Валавы ўнутраны прадукт

Запыт «ВУП» перанакіроўваецца сюды; гл. таксама іншыя значэнні.

Намінальны ВУП на душу насельніцтва ў доларах ЗША (па стане на 2008 год)

ВУП на душу насельніцтва 2008 г., пералічаны па парытэту пакупной здольнасці
* Максімум: Люксембург — 58 600 дол. ЗША * Мінімум: Усходні Тымор — 400 дол. ЗША * Сярэдняе па ўсім свеце: 8800 дол. ЗША

Валавы ўнутраны прадукт (ВУП) — абагульнены эканамічны статыстычны паказчык; паказвае сукупны кошт усіх тавараў і паслуг, створаных у межах краіны як рэзідэнтамі, так і нерэзідэнтамі. З'яўляецца адным з базавых паказчыкаў эканамічнага развіцця краіны.

Разлічваецца трыма метадамі: па даходах, па выдатках, і метадам даданага кошту. Прымяняецца ў Сістэме нацыянальных рахункаў (СНР). На рахунку «Вытворчасць» СНР ВУП вылічваецца як розніцца паміж аб'ёмамі сукупнага выпуску і прамежнага спажывання, на рахунку «Стварэнне даходаў» — як сума аплочвання працы наёмных работнікаў, чыстых падаткаў на вытворчасць і сукупнага прыбытку ў эканоміцы, а на рахунку «Выкарыстанне даходаў» — як сума выдаткаў на канчатковае спажыванне і ашчаджэнні.

ВУП адрозніваецца ад паказчыка чыстага ўнутранага прадукту на велічыню спажывання асноўнага капіталу. ВУП разлічваецца ў фактычных асноўных і рынкавых цэнах (намінальны ВУП). Для вывучэння дынамікі ВУП прымяняюцца сталыя цэны. Рэальны ВУП разлічваецца метадам дэфлятавання.

ВУП на душу насельніцтва вылічваецца дзяленнем ВУП на колькасць жыхароў краіны. Для большай якасці параўнання ён часта падаецца з папраўкай на розніцу цэн у розных краінах.

ВУП паказвае толькі грашовы эквівалент усёй створанай прадукцыі, а не якасць прадукцыі, таму не можа прымяняцца для параўнання дабрабыту і якасці жыцця. Для гэтага існуюць іншыя паказчыкі, такія як Індэкс чалавечага развіцця.

Унізе паказаны краіны з найбольшымі ВУП у мільярдах долараў ЗША:

Месца	Краіна	1980	1990	2000	2003	2009
1.	ЗША	2.795,600	5.803,300	9.824,700	10.857,200	14.256,275
2.	Японія	1.072,900	3.052,200	4.766,100	4.290,700	5.068,059
3.	Германія	826,100	1.547,000	1.875,200	2.386,200	3.352,742
4.	Вялікабрытанія	536,700	994,600	1.440,900	1.775,000	2.183,607
5.	Францыя	682,400	1.219,800	1.313,300	1.731,600	2.675,951
6.	Італія	454,600	1.104,500	1.077,600	1.455,400
7.	Кітай	301,500	387,800	1.080,800	1.372,000
8.	Канада	268,900	582,700	724,200	850,500
9.	Іспанія	221,800	511,500	562,800	827,100
10.	Мексіка	202,000	262,700	581,400	611,600
11.	Індыя	175,500	313,100	460,800	556,100
12.	Паўднёвая Карэя	62,200	252,600	461,500	520,900
13.	Нідэрланды	178,400	295,500	371,600	509,300
14.	Аўстралія	156,700	307,900	378,700	508,200
15.	Бразілія	148,900	465,000	599,800	507,000
16.	Расія	42,000	85,600	259,700	428,800
17.	Швейцарыя	107,600	229,500	240,400	314,000
18.	Бельгія	121,700	197,800	228,700	300,800
19.	Швецыя	128,900	238,300	239,800	297,500
20.	Тайвань	41,400	160,400	309,600	288,800
21.	Аўстрыя	80,200	162,100	191,200	251,000

ВУП Беларусі

На 2010 ВУП Беларусі па разліках МВФ склаў 52,9 млрд. дол. (69-е месца ў свеце), паводле парытэта пакупной здольнасці — 130,8 млрд. дол. (59-е месца).

Гл. таксама

• Валавы нацыянальны прадукт
• Валавы рэгіянальны прадукт
• Спіс еўрапейскіх краін паводле ВУП
• Знешні доўг

Спасылкі

• Статыстыка ВУП па розных краінах
• Economic & Social Data Ranking
• Спіс краінаў па ВУП на душу насельніцтва
• Ранжаванне краінаў свету па ВУП на душу насельніцтва