Бежанцы грамадзянскай вайны ў Сірыі

Асноўны артыкул: Грамадзянская вайна ў Сірыі

Бежанцы з Сірыі ідуць у суправаджэнні вайскоўцаў арміі Славеніі, кастрычнік 2015.

Паводле звестак ААН на пачатак 2016 года, з-за баявых дзеянняў у Сірыі ў гуманітарнай дапамозе мелі патрэбу 13,5 млн грамадзян краіны, з якіх больш за 6 млн атрымалі статус унутрана перамешчаных асоб і больш за 4,8 млн з’яўляліся бежанцамі за межамі дзяржавы.

Паводле ацэнак расійскіх вайскоўцаў на жнівень 2018 года, з 2011 года Сірыю пакінулі больш за 6,9 млн чалавек. Паводле даных Упраўлення Вярхоўнага камісара ААН па справах бежанцаў, на 1 снежня 2018 года ў 45 дзяржавах знаходзіліся 6 664 415 афіцыйна зарэгістраваных сірыйскіх бежанцаў, у тым ліку 1 999 325 жанчын і 3 398 852 дзіцяці. Большасць бежанцаў знаходзіліся ў наступных дзяржавах: Турцыя (3,6 млн.), Ліван (каля 952 тыс.), Іарданія (каля 674 тыс.), Германія (каля 534 тыс.), Ірак (каля 252 тыс.). Ацэначна, выказалі жаданне вярнуцца на радзіму 1,7 млн сірыйцаў з дзесяці краін свету. Па стане на снежань 2018 года, у 412 населеных пунктах, найменш пацярпелых ад ваенных дзеянняў, разгорнуты пункты прыёму і размяшчэння бежанцаў прыкладна на 1,5 млн месцаў. У той час яны вярталіся ў асноўным толькі з Лівана і Іарданіі. У буйных гарадах і населеных пунктах у зоне баявых дзеянняў інфраструктура разбурана на 40—70 %.

Як паведаміў 19 лютага 2019 года начальнік Нацыянальнага цэнтра кіравання абаронай Расіі генерал-палкоўнік Міхаіл Мізінцаў, у родныя мясціны вярнулася больш за 1645 тысяч сірыйскіх грамадзян, з іх звыш 1 277 тысяч — унутрана перамешчаныя асобы і больш за 368 тысяч з-за мяжы. У апошнім дакладзе дэпартамента Блізкага Усходу і Паўночнай Афрыкі Упраўлення вярхоўнага камісара ААН па справах бежанцаў была адзначана ўстойлівая тэндэнцыя да вяртання сірыйцаў на радзіму, што наўпрост звязваецца з паляпшэннем становішча ў краіне і актывізацыяй работы профільных ведамстваў краіны. Мізінцаў адзначыў нарошчванне аб’ёмаў работ па аднаўленні інфраструктуры і сацыяльных аб’ектаў Сірыі. Паводле яго даных, усяго ў розных раёнах краіны адрамантаваны і ўведзены ў эксплуатацыю 2787 жылых дамоў, 138 медыцынскіх устаноў, 815 адукацыйных устаноў, 127 аб’ектаў водазабеспячэння, 595 электрападстанцый, 14257 прадпрыемстваў прамысловасці.