Юзаф Адрыян Масальскі

Юзаф Адрыян Масальскі
Герб «Масальскі III»
Падскарбі надворны літоўскі 1754 — 6 чэрвеня 1765
Папярэднік	Аляксандр Міхал Сапега
Пераемнік	Антоні Тызенгаўз
Староста гарадзенскі 1748 — 1765
Папярэднік	Міхал Юзаф Масальскі
Пераемнік	Антоні Тызенгаўз
Нараджэнне	каля 1726
Смерць	6 чэрвеня 1765 Варшава
Род	Масальскія
Бацька	Міхал Юзаф Масальскі
Маці	Францішка Агінская
Жонка	Антаніна Радзівіл
Дзеці	Алена Апалонія, Ксаверы
Дзейнасць	афіцэр
Узнагароды	Ордэн Белага арла

Юзаф Адрыян МАСАЛЬСКІ (каля 1726 — 6 чэрвеня 1765, Варшава) — дзяржаўны дзеяч Вялікага Княства Літоўскага.

Староста гарадзенскі (з 1748), бержніцкі, лаздзейскі (з 1756), прапойскі, вісліцкі, падскарбі надворны ВКЛ з 1754; падпалкоўнік пяцігорскі, генерал-маёр (1754).

Пасол на соймы 1744, 1750, 1752 (яго маршалак), 1756, 1758, 1760, дэпутат Трыбунала ВКЛ у 1748 (яго маршалак).

Кавалер ордэна Белага Арла (1761). Належаў да групоўкі Чартарыйскіх.

Лічыўся здольным палітыкам, які імкнуўся да рэфарміравання дзяржаўнага ладу Рэчы Паспалітай, але заўчасная смерць перарвала яго кар'еру.

Сям'я

Быў сынам вялікага літоўскага гетмана Міхала Юзафа Масальскага і Францішкі Агінскай, дачкі троцкага кашталяна Мікалая Францішка Агінскага. Меў братоў Ігнацыя Якуба, Яна Мікалая і Казіміра Адрыяна.

Ажаніўся ў 1745 з князёўнай Антанінай Радзівіл (1730 — 1764), дачкой крайчага ВКЛ Марціна Мікалая Радзівіла.

Пакінуў сына Ксаверыя (каля 1760 — 1787) і дачку Алену Апалонію (1763 — 1815), жонку князя дэ Лінье (de Ligne), а потым Вінцэнта Патоцкага.

Крыніцы

• Масальскі Юзаф Адрыян // Вялікае княства Літоўскае: Энцыклапедыя. У 3 т.. — Мн.: Беларуская Энцыклапедыя.