэсць аб’ектаў, у лік якіх трапіў і Палац Рэспублікі, з’яўляюцца дысгарманічнымі, парушаюць цэласнасць гістарычных ансамбляў і замінаюць успрыманню каштоўнасцей. Адзначаецца, што гэтыя збудаванні змянілі маштаб забудовы і знішчылі выразнасць сілуэта гістарычнага цэнтра горада, які з’яўляецца геаграфічным і кампазіцыйным ядром Мінска[8].
Вядомыя жыхары[правіць | правіць зыходнік]
- Святлана Алексіевіч — беларуская пісьменніца, лаўрэатка Нобелеўскай прэміі па літаратуры[9];
- Сяргей Шыткоўскі — беларускі хакеіст[10].
Заўвагі[правіць | правіць зыходнік]
Зноскі[правіць | правіць зыходнік]
- ↑ За Домам Чыжа будуюць хостэл. Там адбыўся пажар. nashaniva.by (15 мая 2019). Праверана 1-6-2019.
- ↑ а б в г Миллионеры ждут дом у Троицкого(недаступная спасылка)
- ↑ а б в Жилой дом «У Троицкого»: слава Эйфелевой башни или архитектурный провал (мнения экспертов)
- ↑ «Маяк Мінска»: беларускі Дубай ці нью-васюкі (меркаванні экспертаў)
- ↑ Водна-зялёная артэрыя Мінска ў небяспецы
- ↑ Лукашенко признался, что ему не нравится жилой дом «У Троицкого»
- ↑ Галоўны архітэктар Мінска: «Непрывабных раёнаў у сталіцы няма!»(недаступная спасылка)
- ↑ Дворец Республики, дом «У Троицкого» и здание МВД признаны дисгармоничными Архівавана 5 сакавіка 2016.
- ↑ Святлана Алексіевіч набыла апартаменты ў «доме Чыжа». nashaniva.by (5 мая 2016). Праверана 1-6-2019.
- ↑ Дзяніс Марціновіч. Мільён за кватэру. Жыхары «дома Чыжа»: хто яны?(недаступная спасылка). tut.by (nashaniva.by) (9 жніўня 2013). Архівавана з першакрыніцы 1 чэрвеня 2019.
Спасылкі[правіць | правіць зыходнік]
- Дзяніс Марціновіч. Мільён за кватэру. Жыхары «дома Чыжа»: хто яны?(недаступная спасылка). tut.by (nashaniva.by) (9 жніўня 2013). Архівавана з першакрыніцы 1 чэрвеня 2019.
- Жилой дом «У Троицкого»: слава Эйфелевой башни или архитектурный провал (мнения экспертов)
