Іпуць

Іпуць
рака Іпуць (на гарызонце бачны мікрараён Гомеля)
Характарыстыка
Даўжыня	437 (у межах Беларусі 64 км) км
Басейн	10 900 км²
Расход вады	55,6 м³/с
Вадацёк
Выток	Клімавіцкі раён
• Каардынаты	53°36′47″ пн. ш. 32°11′12″ у. д.
Вусце	Рака Сож
• Каардынаты	52°25′44″ пн. ш. 31°03′04″ у. д.
Размяшчэнне
Водная сістэма	Сож → Дняпро → Дняпроўскі ліман[d]
Краіна	Беларусь  Расія
Код у ДВР	04010000712105000014060
— выток, — вусце
Медыяфайлы на Вікісховішчы

Іпуць — рака ў Клімавіцкім, Добрушскім, Гомельскім раёнах Беларусі, Смаленскай і Бранскай абласцях Расіі, левы прыток ракі Сож (басейн Дняпра).

Даўжыня 437 км, у межах Беларусі 64 км. Вадазбор 10 900 км². Сярэднегадавы расход вады ў вусці 55,6 м³/с. Агульнае падзенне ракі 84,9 м. Сярэдні нахіл воднай паверхні 0,2 м/км.

Асноўныя прытокі

Справа: Ачоса. Злева: Няцёша, Хорапуць.

На рацэ

Гарады: Сураж, Добруш.

Агульнае

Пачынаецца за 0,8 км на захад ад вёскі Нядзведзь Клімавіцкага раёна, цячэ па Смаленскай, Бранскай і Гомельскай абласцях, упадае ў Сож на паўночна-ўсходняй ускраіне горада Гомель.

Вярхоўе ракі на Аршанска-Магілёўскай раўніне, прывусцявы ўчастак у Гомельскім Палессі. Найбольшы ўзровень разводдзя ў красавіку, сярэдняя вышыня над межанным узроўнем 3—4 м. Замярзае ў 1-й палове снежня, крыгалом у канцы сакавіка — пачатку красавіка.

Даліна трапецападобная, шырыня яе ў вярхоўі 1—1,5 км, ніжэй 2,5—3,5 км, на ўчастку ад горада Сураж да вусця 4—8 км. Пойма пераважна двухбаковая, у нізоўі перасечаная старыцамі з азёрамі старычнага тыпу. Шырыня яе да вусця ракі Надва 0,2—0,8 км, ніжэй 2,5—3,5 км.

Рэчышча каналізаванае на працягу 24,3 км (ад вытоку да мяжы з Расіяй), ніжэй звілістае; шырыня яго ў вярхоўі 1,5—12 м, на астатнім працягу 20—50 м. Берагі стромкія і абрывістыя, вышынёй 0,5—2 м.

Літаратура

• Ресурсы поверхностных вод СССР. Описание рек и озёр и расчёты основных характеристик их режима. Т. 5. Белоруссия и Верхнее Поднепровье. Ч. 1–2. – Л., 1971.
• Природа Белоруссии: Попул. энцикл. / БелСЭ; Редкол.: И. П. Шамякин (гл. ред.) и др. — Мн.: БелСЭ, 1986. — 599 с., 40 л. ил. (руск.)
• Блакітная кніга Беларусі : Энцыклапедыя / рэдкал.: Н. А. Дзісько і інш. — Мн.: БелЭн, 1994. — 415 с. — 10 000 экз. — ISBN 5-85700-133-1.

Спасылкі

• Рака Іпуць
• Ипуть // Вялікая савецкая энцыклапедыя (руск.)