Філалагічны факультэт БДУ
| Філалагічны факультэт | |
|---|---|
| Беларускі дзяржаўны ўніверсітэт | |
| Файл:Logo BSU.jpg | |
| Англійская назва | Faculty of philology |
| Заснаваны | 1939 |
| Дэкан | Роўда Іван Сямёнавіч |
| Месцазнаходжанне |
 Беларусь, Мінск, вул. К. Маркса, 31 |
| philology.bsu.by | |
Філалагічны факультэт БДУ – структурнае падраздзяленне Беларускага дзяржаўнага ўніверсітэта.
Гісторыя
Падрыхтоўка спецыялістаў-філолагаў ва ўніверсітэце пачалася з першага года яго заснавання на этнолага-лінгвістычным аддзяленні факультэта грамадскіх навук БДУ. Пасля працягвалася на літаратурна-лінгвістычным аддзяленні педагагічнага факультэта. На ім працавалі такія вядомыя навукоўцы-філолагі, як акадэмік АН БССР І. І. Замоцін, прафесары Я. І. Барычэўскі, А. М. Вазнясенскі, М. М. Піятуховіч, П. А. Бузук. З восені 1923 года лекцыі па беларускай мове і методыцы яе выкладання пачаў чытаць выдатны педагог, класік беларускай літаратуры Якуб Колас.
Годам нараджэння самастойнага філалагічнага факультэта стаў 1939 год. Першым дэканам быў прызначаны выдатны навуковец-лінгвіст прафесар Цімафей Пятровіч Ломцеў. Працяглы час дэканам факультэта з'яўляўся доктар філалагічных навук, прафесар Міхась Рыгоравіч Ларчанка (1943—1945, 1955—1963).
У кастр. 1968 студэнты-філолагі БДУ, сярод лідараў якіх былі Алесь Разанаў, Віктар Ярац і Леў Барташ, звярнуліся ў ЦК КПБ з лістом на імя П. М. Машэрава (ліст падпісала некалькі соцень чалавек) дзе патрабавалі вяртання выкладання на беларускай мове. У выніку арганізатары падпісання ліста атрымалі ярлыкі «буржуазных нацыяналістаў».
Асновай філалагічнага факультэта да сярэдзіны 1990-х гадоў былі два аддзяленні беларускай мовы і літаратуры і рускай мовы і літаратуры (з восені 1947 па восень 1967 года ў склад факультэта ўваходзіла яшчэ і аддзяленне журналістыкі). У свой час студэнтамі факультэта, а некаторыя пазней і выкладчыкамі, былі народныя пісьменнікі Беларусі Кандрат Крапіва, Іван Мележ, Ніл Гілевіч, Іван Навуменка, Рыгор Барадулін, акадэмік АН Беларусі Аляксандр Падлужны, член-карэспандэнты АН Беларусі Аляксандр Булыка, Міхась Мушынскі і іншыя.
У сярэдзіне 1990-х гадоў пачынаецца актыўная перабудова факультэта. Акрамя традыцыйных беларускай і рускай філалогіі пачынаецца набор на новыя спецыяльнасці: класічнай, славянскай (польскай, украінскай, балгарскай, чэшскай, сербскай), рамана-германскай (англійскай, нямецкай, французскай, італьянскай), усходняй філалогіі.
Структура
Кафедры
- Англійскага мовазнаўства
- Гісторыі беларускай мовы
- Беларускай літаратуры і культуры
- Гісторыі беларускай літаратуры
- Замежнай літаратуры
- Класічнай філалогіі
- Нямецкага мовазнаўства
- Прыкладнай лінгвістыкі
- Раманскага мовазнаўства
- Рускай літаратуры
- Рускай мовы
- Рыторыкі і методыкі выкладання мовы і літаратуры
- Славянскіх літаратур
- Сучаснай беларускай мовы
- Тэарэтычнага і славянскага мовазнаўства
- Тэорыі літаратуры
- Кітайскай філалогіі
Спецыялізацыі
- Беларуская філалогія,
- Руская філалогія,
- Класічная філалогія,
- Славянская філалогія (польская, балгарская, чэшская, сербская, украінская),
- Рамана-германская філалогія (англійская, нямецкая, французская, італьянская),
- Усходняя філалогія (кітайская).
Дэканы
- Цімафей Пятровіч Ломцеў (1939-1941),
- Міхась Рыгоравіч Ларчанка (1943—1945),
- Міхаіл Іванавіч Жыркевіч (1945-1947),
- Лука Васільевіч Шашкоў (1947-1951),
- Марыя Андрэеўна Жыдовіч (1951-1952),
- Юрый Аляксандравіч Васільеў (1952-1955),
- Міхась Рыгоравіч Ларчанка (1955—1963).
- Рыгор Васільевіч Булацкі (1963-1967)
- Аляксей Арсеньевіч Волк (1967-1990)
- Алег Антонавіч Лойка (1991-1996)
- Ларыса Аляксандраўна Мурына (1996-2002)
- Іван Сямёнавіч Роўда (з 2002 года)
