Дзяржаўны камітэт па навуцы і тэхналогіях Рэспублікі Беларусь

Дзяржаўны камітэт па навуцы і тэхналогіях Рэспублікі Беларусь
скарочана — ДКНТ РБ
Агульная інфармацыя
Краіна	Беларусь
Дата стварэння	30 лістапада 1993
Папярэднія ведамствы	Камітэт па навуцы і тэхналогіях (да 23 верасня 1994 г., 5 сакавіка 2002 — 12 лютага 2004), Камітэт па навуцы (24 верасня 2001 — 5 сакавіка 2002)
Штаб-кватэра	Мінск, вул. Акадэмічная, д. 1
Гадавы бюджэт	31 845 млн рублёў (2010 год; 10 637 тыс. $)
Старшыня	Сяргей Шлычкоў
Першы намеснік	Андрэй Касоўскі
Намеснік	Анатоль Сільчанка
Падведамны орган	«Навукова-аналітычны цэнтр інфармацыі, інавацый і трансфера тэхналогій» (Магілёў)
Сайт	gknt.org.by

Дзяржаўны камітэт па навуцы і тэхналогіях Рэспублікі Беларусь (ДКНТ Беларусі) — ведамства ўрада Беларусі, упаўнаважанае парадкаваць ахову правоў інтэлектуальнай уласнасці. Старшыня камітэта прызначаецца і здымаецца з пасады прэзідэнтам. З 21 снежня 2021 года пасаду старшыні камітэта займае Сяргей Шлычкоў.

Склад

На 2019 год ДКНТ Беларусі ўключаў:

• 3 упраўленні — 1) інавацыйнай палітыкі, 2) навукова-тэхнічнай палітыкі і экспертызы, 3) міжнароднай навукова-тэхнічнай палітыкі і экспертызы;
• 3 аддзелы — 1) інфармацыйна-аналітычны, 2) планавання, эканомікі і фінансаў, 3) прававой і кадравай працы;
• 2 групы — 1) арганізацыйнай працы і кантролю, 2) бухгалтарскага ўліку і фінансаў;
• падраздзяленне аховы дзяржаўных таямніц;
• 3 дзяржаўныя ўстановы — Беларускі інстытут сістэмнага аналізу і інфармацыйнага забеспячэння навукова-тэхнічнай сферы, Нацыянальны цэнтр інтэлектуальнай уласнасці і Рэспубліканская навукова-тэхнічная бібліятэка;
• Беларускі інавацыйны фонд;
• 3 унітарныя прадпрыемствы — «Гродзенскі Цэнтр навукова-тэхнічнай і дзелавой інфармацыі», «Цэнтр навукова-тэхнічнай і дзелавой інфармацыі» (Гомель), «Навукова-аналітычны Цэнтр інфармацыі, інавацый і трансферу тэхналогій» (Магілёў).

Паўнамоцтвы

Згодна з уставам камітэт мае паўнамоцтвы на:

• прапанову змен і нагляд за выкананнем заканадаўства аб навуцы, інавацыях і ахове правоў інтэлектуальнай уласнасці;
• спыненне выдаткоўвання на інавацыйную дзейнасць з дзяржаўнага бюджэту;
• стварэнне навуковых саветаў;
• замову навуковых даследаванняў;
• запыт звестак ва ўстановах;
• заключэнне міжведамасных міжнародных пагадненняў аб ахове правоў інтэлектуальнай уласнасці;
• правядзенне навуковых нарад і выставак;
• стварэнне, пераўтварэнне і скасаванне падпарадкаваных устаноў;
• прыцягненне спецыялістаў да навуковых даследаванняў і аховы правоў інтэлектуальнай уласнасці;
• заключэнне з навуковымі ўстановамі і спецыялістамі дагавораў на выкананне навуковых даследаванняў;
• хадайніцтва аб узнагародзе работнікаў за дасягненні ў навуцы і ахове інтэлектуальнай уласнасці.

Гісторыя

30 лістапада 1993 года Кабінет міністраў Рэспублікі Беларусь зацвердзіў Пастанову № 809 аб стварэнні Камітэта па навуцы і тэхналогій (КНТ). 23 верасня 1994 года прэзідэнт Беларусі Аляксандр Лукашэнка падпісаў Указ № 122 «Аб змяненні структуры цэнтральных органаў кіравання Рэспублікі Беларусь», паводле якога КНТ далучылі да Міністэрства адукацыі і навукі Рэспублікі Беларусь. 11 студзеня 1997 года А. Лукашэнка падпісаў Указ № 30 «Аб сістэме рэспубліканскіх органаў дзяржаўнага кіравання, падпарадкаваных Ураду Рэспублікі Беларусь», якім пераўтварыў КНТ Мінадукацыі і навукі Беларусі ў Дзяржаўны камітэт па навуцы і тэхналогіях Рэспублікі Беларусь (ДКНТ Беларусі). 24 верасня 2001 года Указам № 516 «Аб удасканаленні сістэмы рэспубліканскіх органаў дзяржаўнага кіравання і іншых дзяржаўных арганізацый, падпарадкаваных Ураду Рэспублікі Беларусь» ДКНТ Беларусі аб’ядналі з Дзяржаўным вышэйшым атэстацыйным саветам і Дзяржаўным патэнтным камітэтам у Камітэт па навуцы пры Савеце міністраў Беларусі. У складзе Камітэта па навуцы ўтварылі Вышэйшы атэстацыйны камітэт. 5 сакавіка 2002 года А. Лукашэнка падпісаў Дэкрэт № 7 «Аб удасканаленні дзяржаўнага кіравання ў сферы навукі», якім Камітэт па навуцы зноў перайменавалі ў КНТ пры Савеце міністраў. У склад КНТ улучылі Нацыянальны цэнтр інтэлектуальнай уласнасці. 12 лютага 2004 года А. Лукашэнка падпісаў Указ № 66 «Аб некаторых захадах па аптымізацыі сістэмы рэспубліканскіх органаў дзяржаўнага кіравання і іншых дзяржаўных арганізацый, падпарадкаваных Савету міністраў Рэспублікі Беларусь, структуры і колькасці работнікаў дзяржаўных органаў, іншых дзяржаўных арганізацый». Паводле Указа, КНТ зноў пераўтварылі ў ДКНТ Беларусі. 4 жніўня 2009 года А. Лукашэнка падпісаў Дэкрэт № 9 «Аб унясенні змяненняў і дапаўненняў у Дэкрэт прэзідэнта Рэспублікі Беларусь ад 5 сакавіка 2002 г. № 7», паводле якога размежаваў паўнамоцтвы ДКНТ Беларусі і Нацыянальнай акадэміі навук Беларусі.

Спасылкі

• Дзяржаўны камітэт па навуцы і тэхналогіях Беларусі Архівавана 14 кастрычніка 2012. (руск.)
• "Кантакты". Дзяржаўны камітэт па навуцы і тэхналогіях Рэспублікі Беларусь. 2019. Архівавана з арыгінала 30 кастрычніка 2021. Праверана 10 чэрвеня 2019.
  • Звароты Архівавана 12 чэрвеня 2019.