Шу (міфалогія)

Шу
Выява III ст. да н. э.
Бог паветра
Міфалогія	старажытнаегіпецкая
Пол	мужчынскі пол і жанчына
Бацька	Атум
Маці	Іўсасет
Браты і сёстры	Тэфнут
Жонка	Тэфнут
Дзеці	Геб, Нут
У іншых культурах	Ары-гес-нефер (Куш)
Медыяфайлы на Вікісховішчы

Шу — старажытны егіпецкі бог паветра, спякоты і святла.

Міфалогія

Шу у іерогліфах

Шу лічыцца бажаством геліёпальскага пантэона. Імя паходзіць ад кораня, што значыў «сухі».

Паводле распаўсюджанай версіі міфа, Атум стварыў Шу са сваёй сліны або ў выніку ўзаемадзеяння са сваім ценем. Па іншай версіі, яго маці была Іўсасет. Яго сястрой і жонкай лічылася багіня Тэфнут. Егіпцяне верылі, што дзеці ад іх сумеснага шлюбу Геб і Нут таксама кахаюць адно аднаго. Каб не даць зямлі і небу зліцца, Шу стварыў паміж імі пласт паветра.

У міфах аб Атуме і Ра сцвярджалася, што Шу суправаджае бога сонца ў падземны сусвет і ратуе яго ад змея Апопа.

Шу часцяком маляваўся як уладар подыху, удзельнік апошняга суда над чалавекам пасля смерці. У познім Егіпце і Кушы Шу разглядалі як аднаго з першых фараонаў, яго імя сімвалізавала сакральную ўладу валадара. У Кушы ён атаясняўся з мясцовым богам Ары-гес-нефер.

Цікава, што постаці Шу і Тэфнут заставаліся папулярнымі нават падчас спроб Эхнатона ўвесці адзінае бажаство Атона.

Аблічча

На старажытнаегіпецкіх выявах Шу меў чалавечае аблічча. Выглядаў як мужчына ў галаўным уборы са страўсінага пер’я, са скіпетрам — знакам улады і знакам анк (паветра). Скуру часцяком малявалі чорнай, ці то каб падкрэсліць сувязь са спёкай, ці то каб выявіць сувязь з Нубіяй. Шырока распаўсюджаны скульптуры, на якіх Шу топча нагамі цела Геба і адначасова трымае над галавой Нут. Як муж багіні Тэфнут маляваўся ў вобразе льва.

Шанаванне

Пакуль не знойдзена храмаў з прысвячэннямі Шу. Аднак у асобных старажытнаегіпецкіх гарадах меліся мясціны, што мелі назвы «дом Шу», «уцёс Шу» або «трон Шу». Археолагі знаходзяць выявы Шу на тэрыторыі ўсяго Егіпта і на поўначы Судана.

Спасылкі

• На Вікісховішчы ёсць медыяфайлы па тэме Шу (міфалогія)
• Shu, Holder of the Sky, God of the Air, Wind, Sunlight and Protection Архівавана 13 мая 2017.
• Ancient Egypt: the Mythology — Shu
• Gods of Ancient Egypt: Shu — Ancient Egypt Online