Свята-Троіцкі Маркаў манастыр

Манастыр
Свята-Траецкі Маркаў манастыр
Свята-Казанская царква Свята-Тройца-Маркава манастыра
55°10′18,34″ пн. ш. 30°09′14,99″ у. д.
Краіна	Беларусь
Горад	Віцебск
Канфесія	Праваслаўе
Епархія	Віцебская
Тып	Мужчынскі
Дата заснавання	1642
Статус	Дзеючы манастыр
Медыяфайлы на Вікісховішчы

Свята-Троіцкі Маркаў (Маркаў-Троіцкі) манастыр — мужчынскі праваслаўны манастыр у Віцебску.

Гісторыя

Маркаў манастыр, паводле розных меркаванняў, адносіцца да XIV—XV стагоддзяў. Існуе легенда аб заснавальніку манастыра — нейкім Марку, які адасобіўся на ўчастку зямлі і пабудаваў там капліцу. Неўзабаве да яго далучаліся аднадумцы.

Манастыр існаваў да 1576 года, пасля скасаваны, а Троіцкі храм ператвораны ў прыходскі. Манастыр адноўлены ў 1633 годзе князем Львом Агінскім.

Росквіт манастыра адносіцца да XVII стагоддзя. У той час на яго тэрыторыі знаходзіліся два драўляны храмы — Троіцкі сабор і Пакроўская царква, выбудаваныя ў 1650 годзе. У 1656 г. патрыярхам Ніканам быў падораны цудатворны спіс Казанскай іконы Божай Маці.

У 1690 г. Пакроўская царква згарэла, на яе месцы пабудавалі новую. У 1760 г. на гэтым месцы быў пабудаваны новы каменны храм, таксама асвечаны ў гонар Покрыва Багародзіцы і захаваўся да сёння (пазней пераасвячоны ў гонар Казанскай іконы Божай Маці).

У 1850-х па праекце М. П. Высоцкага была надбудавана званіца.

Манастыр зачынены ў 1920 годзе. На яго тэрыторыі доўгі час размяшчалася міліцыя і іншыя ўстановы. Усе будынкі, акрамя Свята-Казанскай царквы, былі разбураныя (у тым ліку Троіцкі сабор — адзін з лепшых узораў драўлянага беларускага дойлідства).

Казанская царква — адзіная ў Віцебску, якая ў Савецкі час не зачынялася. У перыяд Вялікай Айчыннай вайны яна была пашкоджана, аднак часткова адноўлена ў пасляваенныя гады. Галоўны прастол храма асвечаны ў гонар Казанскай іконы Божай Маці, а бакавы прыдзел — у гонар Св. Сергія Раданежскага.

Манастыр адроджаны 23 лістапада 2000 года. У Свята-Казанскі храм зноў перанесеная Казанская ікона Божай Маці ў срэбным акладзе.

• Маркаў-Троіцкі манастыр у XIX ст.
• 
  Маркаў манастыр у Віцебску, Памятная кніжка Віцебскай губерні, 1865
• 
  Маркаў манастыр, XIX ст.
• 
  Царква Св. Тройцы Маркава манастыра, XIX ст.

Спасылкі

• Віцебскі Маркаў манастыр(недаступная спасылка) на сайце Віцебскай епархіі
• Інфармацыя на сайце АДЗІГІТРЫЯ
• У Віцебску прымалі ў казакі
• Свята-Троіцкі Маркаў манастыр на сайце Radzima.org — манастыр
• Свята-Троіцкі Маркаў манастыр на сайце Radzima.org — Свята-Казанская царква
• Свята-Троіцкі Маркаў манастыр на сайце Глобус Беларусі (руск.)
• Свята-Троіцкі Маркаў манастыр на сайце «Архіварта»