Бор (Навасёлкаўскі сельсавет)

Аграгарадок Бор Краіна Беларусь Вобласць Мінская Раён Пухавіцкі Сельсавет Навасёлкаўскі Каардынаты 53°31′03″ пн. ш. 28°00′35″ у. д. Ранейшыя назвы Баравая Слабада Чырвоны Бор Часавы пояс UTC+3 Тэлефонны код +375 1713 Аўтамабільны код 5 СААТА 6244843006 Бор на карце Беларусі ±

Бор (трансліт.: Bor, руск.: Бор) — аграгарадок у Пухавіцкім раёне Мінскай вобласці Беларусі. Уваходзіць у склад Навасёлкаўскага сельсавета.

Геаграфія

Месціцца за 11 км ад чыгуначнай станцыі Пухавічы на лініі Мінск—Асіповічы, каля ракі Цітаўка.

Гісторыя

Ранняя гісторыя

За 1 км на поўдзень ад вёскі, ва ўрочышчы Падкапцы сярод асушаных балот месціцца гарадзішча (мясцовая назва — Акопы Кацярыны, Капец).

У XVIII стагоддзі вёска Баравая Слабада ў Менскім павеце Менскага ваяводства Вялікага Княства Літоўскага, адносілася да маёнтка Навасёлкі, уласнасць Барэцкай.

У выніку другога падзелу Рэчы Паспалітай 1793 года тэрыторыя апынулася ў складзе Расійскай імперыі, у Ігуменскім павеце Мінскай губерні.

Пасля 1861 года ў Навасёлкаўскай воласці Ігуменскага павета.

Найноўшы час

З канца лютага 1918 года тэрыторыя акупаваная войскамі Германскай імперыі. 25 сакавіка 1918 года згодна з Трэцяй Устаўной граматай воласць абвешчана часткай Беларускай Народнай Рэспублікі. У снежні 1918 года занята Чырвонай Арміяй, з 1 студзеня 1919 года ў адпаведнасці з пастановай І з’езда КП(б) Беларусі яна ўвайшла ў склад Савецкай Беларусі, з 27 лютага 1919 года — у ЛітБел ССР. У час польска-савецкай вайны ў жніўні 1919 — ліпені 1920 гадоў пад акупацыяй Польшчы (Мінская акруга ГУУЗ).

З 31 ліпеня 1920 года ў Беларускай ССР. У пачатку 1930-х гадоў праведзена прымусовая калектывізацыя, створаны калгас «Чырвоны Бор», працавалі кузня і вятрак.

У Другую сусветную вайну з канца чэрвеня 1941 года да 4 ліпеня 1944 года пад акупацыяй Германіі. У ходзе карных аперацый вёска была спалена, забіта 235 жыхароў. Пасля вайны вёска адноўлена.

У 1966 годзе да вёскі далучаны пасёлак Бор 1.

Насельніцтва

• 1970 год — 187 двароў, 704 жыхары
• 1995 год — 187 двароў, 532 жыхары
• 2002 год — 145 двароў, 475 жыхароў
• 2009 год — 470 жыхароў
• 2019 год — 446 жыхароў

Вядомыя асобы

• Раман Фёдаравіч Ляпіч (1906—1977) — беларускі паэт, крытык, перакладчык, выкладчык.
• Валерый Уладзіміравіч Бабук (нар. 1956) — беларускі спартсмен, трэнер.
• Сяргей Пятровіч Семяняка (нар. 1975) — беларускі спартсмен.

Інфраструктура

• Сярэдняя школа
• Механічныя майстэрні
• Дом культуры
• Бібліятэка
• Фельчарска-акушэрскі пункт
• Дзіцячы сад-яслі
• Аддзяленне сувязі
• Крама

Славутасці

• Гарадзішча (Акопы Кацярыны, Капец)
• Камень-следавік, на могілках. Паводле аднаго з паданняў, след на камені пакінуў Ісус Хрыстос, які праходзіў праз вёску. Паводле другога падання, хворай жанчыне ў сне Бог указаў на гэты камень і загадаў маліцца за сваё здароўе, у выніку чаго яна вылечылася. Лічыцца, што камень найлепш дапамагае ад зубнога болю.

Літаратура

• Бор // Гарады і вёскі Беларусі: Энцыклапедыя. Т. 8: Мінская вобласць, кн. 4 / рэдкал.: Т. У. Бялова (дырэктар) і інш. — Мн.: Беларуская Энцыклапедыя імя Петруся Броўкі, 2013. — С. 121. — 2 000 экз. — ISBN 978-985-11-0735-9.
• Памяць: Пухавіцкі раён: Гісторыка-дакументальныя хронікі гарадоў і раёнаў Беларусі / Укл. А. А. Прановіч; Рэдкал.: А. М. Карлюкевіч і інш.. — Мінск: Беларусь, 2003. — 749 с. — ISBN 985-01-0251-9.
• Республика Беларусь. Минская область: Общегеографический атлас (руск.) / Ред. Г. Г. Науменко. — Мн.: РУП «Белкартография», 2008. — С. 23. — 48 с. — 10 000 экз. — ISBN 978-985-508-054-2.
• А. Карабанаў, В. Вінакураў, Л. Дучыц, А. Зайцаў, І. Клімковіч. Культавыя і гістарычныя валуны Беларусі / Нацыянальная акадэмія навук Беларусі, Інстытут прыродакарыстання. — 2-е. — Беларуская навука, 2022. — 404 с. — ISBN 978-985-08-2793-7.

Спасылкі

• На Вікісховішчы пакуль няма медыяфайлаў па тэме, але Вы можаце загрузіць іх