Гродзенская кафля
Гродзенская кафля — вырабы рамеснікаў-ганчароў XIV—XIX стст. у Гродне, выяўленыя на тэрыторыі Старога замка і манастыра базыльянак.
Найбольш раннімі з’яўляюцца гаршковыя кафлі з круглым вусцем і дыяметрам донца 7—8 см. Кафлі другой паловы XVI ст. маюць каробкападобную румпу і квадратную паліваную або тэракотавую ўвагнутую вонкавую пласціну з адагнутай вонкі рамкай і выявай кветкі пасярэдзіне. На кафлі XVII ст. выявы барочнага характару з раслінным, геаметрычным, зааморфным арнаментам (часам у спалучэнні); некаторыя маюць выяву коннага рыцара. Кафлі XVIII ст. вызначаюцца спрошчаным малюнкам і адсутнасцю рамкі, у канцы стагоддзя пачалі вырабляць размаляваныя кафлі з выявамі жанравых сцэн. На мяжы XIX—XX стст. наладжана прамысловая вытворчасць кафлі ў стылі «мадэрн» з насычаным рэльефным малюнкам.
Літаратура
[правіць | правіць зыходнік]- Гродзенская кафля // Беларуская энцыклапедыя: У 18 т. Т. 5: Гальцы — Дагон / Рэдкал.: Г. П. Пашкоў і інш. — Мн. : БелЭн, 1997. — Т. 5. — 576 с. — 10 000 экз. — ISBN 985-11-0035-8. — ISBN 985-11-0090-0 (т. 5).
